Virthli Sports, Guwahati, 21/05/16: McDowell's Mohun Bagan AC chun 5-0 a Aizawl FC hneban in 2016 Hero Federation Cup nopui an lo dawm tah. Final ah vawi 19 lut tah in vawi 14 zet hrattak nina an lo hau tah a, Federation Cup chanchina nopui dawm rawn tak an nih.
Vawizana Indira Gandhi Stadium, Sarusajai, Guwahati a ruosur
hnuoia inkhel ah hin Sony Norde(48'), Dhanachandra Singh(59'), Jeje Lalpekhlua(72',
89') le Bikramjit Singh(83') hai goal thun hmangin Mohun Began hai hin hratna an
chang a. Hero of the Match dawngtu Jeje Lalpekhlua(8 goals) hin Mohun Bagan player
hlui Jose Ramirez Barreto(7 goals) record khumin Federation Cup season khat sunga
goal thun rawntak ani tah.
Inkhel tan ani hlim anthawk hin Aizawl FC ha'n an nawr nasa em
em a, right-back Chullova'n Haiti international player Sony Norde a suk 'nil' hne
hle. Aizawl FC hai inkhel hi an rang em leiin first-half sung po kha chu Sanjoy
Sen a rawihai hin a law dan ding an hrietnaw ani deu tak. Field lailung lai
chetha vieu hai sienkhawm goal bulah an 'danger' naw kha an chau pui ani deu tak.
Second-half tan ani hlim anthawka sawtnawte ah Sony Norde'n goal
a hung thun anthawk khan chu Mohun Bagan hai hnungtieng an ngha tanawh. Japanese
playmaker Katsumi corner pet chu mawitakin Manipur tlangval Dhanachandra in a head
lut a, chu zo ah Jeje'n Cornell Glen a backheel chu inkuoi ngâkin Poirei a vawitieng
ah a pet goal nawk a, Aizawl FC'n an tumruna suklangin an nawr nasa hle a, an
Japanese player Kinowaki chun hmunawl hmuin goal tieng a pet a, a lut teu hle. Field
vawitieng anthawka Sony Norde ball hung khal chu Bikramjit Singh in awlsam takin
alo pet lut nawka, hun tawp tawm ah Mohun Bagan Academy player Azarudhin Mallick
ball pass chu Jeje bawkin alo pet lut nawk anih.
Dan pangngaiin Aizawl FC fans hai ri a tha hle a, goal bul
hnaiah ball a um chun chu "A goal dawn e!" tiin an lo khek thup thup hlak,
player ha'n an suk goal theinaw kha chu pawi an ti thei hle.
Hero Federation Cup an dawm le inzawmin Mohun Bagan hai chun
kumthara AFC Cup a dingin an inpetkai a, Hero I-league champion Bengaluru FC hai
leh India aiawin AFC Competition ah an inkhel ding anih.