~ LRS Puruolte
Kum 17 lai lo liem ta
a inthawk khan March 14 hi kum tin, “International Day of action for Rivers and
Against Dams” (Vadunghai
humhalna le Tuikhuop (Dam) dodalna Ni) ti a khawvel a hnam var le pawl tum tum
haiin an lo inser hlak a nih. Hi ni le inzawm hin khawvela pawl le mipui
tamtakin rawl insuoin, vadunghai sukfaiin, humhal a pawimaw ziehai le tuikhuop
(dam) dona le a thatnaw ziehai chipchier tak le alangachang a inhrilhrietna
Ni-in an hmang hlak a nih. Hi ni pawimaw tak le inzul hin hril ding tamtak um
de sienla khawm, Tui pawimawna tiengpang ah inhrilna hun remchang ah lo hmang
ta daih inla.
Eini hai khawm ei
chengna ram Sawrkar a innghat ringawt hun an ta naw a. Mitinin mani theina zawn
seng a, ei thei ang ang a hma ei lak a ngai ta hle. Nikum March 14, 2014 khan
Churachandpur District a chun Pu, Dr. Immanuel Varte Director, CORE le Pu Timothy
Z. Zote President, NEIO hai hmalaknain Centre for Organisation Research and
Education (CORE), North East Peoples’ Alliance (NEPA) le North East India
Outlook (NEIO) hai huoihawtna le Saidan Lal, Khawtlang thuoitu VA, HSA, HYA,
HWA le a dang dang hai inpekzona le thangruolin Saidan Leilak hnuoi lai,
Tuithapui Vadung (Khuga River) chu sukfai a ni a. Hi hun hi National, Imphal le
CCpur based Media hran hran hai khawmin an uop a, IMPACT TV lem chun Saidan
khuo mi pakhat (Pastor Thangdaivel) interview khawm an nei nghe nghe. Kei khawm
huoihawttu laia NEIO milesa pakhat ni vein Rapporteur in hi ni hin ka thang
ve a. Thangman a umin, zawngsakum ka ti tak zet. (Hi Vadung sukpawrche pek
a um, inthielfai a um hi a khaw neituhai thaw nekin hi Vadung le a kau pengin a
i hraw Tuithaphai ruom laia khuo tum tum hai hmunhnawk peihawn le thli tawp
an ni a, Saidan khuo hin a la tuor zing a nih! Hi Vadung hi thienghlim zing pek
thei sien chu tui dawn ding le insawpna ding chu hnienghnar hleng an
tih. CCPur a khuo tum tum tuiharsatna hmun hai supply theitu ding hi
Vadung a inthawk a laksuok a hnaite ah Water Reservoir khawm siem theina ding
tlang le muol infuk tak a um bawk).
Mihriem tadinga tui
pawimawna leiin March 22 khawm hi World Water Day a
la ni nawk ta pei a nih. Vadung chin le lien hai el bakah dil, tuikul, water
pipe line, water tanky, dam, water hand pump le a dang dang tamtak
vantlang/mihriem hriselna ta dinga him tawklo a ei siem, sukpawrche hmu ding a
um deu zing! Mi tamtak changkang le sakhuomi fufu a inlang chenin nullah chu
hrillo, vadung chin le lien hai chu dust bin a hmangin, hmunhnawk, thil
tirdakum chitinreng, hmawn theilo chi dam, saidawium, sehriet, sarang, panna
tuomna, zun-le-ek le a thli, nuhmei le naute mawngdap, ranpul thisa chenin,
inphalamna le inzakna chite khawm nei der lova peihawnna a hmang tamtak ei la
um zing! Hi thil hi mawlna le suolna tawpkhawk a tling a, sim vat chi a nih. Hrietnaw
kara tuolthattu rapthlak tak ni theina khawm lo ni thei ngai a nih…Mihai
tadinga harsatna intluntu ni nek chun Sawrkar thuneitu le ei aiaw dinga ei
thlang lal hai kuomah ei mawmaw intlun hlak inla nuom a um. Tu hri a hin
Sanitary Truck in a mi lo dawl phak naw a ni khawmin, mani in bula rawhmang
thei chu rawhmang pei ta inla, sukriral el theilo chu tlawmte chau a nih. Recycle
thei tamtak a um, chuchu sawngbawlna ding chun District Administration, Sawrkar
le NGO fel tak tak ha’n hma hung la vat thei hai sien nuom a um hle. Hienganga
ei um zing a ni chun mi tamtakin natna tibaium le hrithanaw tak tak hung
invawi pung peiin, la thipui pei ei ta, pulhri/hripui (outbreak) a la hung
intlun thei bawk ding a nih.
