Presidential address delivered by Dr. John H. Pulamte, President, HSA Gen. Hqrs.OnThe 53rd General Assembly of the Hmar Students’ Association , 10th December 2011, Sakawrdai, Mizoram.
Hmar Students’ Association Inkhawmpui Lien voi 53-naa thrang dinga biel tum tum anthoka palai
hunghai le inkhawmpui ngaihruina (souvenir), SINLUNG tiemtuhai po po ditsakna insangtak leh chibai ka buk cheu. Pathien le hotuhai ditsakna zarin tukum 2011 hi tiemin HSA General Headquarters a hin kum 23 inzomzata ka umna a ni tah a. General Secretary mawphurna ka chel lai Inkhawmpui Lien trum 2 ei nei bakah President mawphurna ka chel sunga Inkhawmpui Lien trum hi tiemin a voi 4-na a ni a; voi 3-ah hieng ang ‘souvenir’ buotsai theia um hi vangnei kan tih a. Tha le zung, sum le pai le ngaituona tamtak senga hieng ang thil namenlo buoipuituhai kan pak takzet.
HSA hi Hmar hnam sunga organisation pieng hmasa pawl tak le tuchena la hring zing a ni a, kum 2014 hi kum 75 a thlingna ding kum a ni tah. Pathien zara a hun le ni thruoitlunga ei um chun lawmna hunser ropui taka nei dingin ei inpuocha mek lai zingin throitu hmasahai kuomah lawmthu a tlampuiin ei intung ni raw se.
Hmarhai hi India hmasaka state hran hranah thredar ei nia; threnkhat chun hieng anga thredar ei ni hi ei vangduoina le thrangmawbawk angin an ngaia chu kei chu ei hamthratna niin ka ngai lem daih a nih. Ei theina, thiemna le remhrietnahai ei hnam le pawl ta dinga ei la pek rawn tawk naw lei chauha hratnaw le hnuoihnung lema inngai mei mei ei nih. Sakhuona le Inchukna tieng chu chuong lawm lawm chun mi hnung ei hnot nawh a; pawlitiks tieng ruok chu voisun chen hin mumal lo deua um chu ei ni tak.
1946 lai khan Mizo Union ei lo invet puia; Manipur-ah Regional Council ei chan pha der. Manipur, Mizoram le Assam-a Hmar hai ta dingin Autonomous State dam ei lo demand ve nuola chu hrat tak le taimataka bawzui a ni naw leiin ram ropui ei tlung nawh. MNF inrawinaa Greater Mizoram movement khom kha theitawpin ei lo thlopa chu a tawpa hrietfuk ei ni nawk naw bok. Mizoram-ah 1987 lai khan ei thu le hla lovin tharum insuoin district demand beipui ei thlak a; pasalthra tamtakin an hringna hlu hnam ta dingin an inhlana chu voisuna ei thil suolsuok hi nui khom an za phak nawh. Barak Valley, Assam-a ei ‘development council’ hman hman hi thisen suok meu loa ei suoldok a ni leiin a la changkang lem ka tih. Sienkhom, tutaka council pahni ei nei ve sun ngirhmun indiktak hi en hin lung chu a awi thei tlawt nawh. A san poimaw tak laia pakhat chu eini lei a ni nawk tlat si. Hmarhai lai hin thruoitu ni tum nekin hotu ni tum ei tam lem leia hieng ang ngirhmuna ngir ei ni deu taka. A poi khop el. Mimal inhrietthiemnawna le ngaidan chitea inkalna leia hnam le ram chena kakhawk ei inneitir hlak hi a poi zie ei la hriet naw chu ni ngei ding a na! Ka thu hril hi a lo theida nuom an um khomin poi ka ti nawh a; a maw phur ka tih.
Ei inkhawmpui thulut (agenda) tamtak laia ka lungril tawk rieu pakhat chu, ‘HSA hin Unpublicised Political Wing nei ta sien’ ti a nih. Thrangtharhai hin ei hnam pawlitiks fedan a hin ei lung a awi tanaw ti a chieng a, ei pawlitisianhaiin hnam le ram an mi keihruoi dan le tum pei dan hi ei ringzo tawk ta naw nisien a hoi bok. A thra, thrangthar inchuklaihai hin ei hnam le ei ram hi ei invoia ei lainat a trul a nih. Ei hla phuoktun, “Thranghlui lungmawl aw lungngai naw, I lo beisei zalenna ni chu; Par ang la vul ve ngei a ti, Thrangthar mithiem zarin; Ei ram le hnam zalenna ni, Par ang lawm kar chu ei nghakhla” a lo ti hi a sukdiktu chu voisuna thrangtharhai hi ni inla nuom a um ngei. Iengtin tak mania thrangthar inchuklaihai hin ei rawl le tha ei insuo naw chun kum 10 hnunga ei hnam ngirhmun ding chu enhla um hleng a tih.
