Hmasawnna Thar | 31 May, 2015

Tuolsung

Polling personnel le ballot box thuoikawi, dam taka sansuok an nih

CCPur: June 1, 2015 nia MDC election hung um ding le inzawma 3­Henglep DCC hnuoia 3/16­ Mongken polling station; 3/9­Chothemunpi PS le 3/14­Ukha Polling station haia duty dinga zanita Tuibuong Peace Ground­a inthawka suok hai chu zanikhan Zalenmun area lai tu ti hrietlo han   an lo dangchat a, ballot boxes hai le Election duty ding hai an thuoikawi a. Amiruokchu  SP/CCPur inrawinaa District Police le Army han an hnawtzui nghal leiin hmun pakhata inthawk polling personnel hai dam taka sansuok anni bakah ballot box hai khawm hmukir vawng a ni a. Ballot box hai hi DC Office, CCPur­ah sie an nih. Ballot box le paper hai suksiet a ni nawh. 3/16 Mongken PS a hin voters 410; 3/9 Chothemunpi­ah voters 463 le 3/14 Ukha polling station­ah votes 476 an um a nih.

    
ADC CCPur hnuoia MDC seats 24  inchu dingin candidates 95 an um a, hienghai lai hin Independent candidates 69, BJP 18, INC 7 le LJP candidate pakhat an thang. CCPur khawpui sunga polling duty dinghai ti lo chu zani zantieng khan hmun danga duty ding hai chu an duty­na hmun ding chit panin an suok tawl tah.

    
Kum 2010 MDC election­a khan CCPur district­a MDC seats 24 um hai laia 9 hai chu uncontest (khingtu umlo) a tling an ni a, a dang po chu contest­a tling an nih.

Award dawng lawmpuina le inthlana

CCPur:  Zani zantieng 2:00PM khan Female Health Worker Training School Principal, staff le Nurse training han CMO Mini­Conference Hall­ah Mrs Tingkholam, Grade IV inthlana le Ms Vungzanem Valte, Jt. Director, Nursing in National Florence Nightingale Awards, 2015 a dawng lawmpuina an nei a, FHWTS Principal le staff han par le puonbat an inhlan.

Imphal

Theitui dawn leiin nuhmei pakhat a damnaw pha;

 Manipur­ah Pocket Maaza zawr khap a nih

Imphal: Coca Cola company in an siem “Pocket Maaza” a dawn leiin nuhmei kum 42 mi  Ngangom Sangeeta d/o (L) Ghumeshwor of Kwakeithel Thounaojam Leikai chu khaw hre lova a um leiin zani zantieng 1:30PM khan RIMS Hospital­ah admit le enkawl a ni a, sienkhawm a ngirhmun chu a derthawng nawh tiin ei thu dawngna chun a hril.

    
Hi thil tlung an hriet le inzawmin Imphal west Food Safety Officer le Imphal West F Chief Medical Officer ni bawk Dr S. Bimolakumari inrawinain Masjit Road­a Coca Cola siem Pocket Maaza zawrna dawr hai an va dap nghal a, Pocket Maaza sunga hin thil dum (black substance) hmu a ni bawk leiin Dawr 3 hai chu khar an ni a, Manipur­a zawr khap an khap nghal. Dr S. Bimolakumari chun, State sawrkarin hima a puong hma chu tukhawma Pocket Maaza dawn lo dingin ngenna le inhriettirna an siem. Dawr khara um hai chu S.B. Traders; Pintu Store le Lali Store hai an nih. Health Department le food safety official hai chun dawn chi dang dang hai khawm an la enfel pei ding a nih.

Vote campaign hun a tawp; June 1 in election nei ding

CCPur: June 1, 2015 nia Manipur­a ADCs 6­ Chandel, Churachandpur, Sadar Hills, Senapati, Tamenglong le Ukhrul haia inthlangna hung um ding le inzawma vote campaign theina hun chu zanikhan a tawp tah. Manipur­a ADCs 6 haia hin MDC seats 144 a um a, hienghaia ding hin canidates 495 an um a nih. Polling stations 1060 hawng ning a ta, voters 6,51,964 han vote thlak an tih. Hieng seats 144 haia hin Congress candidates 7, NPF 3 le BJP candidate hai chu khingtu um lova tlinga puong an ni ding a nih. Inthlangna fel le thienghlim taka nei a ni theina dingin state police, IRB le VDF hai bakah army le BSF hai khawm hmang ning an tih.

