Hmasawnna Thar | 05 July, 2015

Tuolsung

Dr. Chaltonlien Amo in inpawlpuina a nei

-LRS Puruolte | Photo: Lalruotlien Duhlian

CCPUR: July 4, 2015, 12:30 PM khan Pu, Dr. Chaltonlien Amo Chairman, HAC; Govt. of Manipur le MLATipaimukh A/C chun Hmar MDC thar mi 4 hai, MDC Election 2015 a Candidate hai, an hnungzuituhai le hnam sunga pawl tum tum a thuoitu le mi pawimaw tak tak hai chu ama In, Nehru Marg, CCPur hmun ah inpawlpuina le bufakpuina a nei. Hi hun a hin Pu Dr. Amo, MDC 4 ­Pu Lal Hossan MDC Vangai; Pu Lalhmangpui MDC Pherzawl/Parbung; Pu Lalhrillien MDC Saikot, Pu Lalditsang MDC Senvon, Dr. John H. Pulamte Gen. President, Hmar Inpui le mi dang dang haiin thuhrilna hun an nei.

    

Dr. Amo chun MDC Election huna hlawtlingna changhai le hlawsam hai chu an thil tuok  hrietthiem a tul zie a hril a. Ama ngei khawm a hlawsam chang a lo um ve hlak thu hrilin, lunghnuol el lo a, ram le hnam tadinga an pek ta laklaw a ni leiin a bei fan fan thu hai a hril a. Politics khel hi football pet ang a ni a, Election huna hai ei lo inpetna pal a ni khawmin Election zo a chun inrem takin a tling le a tling naw hai um tlang nawk ei tiu. Hmatieng ah thangtlangin ei ram le hnam tadingin hma la tlang ei tiu tiin ngenna a siem. A biel sunga a hmalak mekna hai a hrilna a chun Parbung H/S chu Class – X Pass an tam le result a tha chun Higher Secondary a hlangkai a awlsam ding thu, Training Centre indin tum a ni thu, Electric tlangram biel a tlung vat le tukum sung ngeia a var ngei dan ding, lampui siem mek a ni thu le ruosur leia sin la chawlsan a ni thu hai, Tuiruong leilak bawl mek a ni thu le a dang dang a hrillang sa bawk. Chu ruol chun mipui haiin lo thlawp a, sukbuoitu ni lo dingin a ngen bawk.

    

Hi hun a hin mi tamtak lo buoina hrilfiena siemin Pu Lal Hossan MDC, Vangai chun Independent a ngir MDC 17 haiin HPA an indin chu Sawrkarna siem thei an ni ve dan hrilin Central a NDA amani UPA in sawrkar an siem thei ang a ni ding thu a hrillang. Mipuihai chun lo ringzo dingin a ngen bawk.

    

Hienganga Dr. Amo in Pa chan changa hun a buotsaina thu ah hi hun a fekhawmhai chun inpakum an ti hle thu, ama hmalakna leia Saikot khawm Sub­Division dinga puonga hung um thei a ni thuhai le a thilthaw that tamtak an inzawt tawl. Hmatieng peia khawm hiengang hun hi um rawp sien an nuom thuhai hi hun a fekhawm hai hin an hrillang tawl bawk. Rev. Rokhum Joute in tawngtainain hung a hmang zoin hun hmang zo le thlaithleng awt tlang a nih.

Labour pakhat ama le ama an that

CCPUR: 80 RCC hnuoia Maz (labour) sinthaw Rajesh Ram (35) s/o Lethuram of Kutuakona village, Gumla district, Jharkhand chu July 2, 2015 zantieng 1:30PM vel khan Thanlon Police station­a inthawk km. 7 vela hla Zotung BRTF Camp­ah Blade hmangin ama le ama a phing­ah an at a, 850 AMIR/80 RCC hmuna first aid pek a ni a, sienkhawm damzo lovin zantieng 4.00PM khan a thi. Thanlon Police chun a ruong hi District Hospital Morgue­a hung phurin Postmortem thaw a ni a, hi zo hin 80­RCC a Anup Sherpa, AEE (Viv) kutah a ruong hi an inhlan. Hi thina thua hin Police chun UD Case No. 1/TLN­PS 2015 U/S 174 CrPC an registered.

