Aizawl, May 16, 2016 (VIRTHLI): Kum tina lo inser hlak angin vawisun khan Sinlung Hills Development Council (SHDC) huothawtna in I&PR Auditorium ah ursun takin Martyrs' Day inser a ni a. Hi hun hi Pu Hmingchungnunga, Chairman, SHDC le Pu Lalrelfela Sailo, Secretary, SHDC haiin an hmangpui a nih.
Martyrs' Day inserna programme a hin mipui țhahnem tak an fekhawma, hlaksakthiem hieng Nk Margy Lalremruati, Caroline Biakthansangi, Pu Lalramchan Amo, Pi Mary Sungte le Pu Lalrawngbawla Ralte haiin hnam hla hmangin mipui fekhawmhai an in awi.
Hi huna thuhriltu Pu Hmingchungnunga chun Hmar Martyrs' Day hi Hmar mipui hai ta ding chau nilo in SHDC area huom sunga mipui hai popo ta dinga ni pawimaw tak a nih a ti a, sawrkarin sum harsatna leiin SHDC budget tlawmte chau siem sienkhawm development chu thei ang anga fepui mek a ni thu hrilin MLA fund anthawka development nekin council in sinthaw a nei rawn lem a nih a ti a, SHDC chu elected council a hlangkai ding sawrkar thuneituhai leh inbiek mek a ni thu a hril bawk. "Council puitlingna ding hin Hmar mipui ei țhangtlangin ei inthuruol a țul tah takzet a nih," a ti bawk.
Thuhriltu dang Pu J. Laldinliana, President, Mizoram Hmar Welfare Committee (MHWC) chun Hmar mipui ta dinga ADC suolin pasalțha hai ramhnuoi an luta, sienkhawm ei inthuruolnaw leiin kum 20 chuong ei political issue infuk hlei thei loiin a uma, Hmar mipui tuorna ka en in lunglai ana takzet a nih a ti a, Hmar mipui, ramhnuoimi hai khawm nisien zaikhata ei luong a țul tah takzet a nih a tih.
Anni baka hin Pu L Rothanglien Khawbung, President, HSA GHQ, Pu J Chhanhima, Vice president, Hmar Inpui, Pu Lalrelfela Sailo, Secretary, SHDC le mi dang dang hai khawmin thuhrilna hun an nei.
