Hmasawnna Thar | 01 November, 2015

Sawrkarin an hmatieng­a ‘Hiamkhaam’ thaw dingin Joint resolution an siem 

CCPur: October 21, 2015 (Inrinni) khan Joint Action Committee (JAC) Against Anti­Tribal Bills; Innpuis/Tribe Leaders le  State sawrkar palai (representatives) han  SP, CCPur Office­ah joint meeting neiin  joint resolution an siem.

    

Joint resolution an siem dungzui chun, Tribal movement fe mek le  inzawma buoina chingfel a hung ni theina dingin sawrkar le inbiekna nei a ni theina dinga thaw hmasak dinga JAC in an phut angin State sawrkarin  an hma thei ang tak (a thei chun November 2, 2015­ah) in Tribal  Customary Law hnuoia ‘Hiamkhaam’ a thaw ding; chu huna buoina chingfel a ni theina dinga inbiekna nei  ni/hun ding sukfel ding  ti a nih.

    

Joint resolution­a hin L.M. Khaute, IPS, Addl.  DGP(L/O), Manipur;  JC Ramthanga, IAS, Principal Secretary (Home), Manipur; H. Mangchinkhup, Chief Convenor, JAC; Paul Lalchhanhima, Convenor­ Asst. Secretary, JAC le Innpis/Tribe Leaders hai awion John Pulamte han hming an ziek.

    

JAC Against Anti­Tribal Bills; Camp: CCPur chun hi le inzawm hin tuta hmaa inhriettir ta angin buoina chingfel a hung ni theina dinga a hmasaa Tribal Customary law anga ‘Hiamkhaam’ thaw hmasa dingin zanikhan Manipur CM O.Ibobi kuomah inhriettirna an pek nawn nawk.

    

Zanikhan Mr JC  Ramthanga, IAS, Principal Secretary (Home), Govt. of Manipur;  LM Khaute, IPS, ADPG (Law & Order); L.Kailun, IPS, IG (Zone­II); Thangkhanlal Guite, IPS, IG (Zone­III) le KT Vaiphei, IPS, IG (Intelligence) hai chu CCPur­a hungin zani zantieng 2:00PM khan SP/CCPur Office chamber­ah meeting  an nei a, hi huna hin  Ms Mannuamching, IAS,  i/c DC/CCPur le TK. Simte, MCS,  Asst. Commissioner to DC/CCPur hai khawm meeting­a hin an thang. Hi  huna h in Manipur Assembly in  August 31, 2015 nia Anti­Tribal Bills 3 a passed hai leia Manipur tlangram district haia nuorna (agitation) fe mek bakah District Hospital/CCPur Morgue­a Tribal martyrs 9  hai ruong vui lova la um chungthu hai an hriltlang a nih.

Nurses regular  Exam zanikhan zo a nitah

CCPur: October 28, 2015 a inthawka CMO office campus­a Female Health Worker (FHW) Training School­a Bethesda School of Nursing school, Muolvaiphei a GNM inchuklai le  Female Health Worker Training school a ANM  inchuklai han  Regular Examination 2015 an nei tan chu zanikhan an zo tah.  Exam a hin Bethesda School of Nursing , Muolvaiphei a GNM 1st year student 40; 2nd year student 39 le 3rd year 33, an rengin student 112 an exam bakah Female Health Worker (FHW) Trainign School­a inthawk ANM 1st year  29 le 2nd year student 28, an rengin 57 exam­ah an thang.

National Unity Day a hmang

CCPur:  Zani October 31, 2015 kha Sardar  Vallabhai Patel piengchampha a ni le inzawma India ram pumpuia Rastriya Ekta Diwas  (National Unity  Day) a hmang a ni a. CCPur district a khawm Govt. Offices, Institutions le School haiah hi hun hi hmang a ni a, teachers le student han pledge tiemruolna neiin intiemkamna an nei tawl.