Hrietzing ding, a vel
a vel a inhril pawilo!: A tui ei fak, Vadung chin le lien ei neisun hai humhal le
sukpawrchelo a tha, insawp insil le hmang dan hrisel tak ei zui le zawm a
pawimaw tak zet. A sunga chen thilhringhai khawm hi humhal thei inla nuom a um.
Mithiemhaiin, Vadung tui sunga thilhring chenghai humhal a tulzie an hril
chang, tui a cheng thilhringhai, nga, utawk, ai, kaikung le dang dang hai
mihriem tadinga an pawimawvena chu tui a nata hrik mihriem tadinga thalo
lo umhai an lo fak hlak, an ti hlak kha hung indik a ta, an hung rem hun hun a
chun mihriem tadinga tui a natna hrik um hai lo fabo/hlum hlak tu um ta nawng
an ta, ei la buoisie ding a nih.
Tui pawimawna le a
pawimaw zie chu mitinin ei hriet seng a. Chuongang khawpa
pawimaw chu lo nisienlakhawm iengtilei am a ni ding? Tui
humhalna le enkawl dan kawng a hin ei la baksam hle ringawt el
hi chu thil mak a nih! Ei chengna India ram sawrkarpa khawmin a mipuihai tui
thienghlim ei dawn, tui ei mawmaw tawk a tulna haia hmang khawp ei hmu
thei ngeina dingin theipatawp suoin, Central Scheme tha tak tak- National
Rural Drinking Water Programme, Accelerated Irrigation Benefit Programme, IWMP,
Total Sanitation Programme le a hming dang dang tam tak an duong suok teu
a. Chuchu khawm chu a taka sawr thei dinga hma la ei tam naw hle!
Tui le Ruotui tamna
dinga pawimaw Ram ngaw, thing-le-ruo humhal: Tuta ang zinga thingphun ei uor naw a, ram raw siet
ei uor lem a, tukhawma ei siemtha tumchuong naw zing bawk a ni chun ei ram chu hun
sawtnawte ah Thlaler ram tawl ah ei inchangtir
vat tading a nih. Chun, thing le ruo ei humhal naw a, ram
kawk hel hul a um ta leiin sik-le-sa hunbi khawm an
thlakdanglam mek a, fur hun a hai tlang a’nthawka tuihawk hung luong thlain
ei pilhang a len hmangzo a, a kum telin thlai khawm a rasuok a hung tlawm pha
ta pei bawk. In le lo a suksiet le tui an let tir khawm a
tak ngeiin ei la tuok pei ding a nih.
Hieng popo ei
siem thatna ding chun hi Ni hin mi ram a Sawrkar,
Volunteer, NGO hai thaw hlak angin naupanghai lai chen khawm
inhrilhrietna, kut thiem thil, activities tum tum thaw pui
thei ve inla nuom a um hle.
Genesis 1:28 a ei hmu, “…in thu thuin inumtir
ro…” a ti lai tak hi mi tamtak chun enkawltunina
(Stewardship) mawphurna a mi pekna tieng
nilovin, nuom nuom a sawisak, suksiet, fak le thawthei vawngna ang ah ei ngai
hlak a. Pathien thu ei laksuol ti hrim hrim ei hriet naw nisien a hawi. Ei
Pathien-in eini, ama angpuia a i siem le ama ringtuhai hi Khawvel le a sunga a
thilsiemhai chunga thuneina a mi pek hi enkawltunina le mawphurna
pawimaw tak el a mi pek na a ni a, ei inza a, ei zawm hi ei damlai ni a ei thaw
ding makmaw (duty) a nih. Ei rama Pawl tum tum, NGO, kohran le khawtlang mipui
le mimal khawmin hiengang tienga hmalakna hai hi ei rawngbawlna ding a nih ti
hi hrie thar nawk zuol inla nuom a um hle.