    
ADCs 6 haia hin polling stations 1163 hawng ning a ta,  Sadar hills­ah polling stations 172, CCPur­ah polling stations 290, Chandel­ah 144,  Ukrhul­ah 206, Senapati­ah 186 le Tamenglong ah polling stations 165 hawng ning a tih. Voters 688410 an um a, Ukrhul­ah voters 11492,  Senapati­ah 135395, Sadar Hills­ah 96688, Churachandpur­ah 181494, Chandel­ah  87619 le Tamenglong­ah votes 85722 an  um a nih.

    
Vote thlakna hi June 1, 2015, 7AM a inthawk zantieng 4:30 inkar sung thlak thei ning a ta, repoll (inthlang that) nei tulna a um chun June 6, 2015­ah nei ning a ta, vote thla hai tiemna June 10, 2015 in tan le tiemzo hai result puong pei ning a tih. Electoral process chu June 17, 2015 a zo vawng ding a nih.

S.Korea inzin ding lai Ms Ibema Chirom

Imphal: Manipur University hnuoia Economics a 2nd Semester thaw lai le NSS Manipur College Unit volunteer hlui le Manipur University NSS Award 2014 lo dawng tah Miss Macha Ibema Chirom chu June 3­12, 2015 inkar sunga South Korea hmuna Indian Youth Delegation team mi 20 fe ding hai lai Ministry of Youth  Affairs and Sports in a hung ruot ve. Indian youth delegation team hi historical le educational institutions, universities, museums hai sir an tih

June 1­a inthawk tiemchin umlo Economic blockade

Imphal: Committee for Kojury and Dzuko Land Boundary Resolution (CKDLBR) chun June 1, 2015 zanril­a inthawk Imphal­Dimapur Road National Highway­a tiemchin umlo Economic Blockade thaw an tum chu an fethlengpui ding thu zanita Manipur Press Club, Imphal hmuna press Conference huna an hril.

    
CKDLBR­a spokesperson N. Rajendro & Boy chun, Nagaland sawrkarin Manipur ram kms. 15 vela hla sunga lampui a hung siem suktawpna dingah state sawrkarin hma a lak naw bakah vawi tam tak ngen a ni hnung khawma ramri buoina hmuna security forces a sie naw leia  a nawrnaa hi thil hi an thaw tu m niin an hril. Southern Angami pawl thenkhat chun security personnel hai hmu ngeiin Khuzuma check post lai Mao a inthawk Nagaland pan hai dapin frishking an thaw tiin an hril bawk.An thil ngen state sawrkarin a sukpuitling pek ngeina dinga mipui hai thlawp dingin an ngen a, June 1, 2015 chena sawrkarin a chingfel naw chun June 1, 2015 zanrila inthawk Economic Blockade hi an thaw tan ding thu an hril.

Others:

Lum tuor lova thi mi 2207 an tling tah

New Delhi: Telangana state a chun zani hmasa chen khan Andhra Pradesh, Telangana le Odisha haia mi 202 an thi belda nawk leiin hi thu ei sut chena India ram pumpuia lum tuorzo lova mihriem thina tuok chu 2207 an tling tah. A lumna hmun taka hril chu Maharashtra­a Nagpur niin a lum dan chu 47.1 degree celsius a nih. Telengana hmuna zani zantieng 5 PM chena mihriem thi chu 541 an tling ta a, Andhra Pradesh a chu lum leia mihriem thi tamna tak niin  mi 1490 lovin an thi ta a;  Odisha ah mi 21, Gujarat le Delhi haiah 2 ve ve an thi ta bawk  niin ei thu dawngna chun a hril. 

Odisha CM hlui Congress­a inthawk an ban

Bhubaneshwar: Odisha Chief Minister hlui le Lok Sabha member term 9 lo tling tah   Giridhar Gamang chu Congress party chunga lungawinaw leiin zanikha Congress party a inthawk an ban. Giridhar Gamang hi Indira Gandhi; Rajiv Gandhi le Pv Narasimha Rao PM ni hun haia Union minister kum 11 zet lo ni ta a nih. Congress zawm nawk a tum tanaw thu hrilin party dang a zawm ding le dingnaw chu a la ngaituo ding thu a hril. An banna hi  Congress President Sonia Gandhi kuoma a pek  a nih.