HNA in thusuok an siem:  Dr Amo inban dingin  an phut

CCPur: Anti­Tribal Bills 3 hai leia tulaia Manipur tlangram haia harsatna le buoina tlung mek le inzawmin Hmar National Army (HNA), GHQ Govt. of  Zalen Ram chun zanikhan thusuok an siem.  An thusuok a chun,  Dr Chaltonlien Amo chu HAC Chairman a nina angin Manipur Assembly in  Anti­tribal  Bills an passed  huna a dodal ngamnaw leiin  Bill passed naa mawphurtu a nih tiin an intum a; Hieng bills 3 hai leia buoina nasa tak a um lai zing  ama thiemthu a la hril hin  a constituency le tlangmi hai nekin a MLA nina a la ngaihlu lem ti a sukchieng a nih; Dr  Amo hi Hmar hnam sunga mi a nina angin HNA chun a (Dr Amo)  thil suksuol hi a  mawphurnaa ngaiin  Manipur­a tribal hnam tum tum hai, a bik takin  Bills 3 hai leia Tribal Martyrs sungkuo hai le hliemna tuok  hai chunga HNA chun  ngaidam an hni a, HNA chun Tribal hnam tum tum hai  Pathien  hminga ngaidam dingin a ngen.

       

HNA chun  Dr Chaltonlien Amo chu Martyrs hai Rs. 1 lakh seng ralna pe ding le anti­tribal bills leia hliemna tuok hai Rs. 10,000/­ seng pe dingin an ngen a; ama mimal ngeiin ATSUM, UNC, KIM,  ZC, HI, MPC, KIC le JPO, JAC & CCPUr district­a Women organisation hai po po kuomah ngaidam inhni ding­ Rev. Chawnga Memorial Chapel­ah mipui kuoma (public apology) ngaidam inhni dingin an ngen bawk. 

     

Hieng  an thil ngen hai hi November 12, 2015 chena sukpuitling ding; Mipui hmaa ngaidam an hni  hmain HAC Chairman a nina le MLA a ninaa inthawka inbanna a chunga zieklang tribal organisation hai hrietpuiin  Asembly Speaker kuomah inbanna lekha a pek ding; An thil phut hai hi a sukpuitling naw chun Hmar hnamin boycott an ta, a chunga thil a lo tlung khawmin ama in mawphur a tih; HNA chun hnam tin hai inrem taka an um a nuom tiin thusuok a chun an zieklang. HNA in thusuok an siema hin LZ  Changsan, Secy. Inf.& Publicity, HNA in hming a ziek.

Chavang Kut a nihnina hmang;

CCPur:  Tuibuong Peace Ground/CCPur­ah November 30, 2015 a inthawk Chavang Kut Committee huoihatnaa “ Celebration of Brotherhood” ti thupui hmanga Chavang Kut 2015 hmang tana um chu zanikhan a ni hnina sunzawm a ni a. Zani 10:30AM khan Rev. Dr Holngam, KBC in tawngtainain hun a hawng a, Zalen  Gam Choir le mi dang dang han hla an sak tawl.

      

Mishing, Khiamniungan; Yimchunger han hnam lam  inentirna an nei; Hi huna PS Haokip in thu a hrilnaa chun, ei tawng hai inang naw sienkhawm tribe 43 hai hi mihran ei um naw a, pi le pu­a inthawk ei nundan le  khawsak dan inang, ei umna hmun dungzuia a hrana indang chau ei nih tiin a hril.

     

Zantieng 1:30PM khan Games & Sports Committee inrawinain hun hmang a ni a; Kangkap, Kangchoi, Suhhe, Suhkho, Kangtalai, Sielkal, Gothei Tuipoh,Thalpi kap, Songse, Khau kiloito le Baikeng inkhelna hai  nei a nih.

     

Chavang Kut hi vawisun a ni tawpna tak hmangin a tumtiek ta ding a nih. Vawisun prog. a chun Rev. Dr S. Chongloi in tawngtainain hawng a ta, Thangkhosei Haokip, President KIM in Souvenir hawng a ta; Tripura Kuki;Tedim Chin;Kom Cultural Troupe le Singpho Kachin han hnam lam inentir an ta, PS Haokip, President KNO in thuhrilna nei a ta, Singpho Kachin inrawinain Mass Dance um a ta,  Evan. Hnamtinkhum in tawngtainain Kut hi khar a tih.

