~ Jami Darngawn
Columnist, Virthli
✍ Awleh, hla siemtu chun "Harsatna Lal hmêl hmuna" ti'n a lo inzawta harsatna a'nthawkin Lal hmêl chu a lo hmu chieng hle chu ni ngei a tih. "Harsatna a dang ala um am ?" a ti nawk thei chu ana pui ve tak chu a nih.
Ani ngei hi khawvela ei châm sung hin harsatna tuok naw ei um ring a um nawh, amiruokchu harsatna hai hi a tuok rawn deu le vangduoi deu hi ei um ni'n an lang. Kei ngei khawm ka hringnun ka hang sui chet chet chang chun mi vangduoi laia tiemsa chu ka ni ve ni'n kan hriet, ka vangduoina hai lei hin harsatna le rinumna tamtak chu ka tuok ve hlak bawk. Sienkhawm, Lalpa Pathien hratna zar chauin beidawng ka tum ngai nawh, Lalpa Pathien a'nthawkin hrietthiemna ka ngen lem hlak a nih.
Ka naupang têt lai a'nthawkin tuchena (kum 40 mi ka ni) ka um dan hai ka hang ngaituo kir chang hin ka harsatna tuo khai kha lo tuok naw lang, inhawi deuin ka duthusam angin lo um lang, Pathien hi iengtiklaikhawm ka mamaw ka ring nawh. Ka harsatna, vangduoina, ka retheina hai le ihin Lalpa chu ka ko ngûn hle hlak kei misuol nu hin. Inhawi ka ti lai nekin harsatna ka tuok chang hin Lalpa Pathien ka ko ngûnin ka bel ngûn hlak leiin harsatna hi Lal hmêl hmuna'n ka lo hmang ve hlak a. Chuleichun ka ruolțha tak chu "HARSATNA" a nih ka ti ngam a nih.
Thlaihai khawma thil tirdakum hai hieng bawngêk le ârek hai a'nthawka vitamin țha an dawng hlak angin, ei ni Ringtuhai khawm hin harsatna tamtak a'nthawkin Thlarau malsawmna ei dawnghlak a nih.
Chun, ei hriet ding pawimaw pakhat chu harsatna/ beidawngna hi Setan hmangruo pakhat ve a nih ti hi hriet kar a țha. Harsatna/beidawngna ei tuok chang hin Lalpa Pathien ko/bel hlak ei ta. A ma chun mi hung dawn ngei a tih. A mi hung dawn intak deu chang alo um hlak khawma nghak fan fan a țul hlak. A ma chun iengkim ei țhatna dingin a mi thawpek hlak a nih.
Ka ruolțha HARSATNA chun hi khawvela ka chamsung hin mi kiensan zai rel naw nih a, kei khawma Lalpa Pathien hratna zar chauin lo pawl thiem/lawm thiem chu ka tum zing a nih.
Harsatna pumpel tumin țawngțai ngai naw inla, harsatna/ beidawngna ei tuok chang khawma ei hrietthiem/tuorthiem theina dingin ei Pa Vana mi kuomah hni hlak ei tiu? Chu chu Ringtu Nun dan ding reng a nih.
LALPA'N A HMANGAI CHE