FM in Bank Note paperline unit a hawng

Bhopal:Union Finance Minister Arun Jaitley chun zanikhan Madhya Pradesh­a Hoshangabad­a  Security Paper Mill hmuna Bank Note Paper Line Unit thar a hawng. Hi huna hin Mr Jaitley chun India siem Bank note paper tam tak  chu Currency Note Press Nashik pan dingin a vailiem. Pawisa siemna ding paper tam tak hi ramdanga inthawka laklut an ni a, tuhin chu Bank note lien hai siemna ding paper chu hi hmuna hin siem  ni tang a ta, hiengang unit hi Mysore hmuna khawm hawng vat ni tang a tih tiin Jaitley chun a hril. Hoshangabad hmuna New Paper Line Unit hi pawisa note paper siemna dinga Security Printing and Minting Corporation of India Ltd. in  Rs. 495 crore zet senga an din a nih.

Nagaland in Alt. English aiin Heritage Study

Kohima: Nagaland­a chun academic session 2016­17 a inthawk inchuklai Class 5­8 han Alternative English aiin ‘Heritage Study’ ti chu an inchuk ta lem ding a nih. Hi thil hi Naga hnam nunzie le culture hai vawnghim pei a ni theina dinga State Level Education Committee in hmang dinga an rel le zani hamsaa Kohima hmuna International Arts Education Week hmangna huna Nagaland State Council of Educational Research & Training (SCERT) Director, Vipralhou Kesiezie in a hril a nih. Naga student 90% deuthaw han an nu tawng (Naga tawng) inchuk lova Alternative English an lak lem leia hi thil hi thaw niin ei thu dawngna chun a hril.

Chhatisgarh­ah tiffin bomb hmu

Ranchi:  Zankhan  Chhattisgarh­a Sukma district sungah CRPF le Police thangruol han  Improvised Explosive Devices (IEDs) kg. 10 zeta rik ding tiffin bomb pahni an dapdak. IED hai hi Sukma­Dornapal inkara dapdawk a nih. Union Home Minister Rajnath Singh chu zanikhan Chhattisgarh ni 2 sung cham dingin an zin a, Naya Raipur hmuna Police headquarters builiding thar hawng a ta, sipai hai inpawlpuina nei bawk a tih.

HNLC cadre 2 ralthuom leh man

Nongpoh: Zani hmsa khan Meghalaya state­a Ri­Bhoi hmuna Police han HNLC cadre pahni hai chu ralthuom leh an man. Mana um hai chu Khrawbok Marbaniang le Belnis Thabah hai an ni a, an kuta inthawk country made Pistol 1, 12 bore silaimu 6, silai hlo, demand note, fire cracker hai an mansa.

Land Bill thuah state tin ngaidan pe dingin

New Delhi: Parliament inpui pahni haia Land Bill thua Joint Committee meeting hmasa tak zanikhan nei a ni a. Hi meeting chun Land Bill thua an ngaidan hai pelut dingin India ram state tina sawrkar hai an hriettir. Joint panel a Chairman chu BJP MP SS Ahluwalia a ni a, members 30 an u m a nih. Hi panel chun parliament session nawk huna report an peklut hman ngei theina dingin June 8, 2015 a inthawk kartin Thawtanni le Thawleni haiah meeting nei hlak dingin an remti bawk. Hieng laizing hin TMC le BSP hai chun Land Bill hi an dodal tlat ding thu an puong.

Sai helin hmun hran hrana mi 5 an that

Kalaigaon:  Darkar 48 liemta sung khan Assam­a Udalguri le Baksa district haia hmun hran hranah Sai helin mi 5 a that. Sai in mi 5 a that hai chu Marshall Daimari (40), Babulal Gaur (38); Josinta Karmakar (35), Shilla Karmakar (10) le midang pakhat hai an nih. Hieng mi 5 hai hi Tarkhuti village, Sonjajuli, NC Kherkheria le Bornadi Wildlife Sanctuary bul haia May 28­29, 2015 haia Sai hel in a that an nih.

Sin pek dinga mi hlemtu man

Pathankot: Kum 7 liemtaa Merchant Navy sin pek dinga inhrila Rs. 7.50 lakh laa mi hlemtu Raghunandan Sharma chu zanikhan Hoshiarpur district­ah Police han an man. Mr  Sharma hin merchant navy sin pek ding tiin Lakhwinder Singh kuoma Rs. 7.50 lakh a lak a, sienkhawm a pek tasinaw leia Mr  Singh in complaint a thelut a, sienkhawm Raghunandan hi an bi hmang leiin kum 7 sung zet man lova um a nih.