Training on Pentavalent & IPV nei

CCPur: District Task Force­Immunization (DTF­I) huoihawtnain zani 10:00AM khan Synod Hall, IB Road, CCPur­ah ASHA Facilitators le Town area sunga ASHA workers han Training prog. on Pentavalent & IPF an nei. Hi huna hin Dr V.C. Pau, DFWO; Seiboi Mate, Dist. Program Manager, NHM le Vung Mary, Dist. Community Mobiliser han slide show hmangin inchuktirna an nei.

JPO kutah ralna Rs. 11,000/­ a lut

CCPur: Zanikhan  District Hospital­a JPO kutah mimal le organisation 4 han Tribal martyrs hai ralna le hliem hai thangpuina ding Rs. 11,000/­ bakah Maibal pum 23 le puon 9 an inhlan. Zanita  ralna le thangpuina petuhai chu­ Benjamin Kilong of Tuibuong  in Maibal  17; Thawngzachin of Canan Veng, New Lamka in maibal 6; Zogal Lei Pawlpi (The Zou Arts & Cultural Troup) in  Rs.2,000/­ le  KBC Gambih No.16 , Chandel Dist in  Rs.9,000/­  le Puon 9 an nih. November 2, 2015  a District Hospital Morgue­a thingpui inlumtu ding chu  KKL ning an tih.

MPCC in zanikhan PM hlui Indira Gandhi thi champha vawi 31-na an inser;

JAC  CCPur le sawrkarin inbiekna an nei vat el ta thei: Gaikhangam

Imphal: Manipur Pradesh Congress Committee (MPCC) chun zanikhan  Congress Bhavan, Imphal­ah India Prime Minister hlui Indira Gandhi thi champha vawi 31­na an inser. Hi huna hin  Chief Minsiter O.Ibobi Singh; Dy. CM Gaikhangam hai bakah ministers le MLA hai le mi dang dang an thang. Hi ni hi Rashtriya Sankalp Diwas­a hmang a ni a,  Indira Gandhi  inzana pein a thlalak­ah  par inhlanna an nei tawl.

     

Dy. CM  Gaikhangam chun,  India Prime Minister hmasa tak Pandit Jawaharlal Nehru kha  khawvela visionary leaders laia pakhat a ni thu, Nehru ang bawkin a naunu Indira Gandhi khawmin ei ram ta dingin a hringna an hlan  a, khawvela nuhmei ram thuoitu ropui lai a thang ve thu  chanchinbumihai kuoma a hril.

     

Mr Gaikhangam chun tuta inthawk ni tlawmte hnunga Joint Action Committee/CCPur le sawrkarin  inbiekna an nei el thei thu hrilin mipui hmakhuo ngainain Economic Blockade thaw lo dingin JAC hai a ngen. Bandhs, blockades le tharum insuona hai hin ei harsatna chingfel naw ni a, inbiekna neia ei harsatna le buoina hai hi chingfel thei  ding chau a nih tiin a hril.

     

Hieng laizing hin JAC­CCPur in Chingjol­Tuimai le CCPur­Silchar via Jiribam lampui siem ding tia  an puong le inzawma chanchinbumihai indawnna dawnin, Gaikhangam chun, lampui siem chu thil tha tak a nih, sawrkar thangin lampui siemna tukhawmin an sukbuoi ding a ni nawh tiin a hril.

      

Churachandpur district­a thil tlunga thi hai ruong vui lova a la umna chungthua chun, ruong hai  sawrkar mawsiet lova vui ding a nih; sawrkar mawsiet na ding san a  um nawh, chu nekin ei harsatna hai inbiekna neia chingfel tum lem ding a nih tiin a hril.

