Responsive Ad Slot

ZAN THIM UM SIENKHAWM ZING KHAWVAR A UM

Sunday, October 8, 2017

/ Published by VIRTHLI
~ Jami Darngawn, Virthli Columnist

Hun le ni hai a hung fe peia kei ve bawk khawm hin mi thu ziek hai ka lo tiem ve hlak kha, tuhin chu tiemtu chau nilovin ziektu ngirhmun ah ka um ve tah a nih!

Ni e, khawvel hma a hung sawn peia Lalpa ropuina a hung inlang zuol pei a, kei ngei khawm tu tieng tieng hin tiemtu nekin ziektu nina ka chang el hi a san a um ti thei a nih. Asan ti el dim ani chu ka lo inzawt ngun ta hle a chu la hang inzawt nawk el ka tih ie Lalpa ropuina dingin.

Awleh, ka nau lutir chu kum 3/4 vel a ni a'nthawkin hlasak hai hi a ngai nuom thei em em a, zan ah a in thei ngainaw leiin kan nufa'n zan khawvar damin TV a hlasak hai kan en/ngaithlak hlak a, ka nau lutir chun hlasak a ngai chun inhawi a ti a, a hlim em em hlak a nih. Kan naute hlimna ding a ni phawt chun tiin a hla ngaina ding TV le thil dang dang hai chu kan inchawk pek hlak a, zan sawt tak tak hnung dam hin ka naute dawn malamin kei khawma lekhabu chi dang dang hai ka lo tiem ve hlak, chu hun lai chun kan ngaisie thei hle a, mihriem ang khawm hin kan ngainaw chang a um hlak, ka chan hi sie ka ti thei taluo a, ka țap chang khawm a va tam de aw ! Hla siemtu chun "Zan um sienkhawm zing a um" a lo ti angin ka zan hun tawng lai khan chu khawmuol chu a'n thim hle a nih. Fe dan ding le um dan ding ka'n vai hlak, a chang chun "Pathien hin a mi hmangai ta naw a ni hih" ka ti hlak. Ka pasalin fena a nei chang hin "Ka hung pha iem ka hung hawn pek ding che" a ti pha "Lekhabu țha mi hung hawn pek rawh aw" ka ti hlak.

Ani ngei hun le ni hai a hung fe pei. a, khawvel thiemna le varna hai a hung insang peia, kei mi mawl daikil kara um nu khawm hin ka tapte bul a inthawkin thu ka hang ziek el hlak hi chu a mak ti dim am ani...? Lalpa ropuina ding ni mawl raw seh.

Zan sawt tak tak ka meng a, a chang chun ka mang ang hle hlak, Lalpa ka ko hlak a, a mi dawn ngai sie nawh, a to țawk țawk hlak a nih. Vawi khat chu hieng hin thu ka dawng a, "Tuta i um dan hai hi harsa ti hle la khawm tuor fan fan rawh" ti a nih. Chu le inruol chun mitthla angin, tak angin thil ka hmu a, hmun pakhat a hin mipui iemani zat an lo um a, chu taka chun ka testimony hai inchat lo chun ka lo hril ngat ngat a nih. A hun lai khan chu umzie bo angin ka ngai a, ka uksak/ngaisak chuong nawh. Amiruokchu, kum 10 vel liemtah hnung, tu tieng tieng hin a'ndik ti el ding am ani....! Nitin deu thaw'n ka testimony hai ka hang ziek el hi chu a chang chun ka'n phalam/inzak ve hlak a chu sungtieng/lungrila mi mawrtu a um tlat leiin ziek lo thei kan nawh.

Hla siemtu bawk chun "Mihriem thiemna le varna a'nsang zuolpo leh an chungah let sangtamin nang i lo um si" tia a lo inzawt chu a'ndik ngawt el. Tulai a tuelkhawma ei hmang ti thei ding mobile a'nthawkin lnternet fe thlengin Lalpa'n ka testimony hai hril/ziekna ding kawt a mi hang pek hi ka lawm em em a nih.

Kum 2/3 chu thiem le thiem lovin ka testimony hai le Pathien thu Bible thu hai ka thei angangin ka ziek ve tah a, tuhin chu ka pasalin hieng hin a tih "Ni dang chu fena ei nei lekhabu thar ei hung hawn leh i lawm em em hlak kha an'a, tuhin chu ka lekhabu hung hawn hai khawm i uksak ta nawh" a mi ti hlak. A'ndik a nih tuhin chu ziektu ah Lalpa'n hun a mi ruotpek hi ka lawm hle a, baw pel ka'n lau a nih, hieng hin mi'n ziektir zing a tih ti chu ka hril thei nawh.

Pathienin mihriem a siem laia hausatak le vartak dinga a lo siem lal Solomon chun hieng hin a lo inzawt a;
Thuhriltu 12:
2. Chun chu bâka chun, ka naupa, hienghai hin infuiin um rawh. Lekhabu tamtak siem hin tawp lêm a nei naw a, inchûk tam khawm hi taksa inrimna chau a nih.
13. Thil popo khaikhawmna chu hei ngaithlâng ei tiu:
Pathien ți la, a thupêkhai chu zawm rawh,
Hihi mihriem thilthaw ding pumpui chu a nih.

14. Pathien chun sin tinrêng chu rorêlnaah a hung lâklût ding a ni si a,
Thil inthuphai popo le,
A țha khawm, annawleh a țhanaw khawm chu.

Lal Solomon nuhmei khawm sangkhat lai neiin hausa hle sienkhawm lungawina taktak a nei nawh a, a thil hriet le anchukdawk hai chu "Pathien ția a thupek hai zawm" ti chu a nih. Nang le kei khawm ei hun tawng/ei thil tuok mek hai hi harsa deu hlak sienkhawm, Pathien ți deka a thupek hai zawm hi a lo țha tak chu a nih.

Khawvel zan thim lam ei hraw mek lai hin harsatna le beidawngna haiin mi chim buoi hlak sienkhawm, zing khawvar Lalpa'n a mi buotsai pek a nih ti hriezingin Pathien thupek hai hriethiem a ei zawm thei sengna dingin Lalpa'n tiemtuhai lungril ah thar takin mal mi sawm pek raw seh.
Don't Miss
© all rights reserved
made with by Simon L Infimate