Indian Peacekeepers thi 2 hai UN medal

New Delhi:  United Nations chun nikuma helpawl hai tukdawlna dinga sin an thaw huna India sipai UN Peacekeeping force­a thang  thina tuok pahni hai chu UN Sipai 124 thi hai le inruolin an thi hnungin UN medal an hlan. UN Peacekeeping force­a thang India sipai thi UN medal inhlan hai chu Lance Naik Nand Ram le Raju Joseph hai an nih. Ram hi UN Organisation Stabilisation Mission, Democratic Republic of the Congo­a sipai sinthaw le Joseph hi South Sudan­a UN mission hnuoia (civil) sinthaw a nih. Medal hai hi India ambassador to UN Asoke Mukerje in a dawngsawng.

Gujarat CS thar dingin GR  Aloria

Ahmedabad: Gujarat sawrkar chun senior IAS Officer GR Aloria chu Chief Secretary thar dingin a ruot. Aloria hi 1981 batch IAS Officer tuta Addl. Chief Secretary, Urban Devpt.  Department sin chel lai le Home deparment chelsa mek a nih. Gujrat Chief Secretary ni lai mek DJ Pandian chu May 31, 2015in a sina inthawk a pension ta a nih.

Drugs sumdawngna case­ah Police 5 man

Mumbai: Drugs a sumdawngna le Drugs Mephedrone (‘meow­meow’ tia ko) kg. 114 zet dapdawk le man a ni le inzawmin zani hmasa khan Mumbai Police­a crime Branch chun senior Police inspector Subhas Gokhale, Inspector Gautam Gaikwad, SI Sudhakar Sarang, ASI Jyotiram Mande le head constable Yeshwant Parate hai  an man nawk a, hi case­a mi man chu mi 8 an tling tah.

Bawngsa­a tui kaplut leiin mi 12 jail­ah

Beijing:  China rama Court chun Bawngsa zawrtu mi 12 hai chu an Bawngsa zawr ding hai an that hmain a bukrik na dinga tui an kaplut (injecting) leiin thla 6 le kum 2 sung jail intang dingin thiemnaw an changtir. Hi thil hi Zhejiang province­a Rui’an People’s Court in a rel a nih. Hieng mi 12 hai hin Bawng an that ding 100 chuong hai chu an buk rikna dingin pipe hmangin an hnar haiah tui an kap lut hlak nia intum an nih tiin Xinhua news report chun a hril.

--------------------------------------------------------------------------------------------------------------

VAWISUN THUPUI

Chuleiin, Krista Isu, Lalpa chu in pawm ang khan amaa zung kei le, rem sâng deu deua u min, an inchuktir ang cheu khan, lâwmthu hrilna hauin, in ringna chun dettakin um ro.  ­Kolossa 2:6­7

Editorial

Khuo le tui tha ni dingin vote thlak seng ei tiu

Election Commission Manipur in Manipur tlangram districts 6 haia Autonomous District Council 6 haia MDC inthlangna nei dinga a lo puong le ruot lawk ni tlungna ding vawisun (nikhat) chau a bak ta a. Harsatna le buoina nasa tak a um a ni ngawt naw chun June 1, 2015 hi Manipur tlangram biela ADCs 6 haia MDC election vote ei thlak ding ni  a nitah. Kum dang ang lo takin tukum MDC election hin boruok a nei a. Election le inzawma thil ditumlo a tlungnaw hram ei beisei a nih.

     
Democracy (mipui ro inrelna)  rama um ei ni angin  India rama chun mipui  han ei thuneina (vote) hmangin  ram roreltu ding ei thlang hlak a, thlangtlinga um hai lai a tha le thanaw khawm um ngei an ta, thlang fuk le fuknawin kakhawk a nei lien hle hlak ti ruok chu ei hriet a tha. Ei thlang hai chu ei rama inrelbawlna keivirtu an ni angin ram rorelna khawlpui an thunun hlak. Chuleiin sawrkar siemna, ei ram le hnam siemna dinga hin mitinin mawphurna ei nei seng a nih. Mi tha ei thlangtling leh ei hmakhuo var a ta, ei thlang fuknaw ruok chun ei hmakhuo an thim el ding a nih.