N. Lamka West MDC rawiin social work

CCPUR: July 3, 2015, 9:30AM a inthawk khan 16­New Lamka West MDC C.T. Lian inrawinain biel mipui han social work neiin lampui siet zuolna hmun hai siem­thatna sin an thaw. Lampui siemnaa hin tripper motor 4 le Shaktiman Truck 1 hmang a ni a, lampui inkhur le sietna hai lungphit an sung. C.T. Lian chun sawrkar­a inthawk fund um hun ding nghak thei a ninaw leia lampui siet zuolna hai siemna sin an thaw niin a hril. Hi huna mipui hai fak le dawn ding mi inphal han an thawlawm.

DTO in June thla sung Revenue Rs. 11, 13,952/­

CCPUR: District Transport Office(DTO)/CCPur chun June 2015sung khan Revenue Rs. 11,3,952/­ an hmu a, April­June, 2015 thla 3 sunga revenue an hmu chu Rs. 19,58,797/­ a tling phak a, Challan katin an peklut.

    

Chun, DTO CCPur in June 2015 thla sung khan motor 167 an registered a, hienghai lai hin Truck 1; water tanker 1; bus 1; Auto 2; Eco Van 4; Car 14; Jeep 7; 2­wheeler (Bike/Activa) 136 le other 1 a thang. April –June 2015 thla 3 liemta sunga motor registration an thaw chu 444 a tling phak a, hieng hai lai hin Truck 4; water tanker 1; bus 1; auto 11; Eco Van 5; Car 40; Jeep 12; 2­wheeler 368 le other 2  a thang.

MZP Chiengkawn in Quiz Competition

CCPUR: MZP Chiengkawn Branch chun zanikhan Chiengkawn­a ESC Secretariat­ah Class VIII­XII inkar inchuklai hai ta dingin Quiz Competition an buotsai. Hi competition­a hin Don Bosco Hr Sec School a inthawk team 4, Young Leaners School a inthawk team 1; Rengkai Hr Sec School a inthawk team 1; St Paul’s Institute a inthawk team 1; Saviour Public school a inthawk team 1; VK tawna College a inthawk 1 an thang. Lawmman chu July 11, 2015 nia Chiengkawn Community Hall­a Social Gathering­cum­Prize distribution huna sem ning a ta, First, second le third han lawmman Rs. Rs. 2500 + Certificate; Rs.1500 + Certificate le Rs. 1000 + Certificate dawng an tih.

Social Welfare Dept. enkai dingin a ngen

CCPUR: Action for Women & Child Advancement (AWCA) le Muallum MDC Ms. Grace Zamnu chun, kum 2012­14 sung a Financial Assitance & Support Services to Victims of Rape thuah Dist Criminal Injuries Relief & Rehabilitation Board  chun nuhmei naupang 8 hai ta dingin application a peklut a, hi le inzawm hin March 29, 2915 khan bank account hawng a nita a, sienkhawm tuchena sum an la hmu nawna thuah Social Welfare Department chu enkai dingin a ngen.

Malaria Positive 10

CCPUR: District Malaria Department chun June, 2015 thla sung khan damnaw mi 2100 hai thisen lain an enfel a, hienghai lai hin Malaria Positive 10 an hmu a, hi laia 8 chu Malaria PF le 2 hai chu Malaria PV an nih. June 2015 thla sung Malaria leia thi official record­ah an um nawh.

Orientation training

CCPUR: July 6, 2015, 11AM khin Dist. Health Society, CCPur huoihawtnain CMO Conference Hall­ah One Day Orientation Training on HMIS/MCTS um a tih. Hi huna hi resource person in Seiboi Mate, DPM, NHM, Sasang Hauzel, BDM le Niko Singh, BDM hai thang an ta, CHC Parbung, PHC Senvon, PHC Patpuihmun le PHC Sibapurikhal hnuoia nurse (regular & contractual) hai training a hin thang an tih.

Social Welfare Dept. enkai dingin a ngen

CCPUR: Action for Women & Child Advancement (AWCA) le Muallum MDC Ms. Grace Zamnu chun, kum 2012­14 sung a Financial Assitance & Support Services to Victims of Rape thuah Dist Criminal Injuries Relief & Rehabilitation Board chun nuhmei naupang 8 hai ta dingin application a peklut a, hi le inzawm hin March 29, 2915 khan bank account hawng a nita a, sienkhawm tuchena sum an la hmu nawna thuah Social Welfare Department chu enkai dingin a ngen.