Chuong lai zinga ka zuk belsa nuom pakhat chu, tulaia ei kawl le kienga ram le hnamhai pawlitiks boruok inlumlet vel dan hai hin Hmarhai khom a mi sawihning a, ei to pui trok trok thei bik naw ding a nih. Iemani ti taka thil a thra lem le hmasawnna ditum lem a suok vat naw chun Hmarhai ta ding chauh nilovin ei kawl le kienga hnam le sorkar ta ding khoma hlimna le lawmna nekin chuong naw tiengpang chu a ni lem ngei ding a nih. HSA hin Mizo hnam inoumkhatna le inunauna thralem hi ei dit le nuom a ni zing lai ei niphung bansan der chun hma ei lak naw ding a nih. Na nei chun hre mol raw seh!
A hma nekin HSA hin ei hnam sung thu a pur inthuk lem tah a; a dap suok hrat vieu bok. A hmaa General Headquarters innghatna tak, Tuithraphai a khom khuo khat-khuo hni ni hlak deu kum 5/6 lai liemtah anthok khan ei inkeiphar thut a, a thruoituhai khom biel le state hran hrana mi ei ni tah. Hieng anga inthruoi hi hnam dang le pawl dangah khom an um meu ring a um nawh. Kong threnkhata a hau intakna le rem nawna um sienkhom a thrat lemna le ei hnam le pawl sunga inhrietpawna le intringmitna a sukhrat lem angreng a nih. Tulai khawvel, Information Technology tienga hmasawnna hieng, internet, mobile phone, etc hai hi hmang trangkai thiem inla chu khawvel pumpui hman ‘global village’ an ti tak hnungah chu India hmarsak biela Hmar trong hmang tlawmte chauh umhai hi chu ei inbiekrawn phak zing nawna san ding a um nawh. Mi ‘common room’ chitea rem le rem loa committee neia ropui ei rel lai hun kha pel a hun ta hrim hrim a nih.
Tuta thruoituhai term sung hin chuong hehua pawl le hnam ta dinga thilthawthrat hril ding ka nei meuh nawa chu Rengkai, Churachandpur-a ei ram (plot) neisuna sum hnar ding marketing complex, meeting hall le guest house kan suolsuok thei hi lawmum kan ti a nih. Hi building hluo man hi October 2011 anthok khan thla tin General Headquarters chun an tel tran ta a; tam naw sien khom, nitina office le pawl keihruoina le sukhringna ding a lo phuhruk thei pei ei beisei.
Ei hnam le pawl ta dinga mi thrahnemngai le sorkar office tienga ditsaktu threnkhat leiin ei Campus a bok hin Manipur state sorkar fethlengin North Eastern Council (NEC), Shillong anthok suk Vaibelsie 4.7 zet Hostel bawlna ding ei hmua; tuhin sin chu thaw mup mup zing a; kumthar hin zofel vong ei inbeisei a nih. Hi Hostel hi Manipur-a Hmarhai chauh sor ding ni lovin Mizoram, Assam le Meghalaya-a hai chen khomin thiemtaka ei insortir thei dan a um a; lampui ei dap mek a nih. A neitu le sortu tak ei ni zie suklangna dingin hi Hostel le a dang ei buoipui mekhai suk hlawthlingna dingin Hmar Students’ Education Fund siemin sumpui nei dan ding ei rot a; beisei ang taka Joint Headquarters le biel danghai anthok response a thra naw leiin lung a na deua chu la hung thra pei dingin ei beisei. Hi fund hin ei hnam sunga naupang lekha inchuk sang dinga beiseiumhai thrangpuiin chawm inla ti a nih. Chipchier le chieng nawk zuolin hi thu hi inhmaw le hrat taka CEC member ei thlang thar ding haiin an hung bawzui ngei ei beisei bok.
HSA dam zing raw se!
(Dr. John H. Pulamte)