    
Democracy rama um ei ni  chun vote thlak hi ei bat a ni a, ei ram India khuo le tui tha  ei nina pakhat chu vote ei thlak hi a nih. Democracy hi ram inrelbawlna tha taka ngai a ni  a, sienkhawm mipui han ei mawphurna le bat ei tlak sinaw chun umzie a neinaw ding a nih. Ei vote hi ei thuneina a ni a, ei ram hmasawnna ding, ei ramin lampui indik a hraw theina dinga mawphurna chu ei vote­ah an nghat bawk a nih. Khawvel rambung thenkhat mipui ro inrelna (democracy) dita an khek inrum lai hmang thei zinga ei um hi ei vang nei hle a. Democracy sawmhring zing a ni theina dinga khawm mawphurna ei chunga an nghat a nih.

    
Hieng laizing hin mi thenkhat chun candidate tha le tha lo thlier hran thei lo khawpin  ei zalenna, mawphurna le dikna hi ei zawr rawp hlak. Hi hi ei ram hmelhmang suksetu le ei society fase mektu a ni bawk. Mithiem hai chun, mihriem zawr thei chi hni a um a, chu laia pakhat chu  Sal, 
Sal hrim hrim chu mani nuom thu ni lova  thawluina hmanga man le zawr an ni hlak. Sal hrim hrim chun mani chunga thuneina an neinaw a, a neitu thu thuin a um hlak. Pahnina chu nuhmei inzawr (Nawchizawr) ei tihai hi an ni a, hieng hai hin chu anni thu le ditthlangna ngeiin sumdawngnain an inzaumna an zawr hlak ti hi a nih. Chuong laizinga mani inzaumna khawm thlakhla hlei thei lova, ‘an tling hnunga ka sawrna um khawm ni lo, sawr thei lai lai, fak thei lai lai fak el ding’ ti ngaituona nei mihriem ei pung pei a, ei  (vote) ei zawr sup sup el ta hi  chu a pawi takzet. Mani mimalin sawr kher naw inla khawm thuoitu tha ei thlang fuk chun nakie tienga ei ram le hnam thatna ding le ei sawr ding a nih ti ei hriet tlat a pawimaw.

    

Demcoracy ram India in khuo le tui tha tak ei nina anga hlutna a mi pek, ei chanvo pawimawna le ei inzaumna iengmalova ngaia, ei sukchingpen pei a ni chun ei ram danpui sukhmelhemtu chau ni lovin ami siemtu Pathien inzanawna le sukhmelhemtu ei nih ti hi ei hriet thar nuom a um. Vote zawr hin politician hai lungril a suksiet el chau ni lovin mihriem a mi suksiet a, sawrkar le ram a a faksiet bawk a nih. Hi lei hin mani dikna chanvo le inzaumna humhal tlat dinga fimkhur­in huoisen insuo ngam ei tiu. Thenkhat chun sung le kuo thil le mimal inditsakna fepuiin politics ei khelin vote ei thlak rawp hlak bawk. Hi khawm hi ei ram hmasawnna dinga thangmawbawk pakhat chu a nih.

    

Mi tam takin election iengma lova ngaia vote thlak ei inthlada hi vote hlutna ei hriet tawknaw lei a ni tlangpui awm ie. Rangkachak le lunghlu hai hi an hlutna ei hriet leiin chite khawm ei sik ner ner el an naw! Vote hi a hlutna hriechieng tak tak ni inla chu hiengang ngirhmun chaua hin ei um ring a um ta nawh. Mi tam takin an nei ve thei lo Vote ei nei hi ei vangneina a ni a, vote thlak chu democracy rama cheng ei nina anga ei chanvo le mawphurna a ni bawk. Vote hlutzie chu kum 1776­a America in English am German tawng hmang ding tia vote an lak naah vote pakhat chau leiin English (saptawng) ei ti an hmang a, Vote khat lei bawkin France rama lal rorelna (monarchy) chu mipui thlang rorelna (Republic) a hung ni a, vote khat lei bawkin khawvela insuotna le indona nasa tak intluntu Adolf Hitler kha Nazi hotu a thlang a nih.

    

Vote khat ei thlak lei hin ei mi ditlo candidate iengma lova ei inchan thei a, ei mi ditnaw hai  iengma lovin ei siem thei bawk. Chuleiin ei dikna chanvo, mawphurna le thuneina (vote) hmangin, ei ram siemthatna ding le hmasawnna dingin India ram khuo le tui tha ei nina angin mani vote thlak seng ei tiu.