Russia vuongna Sinai tlang­ah  tuoksiet  a tuokp; mi 224 an thi

Cairo: Russia vuongna  passengers Flight 7K9268 chu Sinai tlangah  tuoksiet tuokin a tla thla  tiin Egypt Prime Minister Sharif Ismail in  a puong. Hi vuongna hi  Egypt­a Red Sea resort town Sharm el­Sheikh a inthawk zani 03:53 GMT ( 5:51 local time) a kha vuongsuok, a vuongsuoka inthawk  minutes 23 hnungah biekpaw thei lova um  a ni a, Vuongna tla thla  hlek khawm hmu a nih.

     

Vuongnaa  hin  naupang 17 thangin  passengers 217 le a sunga thawktu (crew member) 7 an chuong a nih. Hi vuongnaa chuong hai hi  Russia mi vawng an ni a, a sunga chuong hai hi an thi vawng ring a nih tiin  Egyptian official thusuok chun a hril.

RIMS staff han Vigilance  Awareness Week

Imphal: Vigilance Awareness Week­2015 hmang mek le inzawmin zanikhan Regional Institute of Medical Sciences (RIMS), Imphal chun Prof. S. Rita Devi, Director, RIMS, Imphal inrawinain Vigilance Week function an hmang ve. Hi huna hin Prof. S. Rita Devi inrawinain officials le staff han  ringum tak le inlangtlang taka sin thaw  dinga intiemkamna an nei tawl.  Hi huna hin Prof. M. Amuba Singh, Medical Supdt. RIMS; Y. Rajendro Singh, Dy. Director (Admn), RIMS; E. Debendro Meitei, Chief Account Officer/Financial Adviser, RIMS; Principal, Dental  le College of Nursing hai bakah Faculty le HoD, RIMS hai khawm an thang tawl.

DIPR Photo Contest­Exhibition zo a ni tah

Imphal:  October 29, 2015 a inthawk Directorate of  Information & Public Relation (DIPR), Govt. of Manipur huoihawtna hnuoia Moirangkhom, Imphal hmuna ni 3 sung aw Photo Contest­cum­Exhibition neia um chu zanikhan  zo a ni ta a, hi hun sung hin school tum le college hran hrana student han  thlalak pholanga um hai an va en tawl.

     

Ratan Luwang, Vice President, AMWJU chun, DIPR huoihawtnaa Photo contest­Exhibition nei huna thlangsuok mi 20 hai ta dingin DIPR, Govt. of Manipur le Film Division, Govt. of India hai thangruola huoihawtnain sawtnawte hnungah film making workshop ni 9 sung aw nei a ni ding thu a hrilin AMWJU chu hi workshop­ah media partner a ni ding thu a hril.

Assam Rifles han KYKL cadre 1 an man

Imphal: 2­Assam Rifles chun October 30, 2015 khan  Thoubal Police le thangruola Langathel Khunou hmuna dappui an thawnaah KYKL cadre SS Cpl Pukhrambam Inaobi Meitei @ Likla meitei (29) s/o (L) P  Tomba Meitei of Langathel Mamang Leikai an man a, Kakching Police kutah an peklut. SS Maj Santa Achouba hnuoi um a niin mana um pa hi an puong bakah Tanan Camp, Myanmar­a kum 2007 a training zo; SS Maj Santa Achouba thupek anga Thoubal district sunga  schools, Colleges, teklei siemna le mipui kuoma sum a dawl hlak thu an puong bawk niin zanita PRO, Assam Rifles thusuok chun a hril.

Grenade pakhat hmu; protest an nei

Imphal: Zanikhan  Mr Naorem Pakison (40) of Thongju Part­II compount sungah KCP Poirei Meitei  han Grenade an va sie a, hi thil tlung dodalnain zanikhan Kymngei sit­in­protest an nei. Naorem (o) Thaja w/o Pakison chun, bomb hi an naupa upa tak kum 11 mi in zing dar 6:30 vela an in a sukfainaa va hmu niin a hril. Grenade a hin an in bula cheng le Lourenbam Enterprise neitu  Lourenbam Ramesor Meitei hming ziekna lekha  an bel nia  hril a nih.