Headline

Civil Service Exam 2014 final result puong:

Pakhatnaa inthawk 4-na chen nuhmei; topper nu piengphunga ruolbanlo

NEW DELHI: Union Public Service Commission (UPSC) huoihawt, India rama Competition insang taka ngai Civil Services Examination, 2014 final result chu zanikhan puong a ni a,  topper chu Ms Ira Singhal a ni a, nuhmei vawng Renu Raj, Nidhi Gupta le Vandana Rao hai chu pahnina, pathumna le palina in an thang. A pangana chu Suharsha Bhagat a nih. Tukum­a topper nu hi piengphunga ruolbanlo a nih.

    

UPSC huoihawtnaa Civil Sevices Examination, 2014 final result puong a hin candidates 1,236 hai chu IAS, IFS, IPS le Central Service dang dang haia thawk dinga thlang an ni a. Hieng hai hin General ah mi 590, Other Backward Classes (OBC) 354, Scheduled Caste (SC) 194 le Scheduled Tribe 98 an thang. Eini tlangmi tiengpang ruok chu tu tum hin a tling an um hriet a ni nawh.

    

Hlawtingna chang hai laia 180 hai chu Indian Administrative Service (IAS), 32 hai Indian Foreign Service (IFS), 150 chu Indian Police Service (IFS), 710 chu Central Services Group ‘A’ le 292 haiGruop ‘B’ services dinga recommended an nih. Tuta tum hi UPSC in personality test/interviews a nei zo ni 4 chau hnunga final result a puong vawikhatna a la nih.

    

August, 2014 khan India rama centres tum tum 2,137 haiah preliminary exam nei a ni a, candidates 4.51 lakh an exam a,hienghai laia 16,933 chu main exam­a thang thei dinga thlangsuok an ni a, Mains exam December, 2014 a nei huna khan candidates 16,286 an thang a nih. Mains exam hi March 13, 2015 khan nei a ni a, hi taka hin candidates 3,308 hai chu personality test­a thang thei dinga thlang an ni a, personality test a hi April 27­June 30, 2015 sung khan nei a ni a, mi 3,303 an thang a nih.

    

Topper Ira Singhal hi physically handicapped niin Delhi a cheng le Indian Revenue Service (Customs & Central Excise) Officer a ni a, a pahnina Renu Raj Kerala mi Doctor sin thaw lai zing a nih. Nidhi khawm hi Delhi mi tho le IRS officer a ni a, a pathumna Vandana Rao hi Delhi mi le a pangana Suharsha Bhagat hi IRS Officer a ni bawk.

    

Topper Ira Singhal chun, thaw tha kan ti a, sienkhawm topper em chu ni kan ring phak nawh tiin a hril a, a hlawtlingna a lawm hle thu a hril. IAS Officer nia Women and child welfare tieng le piengphunga ruolbanlo (differently abled) hai ta dinga thil iemani tak thaw a nuom thu a hril.

    

Ira hi Anita le Rajendra Singhal hai nau neisun a ni a, BE (computer engineering) le MBA degree nei a nih.

KRF cadre pakhat man

IMPHAL: Army­a Red Shield Division chun July 1, 2015 khan Senapati district­a Kangpokpi bazar area a dappui an thaw naah KRF cadre Cherry Tuboi (29) s/o Seilam Tuboi of Gopibung Village, Senapati district an man. Tuboi kuta inthawk hin demand letter (blank) 4, Mobile phone 1 le Airtel SIM Card an man sa a, Kangpokpi Police kutah an peklut.

Bomb hmu a nih

IMPHAL: Zani 9:30AM vel khan 45 Assam Rifles han Sagolmang Police station huop sunga Keibi Heikak Mapal hmuna lampui sirah Rocket launcher bomb an hmu a, Manipur Police­a bomb Disposal squad han va lain zani zantieng 1:30PM khan thil tawkpawi nei lo dingin Keibi  Ching hmuna an sukpuok.

Braille machine Rs. 63.17 lakh man hmang lovin

IMPHAL: Manipur Social Welfare Department hnuoia mitdel student hai lekhabu ding sutna dinga Rs. 63.17 lakh senga kum 2009 a Braillo Noray AS kuoma inthawka inchawk  Braille 440 SW Braille Printer machine chu tuchen hin hmang lovin a la um zing niin Comptroller and  Auditor General (CAG) of India report chun a hril. Hi Machine hi Government Ideal Blind School a mitdel inchuklaihai lekhabu ding sutna dinga May 2013 a inchawk, August, 2009 khan  hung phurtlung, machine hmang thiem tuchena an la um naw leia sawr lova la um niin CAG report chun a hril.

