~ Jami Darngawn

Thuhriltu 12:
1. I țhalai nihaia chun nangma Siemtu che chu hriezing la, kumhai a hung hnai a, ni țhanawhai a hung tlung hma le; chu huna chun, "Annia chun inhawitina ka nei nawh," i tina hun a hung tlung hma hin;

Mihriem hung pieng taphawt kut le ke kim le, lungril pangaitak puthai ta ding chun Vanglai/Țhalai hun hi ei hmang țangkai seng ring a um, a țhen chun an vanglai/țhalai hun chu an lo hmangliem tawl taha, a țhen chun ei hmang meka, a țhen chun an la hung hmang ve ding chau a nih. Chulaichun ei vanglai/țhalai nihai ruok chu ei hmang dan chu inang kher naw nih. Kei ve bawk khawm hih. Vanglai/Țhalai hun tawite chu ka lo hmang ve bawka chu, Kohran le Khawtlang thila kan hmang tam naw hle a. Asanchu ka hriselna ațhat tawknaw lei le, ka U nunghak ala um leiin kei țhang ve kherlo khawmin a thei tho lei a nih. Kum 20 char chu ka Pa insungah ka khawsa/um a, kum 4/5 vel chu nunghak hringnun chu ka lo hmang ve a nih.

Awle, Tuta țum ei hang khekpui nawk ding hi chu a chi alo dangkhawm ani thei a, sienkhawm rawngbawlna pawimaw tak niin anlang leiin kei mi țawmkailo tak hin Nungak le Tlângval hai abikin ka hung infui/incha nuom cheu chu hihi a nih.

Tulai ei khawvel ei thlir chun thil iengkim hi a danglam ta em ema, ei Pi le Pu ha'n tienlaia "Tlawmngaina Nun" an lo nei hlak kha a bo tiel tiel tam mani aw ti dingin a um laiin, mi țhenkhat chun ei pi le pu hai tlawmngaina nun kha ei la vawng/chel hring zing hi lawm ava um ngei de aw!
Ei pi le pu hai khan sietni țhatni a hai an tlawmngaina kha an insuo nasa em ema entawn tlak anni hrim a nih.

Tulai eini nunghak tlângval hai khawm hih. Kohrana khawm ei theitawkin inhmang ei ta, khawtlang a khawm ei thei tawkin inhmang tum ei tiu.

Nikhat laikhan mithi ralin ka fe a, ruo a sur nasa bawk, ka lungril chun "thlân cho ding mi an um diem aw?" Ka ti lungrila thivui a hun chun thlân tieng ka'n fe ta ngeia, ruosur pum chun tlângval haiin thlân an lo cho kha alo na, mithivui zo charin tlângval hai chun an hmangruo hai an liengko ah putin an thlantui an bienga hung lungthla pum le, an zakuo le kekawra pilsen kawp puma intieng an hang inhawi tawl kha chu en ava mawi ngei de aw ! Ka en liem vawng vawng el a nih.

"Aw tlawmngaina nun hmang indik tuhai chu an va mawi de! Siemtu Pathien mita khawm mawi ngei an tih"
Ni e, nunghak hai khawm mipui hungkhawm hai dangchar ding phal lova fel em em le mawi em ema, hnampuon laia chikhat chu anbia zakuo dum leh mipui hai lai thingpui an hang sem hi chu mawi ka va ti ngei de! "Siemtu khawmin mawi ti ngei a tih"

Chu el khawm chu ala'n nawh ie, zana mithi Lu mengpui a țul leh zan khawvarin an mengpuia, chu khawm chu an rawl neisun hai inro țhak lovin lusun hai hnemna'n hla an sak khawvar hlak kha anna, zan iengzat mani lusun hai an la lengpui bawk. "Malsawmna chu dawng ngei an tih"
Ringnaw tuhai mi'n hnarna chu Lusun nia Kristien haiin Pathien thu ang taka Pathien thu le hlaa eiin hnemtuo hlak hi a nih.

Chuleichun a bik takin Țhalai inti popo hin, ei Țhalai nia hin a mi Siemtu ditdanin ei hringnun hai hmang ei tiuva. Lawmhai lawmpuiin, Țaphai țappui hi Lalpa thuzawmna/rawngbawlna pawimawtak laia pakhat ani leiin inthlada lovin tuta neka nasa lemin ei Pi le Pu haiin an lo thaw thei chuh "khaw he" tiin nasa nawk zuolin mihai entawn/inhnar khawpin le Lalpa ei Pathien rawngbawlnaa ngaiin. TLAWMNGAINA NUN hi vawng țha zing ei tiu. Chuongchun, Pathien malsawmna'n mi zuipei ngei a tih.

Post a Comment

Powered by Blogger.