~ Thangṭhasiem, Parbung

Tar kûn a dam ti tak ah, tar pienken le hmelhmang put dan, inthlakdanglam dan le an khawsak dan hai, an sirbi la sir chie naw ta ding khawma, an dikna tam tak hmu thei le hriet thei a nih. Phet le phuta tar el thei khawm an nawh a, kumpui inher velin a kum tel in a zai in, tha le zung, taksa le ngaituona lungril chen a herhawp hret hret a, kum a tam pha taksa bung hrang hranghai ṭhatna le mawina dâm chenin hnungtienga thil umhai thlîrletna le hmabak beisei ding um ta lo khur thimpuiah a hnûklût ve thung. An ngaituona khawvel sir thei ta lo reng reng dingin kumpuiin a khuop det tlat thung. Chu pha pha chu, tar khawvel ah an cheng ṭan tah tina a nih.


Hieng ang hin hang ṭheṭhawp inla:

1. AN DUNG A TAWI: Vanglai huna fit nga fit ruk deu thaw hai khawm, fit thum fit li boruokbak an hip phak ta nawh.A dam sawt sawt an dung a tâwi deu deu. Ruongzang ru tlun pet pawt, in ar arten tawn khawm, tar khawvel ah an inpemlut phat chun, ruongzang ru hnungtieng zâwngin in ṭhang a tuma, a pâwng pei a, a tawpah inkui kâk in an um hlak.
2. AN HMAIDUNG ASEI: Vanglai huna hmai cheng kek kukhai khawm tar kawtkhar ah an lut pha chun, an hmai a sei deu deu a, bâwk/chal a kawl deu deu bawk a; hmai a sei zawngin an ṭhang hlak.
3. AN PHINGPUI A HADAM: Thil an fakhai hai sawichiptu ding ha an nei ta naw leiin, thil nem-in-no bak an fak thei ta naw leiin, an du tâm, an du naw tâm, an fak thei zawng an thlakdanglam zo ta a, an phingpui in thil in uoi le ngar hai sawi chip ding a hmu ta ngai nawh.
4. A SIE TIENG NEKIN A ṬHA TIENG AN FILAWR HLAK: Kumpuiin a herhawp hrep ta hnung, vun hai khawm zie dung zie khang in a ṭiel suok vawng ta hnung khawm an vanglai nihai a chun, kawng khat beka an ruolhai neka chungchuongna a ma nih, filawr ngakna nei vawng le luck tak tak an nih.

TARHAI CHENGNA KHAWVEL

1. INPHALAMNA: Inphalamna a sip an nih. An phalam naw awm deua  inlang hai khawm, a ruk taka inphalamna nei vawng an nih.
2. INTHLAHRUNGNA: Inthlahrung awl em em, “Ka thawsa, ka ngaituo sa”, ti zawnga hang ṭawng khum met khawma intim dawr dawr hlak an nih.
3. HNAWKSAK UM: Sung le kuo ta dinga hnawk sak le phurrika in ngaina rieu an nei hlak.
4. PAU ZO LO: An ṭawng bau suok le thu khaw chang hai chen thuah pawmpeklo/ ngaipek ta lova inngaina nei an nih. Ngaidan ṭhing, ditdan ṭhing ang a ngai pek chun an hmur ṭhui pingtu a ni hlak.

HANG TAR TÂK RAL A CHU:
1. Mo mitmei veng dawr dawr a, thlanmuol liem ding ani el,
2. Bu pawk, thil but inphie ngawt ngawt ka nghawk an ti khawma, to rieu rieu bak chu,
3. “A them hnung ka tirdak…ka ten” dam mi la ti ding an na !
4. “A rim a sie, a bal” khawm mi la ti sa pei ding an na!
5. “Tarpa…..Tarnu” dam mi la ti nawk nghal an ta,
6. Hang inti thu deu in la hlak, “Tar kawngkawi, a thu dit dit leh. I nu I pa nang ku hin enkawl vawng rawh”, ti pek nawk an ta,
7. Du zawng le chak zawng hril ngam mei mei na ruol in kaw ta naw nih a,
8. El tam in an mi hang bawisawm chang hlak bo lo ding,
9. “Nu. Pa, iem I du a, iem I châk a?’, mi ti kher rngai naw ni hai a,
10. ‘I pi, I pu puonpha le thuomhnaw hai bal tang a tih...khawm’, ti kher kher da’l thei bawk an ta,
11. A mi pantu le ruol nei chang change duot hlaw ve phak ṭawk,
12. Hmel tlai hieu a, “Nu hi aw! Pa hi aw!”, khawm an mi ti da’l thei a,
13. Anni hriet tawk chauva hmur inphu sep sep chang hlak bo lo ding,
14. Thi ni khuo a ruok chu ‘Awle Mitthli’ in mi sawp mei ding a na?.

TAR HANG ENKAWL DING NI LANG CHU:
1. Hmel tlai hieu in, duot takin a sun a zanin bawisawm ka ta,
2. A du zawng le a fakthei zawng le a taksa thatna chi hai ngaituo pek ka ta,
3. A ruol le paihai le inpawlhlimna dinga ṭulhai pêng kata,
4. Khawlai an la suok thei leh, thuomhnaw inchawitawk le fai in inthuom tir ka ta,
5. A silfen le taksahai fai takin sawp pek ka ta,
6. Ka changzie le ṭawngbauhai hmangaina a sip in inlangtir ka ta,
7. ṭawngbau ṭhanaw le insang hrim hrim, a hriet phal ngai nawng ka ta,
8. “Ka nu, ka pa thu thu”, ti chu a hmasatak a sieng ka ta,
9. Inphalam le inthlahrung, hnawk sak (phurrik) le pauzolona khawvel chîm bak ah in cheng tir bawk ka ta,
10. Fe nuomna le leng har nuomna a nei khawma; ka nei phawt chun, vuongna le motor hai hmangin ṭhuoi hlak ka ta,
11. Inkhawm fe hun a hai Motor-in phur ka ta, a thawlawm ding pe’ng ka ta,
12. Mithi ral le lawm thilpek dinghai ngaituo pek ka ta,
13. Khawmuol I zir ang peiin, taksa lum le dei an hmang dan ding ngaituo pek ka ta,
14. Zun le êk thak thei naw chen khawm, an dam phawt chun, mi dang in them tir ngai naw bawk ka tih.

12th April, 2015

Post a Comment

Powered by Blogger.