Joint Monitoring Unit an indin

Imphal:  Manipur College­a Students Union Election 2015­16 um ding le inzawma zani hmasa laia   College register le election  le inzawm documents hai mi thenkhatin an lakhmangna thuah Students’ Monitoring Cell le Monitoring Committee han inzawmkhawmin Joint Monitoring Unit an indin.  Joint Monitoring Unit hi SP Imphal West inrawina hnuoia indin a ni a, Student Union Election ding le inzawma pawisa sem, voter inthuoi, bufak siem, camping, student hai I­card lakkhawmna hai vengin an enkai ding a nih. Election thienghlim taka nei a ni theina dingin student hai thlawp seng dingin an ngen.

Bihar­ah 4th phase Assembly election

Patna: Security khau tak hnuoiah vawisun hin Bihar Assembly Election a phase 4­na District 7 –a Assembly Constituencies 55 haiah nei ning a tih. Constituencies 43 haia chun zing dar 7 a inthawk zantieng 5PM chen vote thlak thei hun hawng ning a ta, Naxalites hai  hratna constituencies 4 haia chun zantieng 3PM chen le constituencies 8 haiah zantieng 4PM chen vote thlak theina hun hawng ning a tih.

    

Vawisuna 4th phase election­a hin voters vaibelsie 1 le  nuoi 47 an um a, Candidates 776 an um bawk. Candidate hai laia 57 hai chu nuhmei an nih. Election buoina um lova thienghlim le fel taka nei a ni theina dingin venghimtu  security forces 20,000 hmang ning an ta, polling booth tinah Central para­military forces hai an duty ding bakah security thuo thum sie ning an tih. Inthlangna ding District 7 hai laia constituencies 5 hai chu sensitive a ngai an nih.

IPS training zo 80 hai Engineering graduates

Hyderabad:  Sardar Vallabhai Patel National Police Academy (NPA), Shivarampalli hmuna Indian Police Service (IPS) Officer training  nei, zanita training zo hai laia 80 hai chu Engineering Graduates an ni a, 10 hai chu Medical graduates an nih. Training zo hai lai hin IPS Officers 141; Maldives, Nepal le Royal  Bhutan haia foreign officers 15 an thang tiin NPA Director Aruna Bahuguna chun a hril combat hai neipui an nih tiin a hril.Best all­round IPS probationer pasal­ah Parthrasinh N. Gohil of Gujarat cadre chu Prime Minister’s Baton le  Home ministry Revolver bakah Mehta Cup inhlan a nih. Nuhmei a chun  Bhavana Gupta of West Bengal cadre kuoma inhlan a nih.

Lalu chungah FIR 2 file

Patna/Muzaffarpur: RJD Chief Lalu Prasad chu Prime minister Narendra Modi le BJP President Amit Shah hai chunga tawngkam mawilo a hmang leiin FIR pahni file khum a nih. Lalu hin BJP President Amit Shah chungah ‘narbhakshi’ (cannibal) ti le ‘pagal’ (mad) ti tawngkam a hmang leiin Sachivalaya Police station, Patna ah FIR file a nih tiin Addl. CEO, R. Lakshmanan chun a hril. Chun, Lalu hin Kanti hmuna election rally nei huna Shah le PM Narendra Modi hai chunga ‘narbhakshi’ (cannibal) le ‘brahmpishach’ ti tawngkam hai a hmang leiin Kanti Police station­ah FIR file khum a nih tiin SHO Ganti Thakur chun a hril.