66th Vana Mahotsava hmang

IMPHAL: Zanikhan Maharaja Gambhir Singh’s Samadhi, Canchipur hmuna 66th Vana Mahotsava hmang a ni a hi huna hin Manipur CM O.Ibobi Singh, Forest and Environment minister Th. Debendra, Langthabal MLA Karam Shyam, Chief Secretary P.C. Lawmkunga, Principal Chief Conservator of Forest Bala Prasad hai an thang a, Vana Mahotsava le inzawm hin thingkak phunna an nei.

Mizoram­ah thla tin mi 9 an inthat

AIZAWL: New Life Charity Society (NELICS) NGO Chairman Dr Zawmsanga Sailo chun, tukum January a inthawk June chen thla 6 liemta sung khan Mizorama chun mani le mani inthat 52 an um a, thla tin mi 9 pei anni le anni an inthat ang a nih tiin zanikhan a hril. Mani inthat tam tak chu lungril sawlna lei a nih tiin a hril. Mi 52 i nthat hai laia 19 chu nuhmei an ni a, mani inthat hai laia upa tak chu kum 63 mi le a naupang tak chu kum 13 mi a nih. Mihriem nuoi 10 vel chau umna Mizorama hienga mani inthat a tam hi ngaimaw um a ni thu Dr Sailo chun a hril.

AICC in July 8 in meeting a ko

NEW DELHI: Assam state­a Congress party sunga buoina um mek le inzawmin AICC chun July 8, 2015 khin meeting a ko. Hi huna hin Assam CM Tarun Gogoi, PCC President Anjan Datta le Congress MLA hel hai hotu tak Himanta Biswa Sarma hai inkara inhrietthiemnawna um chingfel dan ding ngaituo ning a tih. Hi meeting hi Congress Vice President Rahul Gandhi inrawinaa nei ning a ta, AICC General Secretary in­charge, Dr CP Joshi khawm thang a tih.

Parliamentary Committee rawtna hnawl

NEW DELHI: Parliament MPs han hlaw sukpung ding le hamthatna dang dang rawtna an siem hai chu Parliamentary Affairs Ministry in a hnawl pek. MPs­a Parliamentary Committee/Panel  in rawtna an siem hai laia 70% chu Parliamentary ministry hin a hnawl pek niin ei thu dawngna chun a hril a. Amiruokchu thla hlaw Rs. 50,000 a inthawk Rs. 1 lakh a sukpung ding, MP hai pension hlaw Rs. 20,000 a inthawk Rs. 35,000 a sukpung; Constituency allowance Rs. 45,000 a inthawk Rs. 80, 000 a sukpung; personnal staff hai hlaw Rs. 30,000 a inthawk Rs. 50,000 a sukpung; Car loan Rs. 5 lakh a inthawk Rs. 10 lakh a sukpung ding ti le rawtna dang tlawmte hai chu la ngaituo that dingin  HRD Ministry kuoma pek a nih.

    

MPs parliamentary Committee rawtna hnawla um hai lai Parliament­a MP hai ta dinga cabin/office; ex­MP hai ta dinga diplomatic passport; session huna Committee chairperson hai ta dinga car facility; Committee chairperson han Delhi an suoksan huna Security pek ding; Ex­MP hai air ticket 10; MP ni lai mek hai air ticket 34 a inthawk 48 a sukpung ding; Daily allowance Rs. 2,000 a inthawk Rs. 5,000 a sukpung dinga rawtna an siem hai chu hnawl hmak an nih.

Jayalalitha in MLA dinga intiemkamna a nei

CHENNAI: Tamil Nadu Chief Minister Ms J. Jayalalitha chun July 4, 2015 zingkar khan MLA dinga intiemkamna a nei. Ms J. Jayalalitha hin corruption case­a thiem a chang hnung May 23, 2015 nia inthawka kha Tamil Nadu Chief Minister sin a chel tan a ni a, dan dungzuia thla 6 sunga MLA dinga thlangtling a tul leia Dr Radhakrishan Nagar Constituency­a byelection a ngir le  MLA dinga thlangtling thar a nih.

Helpawl 5 kap hlum an nih

SRINAGAR: July 3, 2015 khan India le Pakistan inrina Jammu and Kashmir­a Baramulla district sunga Uri sector­ah ramri (Line of Control) kana India ram hung lut ruk tum helpawl hai le Army hai nasa takin an inkaptuo a, hi huna hin helpawl 5 kap hlum an ni ni a, India sipai tieng khawm pakhat in thina a tuok niin Army official thusuok chun a hril.

