Jiribam, October 03, 2017: Hmar Students' Association, JHQ Jiribam hnuoia um, B. Huonveng Unit chun, vawisun khan HSA kum 78 a tlingna le inzawmin, hunser ropui takin an hmang. Hi hun hi sun le zan program hmang a nia, sun hunah Tv. Lalhuollien in hnesaw takin a țhuoia, țhanghlui hlasak thiem, 'Zotlang ding D' Pi F. Rohlupui of Ankhasuo, Tv. Ramnunmawi of Saiphai le local artiste haiin zai an in awi bawk. Hi hun pawimaw taka hin Upa Lallawmsang, Advisor, HSA JHQ chu khuollien niin, Upa L. Dinthar, Retd. Mission Teacher chu Khuol chawngpu in a țhang bawk.


Khuollien le khuolchawngpu haia inthawk thu țha tak tak ngaitlak a nia, Khuollien, Upa Lallawmsang chun, P.A to Ashab Uddin, local MLA a nina zarin, kumthar HSA Day hunah community hall thar nei hman dingin an tiem bawk. Ama (Upa Lawmsang) in, vawisuna inchuklaihai hin, tum neia inchuk a pawimaw zie hrilin, lekha thiem, thiemna nei le hmelțha țha in khawpui an pan hai hi pawi ati thu a hrila, mani piengna, seilienna ngaipawimaw dingin a hril bawk. Sun huna hin Tv. Eden H Pena, Secy, Education in, student report a peka, inchukna tienga hlawtlingna changhai, class ten a inthawk chungtieng mi 21 hai kuoma lawmpuina certificate inhlanna a nei bawk. Covenant English School B. Huonveng, le Chotobekra High School Student haia inthawk cultural dance en ani bawk.

Khuolchawngpu, Upa L. Dinthar khawmin, inchuklaihai chu hlawtling ngei dinga inchuk a pawimaw zie a hril bawk. Zantieng huna refreshment inhnik tak, Arsa le pulao (Chicken rice) sem a ni bawk.

Zan hun program hi Mr. Barjohna le Nk. Lalțhazuol haiin hnesaw takin an țhuoia, hlasak thiem, lâm thiem haiin an talent ropui tak tak an suklang bawk. Mipui an phûra, hun ditkhop lo taka hmang a nih. (Input: Eden H Pena)

Post a Comment

Powered by Blogger.