Rashtriya Ekta Diwas hmang; PM in ‘Run for Unity’ a vailiem

New Delhi: India ram zalenna dinga thaw hlawk takel ‘Iron Man of India’tia ko Sarsar Vallabhai Patel piengchampha vawi 140­na le inzawmin zanikhan Rashtriya Ekta Diwas hmang a ni a, hi le inzawm hin  zanikhan PM Narendra Modi chun Rajpat hmuna ‘Run for Unity’ a vailiem bakah PM hin Sardar Vallabhai Patel lim­ah par inhlanna a nei. Hi huna hin Home Minister Rajnath Singh; Urban Development minister Venkaiah Naidu; Delhi Lt. Governor Najeeb Jung le Delhi CM Arvind Kejriwal hai khawm an thang. Rajpat hmuna hun hmangnaa hin school le College students hai bakah paramilitary forces hai thangin Unity pledges tiemruolna PM hin an rawi bawk.

CCPur­a inthawk  Final trial a thang ding mi 7

CCPur: India mikhuolnaa Under­17 World Cup 2017 um ding le inzawma November 3 le 4, 2015 haia Artificial Turf ground, Khuman Lampak, Imphal Final Trial Cum­Selection ­a thang thei dingin   AMFA chun players 33 a thlangsuok a, hienghai lai hin CCPur district­a inthawk mi 7 an thang.  Chuonghai chu Jackson (defender­Munpi); Peter Khumrolien (defender­Rengkai); Lunkhosem Haokip (Defender­P. Geljang); Thuambiaklal (midfielder­ Hq. veng); Jangminlun (midfielder­B. Aizalon); Thangkholal Haokip (Forward/striker­ Thingkangphai) le Khaiminthang (forward/striker­ Old Gelmol) hai an nih. Trial nei huna an inkhelna thuomhnaw chawia va thang dinga inhriettir an nih.

VAWISUN THUPUI

Khelinhlipna hi Lalpa ngaia chun tirdakum a ni sih a. A thurawn ruok chu mi tluong kuomah a um. Lalpa tawngsie chu mi khawhlo inah a um a, Mi fel chengna ruok chu mal a sawm hlak. Thuvarhai 3:32­33

Editorial

Good Governance ei mamaw

Ram roinrelna tha le fel ‘Good Governance” chun ram hmasawnna an tlun a, Bad governance ruok  chun buoina le sietna an tlun hlak. Sawrkarna tha chu thutlukna tha siem le sukpuitling el a ni naw a, thutlukna indik siem el khawm a ni chuong bawk naw a; mitin that tlangna dinga mipui inlungruolnaa thutlukna indik siem le sukpuitling chu a nih. Sawrkarna tha chun inlangtlang takin sin a thaw hlak. Dan le dun zama um hai inzana a um ngei ding; inthlier hrangna a um ding a ninaw a, mitin chunga inangtlang taka thil thaw a ni ding a ni a; thutlukna siemna kawngah  lunginruolna (consensus)  a um ngei ding; mipui hai thutlukna siemnaah an thang ve ngei ding­ a rel naa a an thang naw khawm in,  passed le hmang a ni hmain thutlukna siema um hai chu kim chang takin mipui kuoma pe a, an ngaidan le ditdan hril theina ding huntha pek an ni ngei ding a ni bawk. Sienkhawm hieng thil hai hi Manipur sawrkarin a thaw ngai nawh. Hun tam takah mipui dikna le chanvo hnawchepa thutlukna siemin thawluina hmangin a thuneina a hmang rawp hlak. Hi lei hin a buoiin ei buoi chum chum el a nih ti inla ei hril suol taluo ring a um nawh.

     

Tukhawm hin Nitin Chanchinbu phek hmatieng hai hluo rawn taktu chu mipui nuorna, protest hai khelah Economic Blockades le Bandh/General Strikes hai an nih. UNC chun November 2, 2015 a inthawk ni 10 sung National Highways hai bakah National le state projects sin thawna hai po po khar dingin thusuok an siem a; Jiribam District Demand Committee (JDDC) chun November 3, 2015 a inthawk darkar 28 Jiribam Bandh thaw dingin an puong bakah  JAC Against Anti­Tribal Bill thangin Bandh le Economics thaw dinga insingsa zing pawl iemanizat an um zing bawk a, Sadar Hill District Demand Committee hai nuorna le nuorna dang dang state sungah a tlung zing bawk a nih. Tuta hmaa Manipur­a Naga cheng han an delna ram po po huoma Administration hran an ngen dam, tuta Tribal movement fe meka Tribal hai ta dinga Separate Administration ngenna  a hung intlunna san hai ei ngaituo chun  ei state­ah Good Governance a umnaw lei a nih ti chieng takin an lang. Sawrkarin Hill districts hai a ngaitha leia hung inirsuok vawng an nih.

