Aizawl, 07 Nov, 2017, Virthli (ONP): Mizoram Journalist Association (MJA) General Headquarters Executive Meeting vawisuna nei a chun Mizoram regiona Virthli Admin ni lai mek Tv. Henry Lalhlimum @ Henry L Khojol, tuta Mizoram local English daily paper ‘The Mizoram Post’ le ‘Newslink’ hai bakah ‘Newmai News Network’ le regional paper hran hrana reporter/correspondent ni lai mek chu MJA member dingin a lo lak lut tah.
MJA member ni hi Mizorama ding chun thil namei a ni nawha, a tlawm tawpa kum 5-7 lai journalism practice a ngai bakah member dinga hnina (application) khawm vawi 3-4 lai thelut a ngai hlak a nih. Tv. Henry hi kum 4 le a chenve vel chau la practice sien khawm, a nunchang a tha el khelah, a taima lei le contribution a nei tha em leiin member dinga pawm a nih. MJA member ni nuoma thenkhatin kum 15 lai an hni hnung khawma an lak lut nuom naw laiah lak lut a ni hi lawmum ei ti hle.
MJA member hai chau hi Mizorama ding chun journalist tak taka ngai an ni a, sawrkar anthawka hamthatna khawm an ni chau hin an dawng theia, accreditation khawm inhlan an ni hlak.
Tv. Henry hin nikum April thla a Shillong-a India-Myanmar Media dialogue nei tum khan Mizoram aiawin paper a lo present ta a, chun tukum November 2-6 sunga Asia’s largest International Film Festival and Forum on environment and wildlife and media workshop, New Delhi-a nei zo tah a khan Northeast anthawka paper present dinga journalist 6 thlang suok hai laia thang phak ve a nih. Sienkhawm a hun takah vuongna ticket an siemfel (arrange) pek thei ta naw leiin a thang thei ta nawa pawi ei ti pui hle.
Chun ama hi tuhin HSA, Aizawl Jt. Hqrs ah Vice President ni lai mek niin, Virthli-a Mizoram sung a bikin ei hnam issue le inzawma chanchinthar mi puongdar pek hlaktu a ni bakah, Mizoram local paper a hai ei issue puongdar dinga nasataka hma mi la pek hlaktu a nih. Tv. Henry le Pu C. Lalrambuatsaiha, Aizawl Post editor hai hi ei ni mi Hmar tawng hmang thei Mizoramah journalist ei nei sun an nih.
Hieng ang nina a nei thei hi Virthli chun ei lawmpui tak zeta, hnam khawmin ei tangkai pui ngei ei beisei. A news report hai hi The Mizoram Post, Newslink, Newmai News Network le www.zoramobserver.com a hai hin tiem thei a nia, Northeast Today, The Telegraph le a dang dang a hai khawm a lo contribute hlak a nih.
