January 30, 2018, Virthli (ONP): Tarik 27th January 2018 zan dar 08:00PM vela Hmarkhawlien khuoa Pu Norber Sanate @ Bara nunrawng taka that anina le inzawmin Hmar People’s Convention (Democratic) President pawl a Information & Publicity Officer le Information & Publicity - Defence hai chun a hnuoia ang hin hrilfiena an siem.
---------------------

Ref No. HPC(D)-HMAR RAM/SIN-2018/-1
Date. 30th January 2018
Pu Norbar Sanate (47) thina chungthu

Hmar Christien Leaders’ Forum (HCLF) le Hmar Inpui (HI)-in a phut angin Hmar People’s Convention (Democratic) HPC (D)-P chun hieng a hnuoia ang hin hrilfiena a siem.

Hmar Inpui hmalakna’n HCLF chun inremna a buotsai a, chu thu le inzawm peiin HPC (D) pawl pahni (HPC(D)-President le HPC (D)-Chairman pawl) le HNA-hai chun inremna le inhrietthiemna thuthlung June 20, 2015 khan an lo siem a. Chu inremna thuthlung chuh HPC (D)-P chun inza taka suk dik tumin theitawpin hma a lak a. Chuleiin, hi organisation sum hmuna kawnga khawm pawl dang le inkhakbuoi lo zawngin theitawp suo’n a fe hram hram hlak a nih. Chuonglai zingin Pu J.C. Hmar, Pu Laldemlo le Pu Eleazar (Vala) haiin Pu H. Zosangbera an rawina HPC (D)-C an zawm thu hriet le inruolin Pu Eleazar (Vala) hminga Tuiruong dunga Tax lakhai reng reng ama phalna thang lova la an um chun action an lak ding thu insuo a ni bawk. Tuiruong dunga Tax lak thu le inzawmin HPC(D)-P chun organisation dang a sukbuoi ngai naw ti le Pu Vala hmingin HPC-P chun tax a lak ngai naw thu Date 3, Nov. 2017 khan hrilfiena a siem a. HPC (D)-P chun mi dang thilthaw a khak buoi ngai naw lai zingin Chairman pawl chun HPC (D)-P thilthaw dang tumna um ngeia hriet a ni leiin December 6, 2017 khan Pu Lalthawmlien President, Hmar Inpui, Barak Valley Region, Pu Abraham Keivom President, HNU, Assam le Pu Hnethang VCP, Hmarkhawlien-ah an hmupui a. Thu umdan hai iengkim hriltlang a nih. Chubakah, kum 2015-a inremna thuthlung nghawng siet thei dinga a hriet leiin President, Hmar Inpui Gen Hqrs.; President, HSA Gen. Hqrs. le Working Chairman, HPCI(D)-C-hai khawm inremna ding zawnga thil a fe naw pal an lau thu overphone-in a hril.

Chun, Chairman HCLF vawihni a phone a, a pick up naw leiin Secretary HCLF phone nawk a ni a, thuhril dinga ruot a ni leiin a buoi thu a hril a, Vice Chairman, HCLF a phone nawk a ni a, sienkhawm a pick up nawk naw bawk. Amiruokchu, inremna thuthlung siem dinga bul tantu inremna siempuitu an ni lei khan President HPC (D)-P chun HCLF Vice-chairman chu inphalam tak pumin mi dang Mobile-in December Ni 10, 2017 a biek thei hlauva, thil umdan inhriettir a nih. Chubakah December Ni 6, 2017 khan Pu Lalthanglien HPD(D) Working Chairman khawm inbiek puiin thil umdanhai inhriettir a ni bawk.

HPC(D) Chairman pawla inthawk tawngbau lawmum lo tak tak hriet hlak nisienkhawm HPC (D)-P chun thutlingah a lak nuom naw a. Amiruokchu, 21,January 2018 khan Pu Remthang chuh Tlanmuola thuoiin thisen suok khawpin an vuok a. HPC(D)-P Walkie–Talkie set le Silaimu iemani zat laklui a ni bawk. An thil lakhai chuh Pi Singlienpuiin pekir dingin a ngen chiema chuh an pek kir nuom naw a. Pu Eleazar (Vala) chun ‘Mobile i chawi chun Phone la, thlahni sungin ka kaphlum vawng tawl ding a nih, chun a ngam chu hunghai sienla Field ah inkap kan tih’ a ti a, sienkhawm Phone a chawinaw hlau leiin an biek thei nawh.

A chung (Tarik Ni 21, January 2018)-a thiltlung le inzawmin Tarik 22, January 2018-in thil umdanhai chu President, HNU Assam; President, HMAR Inpui (HI), Barak Valley Region; Vice President le Secretary Hmarkhawlien VC-hai chu HPC (D) President-in inhmupuina neiin boruok thanaw zawnga fe an lau bakah thina chen tlung el thei a ni thu a hril a; hienga boruok a fe pei a ni chun ama level a chun thawthei a nei taknaw thuhai hrilin ‘Ka naupanghai hih an hringna chan khawp raka indaw dingin tukhawm ka nawr lui thei naw ’ ti thu a hril sa bawk. Chun, hi thiltlung le inzawma VC le hotuhai thurawn pek angin an um lai ngei Pu Lalthanglien Hmar, Working Chairman HPC (D) Chairman pawl khawm vawi tam tak biek tum ani a chu phone a pick up naw leiin biek paw thei lovin a um.

Date 22 le 26, January 2018 zan Pu Rama Fin Secretary, HPC (D)-P In hluo, a um naw kar Kawtkharpui kalna Tala le Bathroom kawtkhar chu mi pali Silai chawiin an lo zei thlak a, an in kawlhai khawm kei thovin ‘ Hi in hluopa hi misuol a nih, kan that ding a nih ‘ tiin an hril a. Hiengang hih a ni ta leiin HPC (D)-P action Team-hai chun an ngaiven ta a. Date 27, January 2018 khan Pu Vala kuoma thupe hlaktu Pu Norbar Sanate an tuok fuk hlau a, invetuoa um an ni ta leiin kut an thlak tah a nih.

Hringna inlak chen a hang tlung el hi HPC (D) chun pawi a ti tak zet.



Sd/-
REUBEN LR HMAR
Information & Publicity Officer
Hmar People’s Convention (Democratic)
General Hqrs. Sinlung

Sd/-
SOLOMON HMAR
Information & Publicity –Defence
Hmar People’s Convention (Democratic)
General Hqrs. Sinlung



                       


               

Post a Comment

Powered by Blogger.