     

JCILPS han Manipur­a ILPS zam dinga ngenna an siem le inzawma Manipur Assembly in August 31, 2015 nia Bills 3 an passed hai leia Manipur tlangram biel haia dodalna  nasa tak hung  um le mi 9 zetin hringna an chan pha bakah Tribal Movement ei fepui nasan khawm hi ‘Good Governance” a umnaw lei a nih. Manipur Assembly in Bills 3 a passed ding khan huop zau takin Manipur mi po po, phaimi hai chau ni lovin tlangmi hai khawm rawnin, chu zova thutlukna siemin passed chau sien chu tuta ei buoina hi tlung naw nih. Mipui hai a rawn naw el chau khawm ni lo, Hill Areas Commitee tak ngiel khawm a rawn naw a ni a ni kha!. Bills hai passed a ni hmain Bill sunga ieng ieng am an ziek a ti mipui hrietin a puongzar naw a;  tlangmi hai ta dinga thil pawi ding ieng khawm a um nawh tiin a hril mawi a. Sienkhawm  mi thenkhatin an lo hmu ruk a, tlangmi hai le tlangram ta dinga thil pawi tak an tlun thei ding zie hrietchieng a hung ni leia tuta movement hi ei fepui a nih. “Communication gap’ lei a nih’ a ti ruok hi chu an dik thawkkhat hle. Communication gap um leia hi chen hi thlung ei ni hrim a nih.

     

State sawrkarin thil a thaw hai hrim hrimah inlangtlang taka thaw a um mang naw a, a ruk a rala thaw vawng an ni el khelah ‘tlangmi le phaimi hai unau ei nih’,‘ state sawrkarin tlangram le phairam mi hai thlierhranna nei lovin  hmasawnna sin  khuongruol taka thawin fepui   a tih’ ti zing sien khawm  tlangram biel le phairam haia hmasawnna sin thawna kawngah  tlangram biel hai ngaitha ei  nizie hi hmuthel ruol a ni nawh. Tlangram biela hmun ruok tam tak, mipui khawma an lawmlut le ram khawm pek an inhuom laiin phairam biel, mipui tam leia an tarna hmuna Institution tha le lien hai po po ram umnaw sa sa, thawluina hmanga ram a lak hai leia mipui ning innuor han helna le protest nasa tak an nei zing pum khawmin phairam biela  an thut vawng a. Hieng hai po po ngaituo khawm hin sawrkar hin hill district hai a ngaitha zie chieng taka hmu thei a nih.

            

Ei ramah Dan inzana a um naw a, Ministers, MLAs, Officer le milien be thei deu hai chu Dan chunga leng vawng an nih. Dan siemtu hai  bawse hmasatu an ni nawk pei a, Corruption hlak chu ei nitin nundan a ni tah. Corruption nasatak um  zing siin Corruption leia  hremna tuok hriet ding an um ngai naw a, corruption chu corruption  bawkin an tlansuok nawk hlak. Hi lei hin Corruption chu re nekin a zuol pei a nih. Ei rama good governance a um theina ding hin mitinin chanvo ei nei lai zingin  sawrkarna siemtu le thuneitu hai chunga mawphurna an nghat lien hle, a san chu motor khaltu (driver) an ni leiin. Good Governance ei rama a um hma chun ei buoina hai hi chingfel ni ngai naw ni a,  ei ramin hma sawn ngai bawk naw nih. Hi lei hin ei ramin hma a sawn ve theina ding chun Good  Governance hi ei mamaw a nih. Chu ding chun mipui han ei aiaw ding ei thlangna kawnga fimkhur ta inla nuom a um.