Bluebell in MLA dingin sesamna a nei

SHILLONG: Meghalaya­a Chokpot A/C a byelection neia MLA dinga thlangtling Bluebell R. Sangma chun zani hmasa khan MLA dingin Assembly Governor A.T. Mondal hmaah sesamna a nei. Ama le hin Meghalaya Assembly­a chun nuhmei MLA 5 an um ta a nih. Nuhmei MLA danghai chu Roshan Warjri, Deborah Ch Marak, Ampareen Lyngdoh le Dikkanchi D Shira hai an nih.

PM Russia le rambung 5 haiah an zin ding

NEW DELHI: Prime Minister Narendra Modi chu kar thar khin Russia le Central Asian countries 5­ Kazakhstan, Kyrgyzstan, Tajikistan, Turkmenistan le Uzbekistan haiah an zin ding a nih. July 7, 2015 khin PM Narendra Modi hi Astana khawpui tlaung a ta, hi huna hin Kazakh Prime minister inhmupuiin energy tiengpanga thawtlangna, uranium mining le counter­terrorism chungthu hai hriltlang an tih.

Hema Malini Hospital­a inthawk a suok

JAIPUR: Zani hmasaa Rajasthan hmuna a chuongna motor in Alto Car a baw leia hliemna a tuok leia hospital­a admit  Actress le BJP MP Hema Malini chun zani zingkar khan Hospital a suoksan tah. Hema hi July 3, 2015 khan surgery thaw a nih. Hi car eksiden­a hin an inbawpui Alto car a chuong nuhmei naupang kum 3 mi a thi bakah midang 4 an hliem a nih. Naupang thinu pa chun, Hema Malini inrang taka hospital panpui a ni ruol khan a naunu khawm hospital panpui ve nisien chu a naunu a la dam ngei a beisei thu a hril.

China­ahsimkhawlei inhning leiin mi 6 an thi

BEIJING: China rama Xinjiang Uygur Autonomous Region­a chun zani hmasa khan richter scale 6.5 a hratin simkhawlei an hning a, mi 6 in an thi pha bakah midang 71 in hliemna an tuok. 6.5 richter scal­a hrat simkhawlei an hning zo hin 3.0 le 4.6 a hratin vawihni an hning nawk nia hril a ni bawk. Simkhawlei inhning hin In 12,000 vel ding a suksiet nia hril a ni bawk.

Naute 8 thattu kum 9 jail intang dingin

PARIS: French nupui Dominique Cottrez (51) chu kum 10 liemta sunga ama naute ngei 8 zet a that tia intumna le i nzawmin kum 9 sung jail intang dingin zanikhan Doui a Court chun thiemnaw an changtir. Naute a that hmasa tak kum chu 1989 kha a ni a, a that nuhnung tak chu kum 2000 khan a nih.

-----------------------------------------------------------------------------------------------

VAWISUN THUPUI

Lungrila ama zawngtuhai le, ama nghaktuhai kuoma chun Lalpa chu a tha a. Lalpa sandamna chu miin an nghak tawk tawk a, an beisei chu a tha a nih. ­~ Tap Hla 3:25­26

Editorial: Digital India (Week)

Khawvel thiemna le varna an sang peia technology khawvela cheng  ei ni ta leiin Narendra Modi PM nina hnuoia India sawrkar chun India ram chu khawvel hmasawn ruola kal pena, hma a sawn ve theina dingin Digital khawvela hlangkai tumin hma a lak mek a. Pu Narendra Modi  chun Digital India thu hi August 15, 2014 nia Independence Day hmangna huna a hrilnaa chun,  Digital India a ti hin mi changkang chin hai sawr tangkai ding chaua a hril ni lovin, mi rethei hai sawr tangkai ding lem a ni thu, Digital India hnuoia thingtlang naupang hai khawmin inchuktirna changkang tak tak an dawng thei ding thu, India rama tlangram kilkhawr tak hai chen  Broadband internet thlungzawm a, Doctor indainawna hmun haia Telemedicine Service ei sie thei chun tlangrama mirethei tak tak hai ta dingin an hriselna ngirhmun enkawlna kawngah kalbi thar a min chuongkaitir ding a ni thu a hril a; hi le inzawm hin July 1, 2015 khan Pu Modi chun Digital India Week a lo tlangzar ta a nih. Hi dungzui hin India ram state tin le hmun tin haia chun July 2 a inthawk khan July 7, 2015 chen aw dingin Digital India Week hmangna a fe mek a nih.

