Hmarkhawlien, May 16, 2016 (VIRTHLI): Hmar Martyrs' Day Organising Committee, Hmarkhawlien huoihawtna hnuoia Martyrs Day prokram chu Hmarakhawpui mipui hai chun umni khamin an hmang, hun hnia the niin hunkhatna chu zing dar 7:00AM ah Good Morning hmuna Pu Lalthienghlim, President HNU Hmarkhawlien Unit keihruoina hnuoia hmang a nia, hi huna hin Pu Abraham L Keivom President, HNU Assam in thuhrilna neiin Martyr hai sunna hun nei a nih. Rev. Rev. Joe Sanghmingthang in tawngtaina neiin hunkhatna hmangzo a nih.
Hun hnina chu zing dar 10:00AM a tan ding ti a nia chu khawmuol that naw leiin 11:00AM a tan phak chauh a nih. Raw sur sawt leiin mipui an pungkhawm thei khawm ring a um naw lai zingin Hmarkhawlien mipui hai chun Martyrs Day ngaipawimaw takin raw sur chu pawisa lovin Hmarkhawlienn Playground chu mipui an bit mur a nih.
Hun hmasa tieng Tv Lalrawngbawl, Vice President, HSABV in mipui fekhawm hai lawmlutna a neia, Pu Lalthomlien Hmar, President, Hmar Inpui, Barak Valley in Flag keipharna hun a hmanga, Pasaltha Kuong zawnna Hmarkhawlien Va-Upa haiin an nei zawm nghal a nih. Kuong zawn ani laizing chun Pi Ralkapzo in "Mihrang anla kim naw, Ei hnam santu singin" ti hla thiem le mawi takin a sak.
Ram le hnam ta dinga inpe suok mek Tlangval hai ta dinga tawngtai pekna hun Pastor Lalzarlien (AGEI) in a nei a chu zo a chun organization tin le mimal in parthi inhlanna nei a nih.
Martyrs Day le inzawmin Key note address Pu L Thanmawi Pajamte in a peka, hi huna hin topic hran hran neiin thuhrilna hun a nei a nih. Pu. T Sangkhum, Adviser, HNU, Assam in "Martyr Day hmang nasan le ei hmang a thangkai na", Pu Abraham Keivom in "Hnam ta dinga Education pawimaw zie", Pu Lalringum Sanate, Inspector of Excise, Assam in "Thalai ta dinga games & sports", Upa Lalringkam V/Chairman Hmarkhawlien Val-Upa in "Tlawmngaina" hai an hril a nih.
Hunkarlak a hai Nk. Roslyn Malsawmkim, Nk. Maryjone Lalengvar, Nk. Debora Lalnunthieng, Nk. Lily Lalparmawi Joute, Nk. Laimawichawng, Nk. Ruthi Pakhuong, Tv. Lallukhum Neitham le Pu Gospel Pulamte haia inthawkin hnamhla mawi tak tak el ngaithlak a nih. Anni hai bak a hin Hmarkhawlien KTPI Solo Competition a Top 5 haiin "Hmatieg pan zai rel rawh" ti hla thiem takin an sak bawk a nih. Vengbuk tin deuthaw a'nthawkin hnam lam hai inentirna an neia, mipui mit a sukthlei hle a nih.
Hi hun a hin Refreshment inhnik tawk tak sem niin Pu R. Hnethang Organizing Committee Chairman in lawmthu hrilna a nei zovin Pastor Vanlalhriet WMCEI in hunkhar tawngtaina neiin hun suktawp a nih.