    

Digital India (Week) thiltum tak chu India mipui hai tulai thiemna technology hmanga  hmasawnna kawngah an nunphung thlakdanglam a ni a. Digital Locker, e­Governance le thil dang dang haiah Digital India hnuoia hin tlangram kilkhawr tak hai khawm Broadband Internet connection hmanga thlungzawm vawng tum; sawrkar le mipui kara indawrtuona chu internet hmanga inpawna thalem intlungtir ding; digital literacy sukpung a, Aadhar Card le ei mobile number hai thlungzawm vawng a, mipui han sawrkar­a thil an buoipui huna awlsamna nasa tak intlun a tum a nih. A taka ei hmang thei huna chun Income Certificate, Caste Certificate, Residential Certificate le thil dang dang hai buoipui le sukfel thei a hung ni ding a nih. Hi thila ding hin sawrkar chun man tlawm lema Mobile handset changkang lem Smartphone mipui han ei hmu thei dan lampui khawm a ngaituo ngei ring a ni a, thawktu tam tak lakthar hung ning an ta, mi tam takin sin an hmu pha ding a nih.

    

Digital India programme hnuoia hin Broadband Highways; Universal Access to Phones; Public Internet Access Programme; E­Governance – Reforming government through technology ; eKranti – Electronic delivery of services ; Information for all ; Electronics Manufacturing – Target Net Zero Imports ; IT For Jobs le Early Harvest Programmes hai an um a. Broadband Highways hnuoia hin thingtlang kilkhawr chena Broadband internet changtlung lem thlung zawmna ding. Universal Access to Phone hnuoia hin India rama Mobile phone la tlung nawna  khuo 42,300 um mek haia kum 2014­18 sunga intuomsuok tir vawng; Public internet access  prog. hnuoia sawrkar office dawr kher lova Post Office fethlenga dawr thei dan ding le hieng tiengpang centres Post office haia indin ding; E­Governance – Reforming government through technology hnuoiah mipui han form hrang hrang an peklut ding hai awlsam  le buoipui ngai a tlawm lem theina ding  a tlung chin internet hmanga enzui pei thei a ni na ding le certificate le card hai siekhawm;eKranti – Electronic delivery of services hnuoia school tin internet connection pek le internet fethelnga damnaw han doctor an rawn theina ding lampui siem; Information for all hnuoiah India khuo le tui han langtlang le awlsam taka information an hmu theina dinga online system buotsai. Electronics Manufacturing hnuoiah ramdanga inthawk thil laklut neka a ram sunga tam lem siemsuok; IT For Jobs hnuoia mi tamlem in IT tienga sin an hmu theina dinga IT tienga mi tamlem training pek le Early Harvest Programmes hi programme mipuiin ei sawr inhmat lem theina ding remruotna hai an nih.

    

Digital India programme Pu Modi in a hung tan hi thil tha takel a ni a, a taka a puitling theina ding ruok chun sawrkar department tum tum hai a tawk vawng ding a ni leiin awlsam taka zuk puitling el thei ding chi chu niin an lang naw a, thawktu hai khawmin theitawp tak meu an suo a ngai ding a nih. Programme induong anga sukpuitling a ni phawt chun langtlang sawrkar ei hung nei thei ta ding a nih. Sawrkar thawktu hai khawmin khel hril thei tanaw nihai a, kawng tinrengah hmasawnna kalbi thar a min chuongkaitir thei ngei chu ring a um a nih.

    

Hieng laizing hin khawvel thiemna le technology insang tak hin nuom le nuomnaw hril thei lovin a mi la hung nawt tak tak ding a ni leiin khawvel hmasawn ruola kal ei pen ve theina dinga ei lo intathriem ve chu ei mawphurna a nih. IT tiengpangah thiemna inthuktak ei lo nei theinaw khawm a ni thei, sienkhawm sawrkarin Technology thilthawtheina hmanga ei rama hmasawnna kalbi thar mi chuongkaipui a tum a ni lei hin information technology hmang dan le a chinchang iemanitawk bek ei hriet chu thil tul makmaw a hung ni ta ding a nih. Chu ding chun nu le pa hai khawm ei lo inbuotsai a tul ding a nih.