CCPUR, Aug. 2, 2017: Zani Silent Rally/Procession mipui sangtelin an neia DC, CCPur kutah Memorandum an peklut hnungin JAC Against the Killing of Mr. Thangkhanlun Taitom in vawisuna CCPur Khawpui sunga 6AM-6PM Total Shutdown an ko chu ni dang Total Shutdown ko ang lo takin CCPur mipui, hnamtin le pawl tin inzawmkhawm hai support a hlaw hle a nih. Ni dang ang a ni nawh. Sawrkar Office, Bank, School, Dawr le Bazar hai kharin, mi inlawn le motor inlawn hmu ding a vang hle a, a huopsa lo dinga an lo puong tah hrim hai chau inthlazal an nih. Hi JAC hi hnam tum tum Inpui Inzawmkhawm, JPO, Students bodies tum tum hai indin a nih. Total Shutdown in a huom sa lo dinghai lai Medical, Water Supply, Electricity, Religous programmes, Airport drop & pick-up, Media and Press, Fire service hai a ni a. Security Forces hai motor chen khawm khau taka danga an fena ding chen Shutdown kotu hai chun an indawn pei a, anni chun an support ve thu Shutdown kotu hai kuomah an hril a nih. Pawl tum tum hai chun Mr. Thangkhanlun
Taitom thi dan hi an demthu an puong a, mipuiin silai chawi pawl UGs hai chetdan dit naw tam tak an nei le tuta hmaa thil tlung dit naw tam tak an lo nei tah hai dodalna leh inkawp a Mr. Thangkhanlun Taitom CCPur a dawr pakhat TP Electricals Store a Rs. 10 Lakhs inruk hmangna thu leh inzawma vuokhluma a umna chu dan lo a nih thu Shutdown thawtu hai chun an hril. A thina case hi sawrkar in dan ang taka rel dingin an nawrnaa Total Shutdown hi an ko a nih. Hmatienga an hmalak pei dan ding ruok chu chanchin ei lakkhawm lai hin ei la hriet thei hri nawh.
December 10, 1948 a United Nation General Assembly in khawvel pumpui huop a mihriemin Chanvo a neihai puongna (Universal Declaration of Human Rights) a lo nei tah, UNO-a member taphawt in chu puonga um ‘Human Rights’ chu Inchûknain (School) le Inchûkna insanghai po po ah mitin hriet a thedar dingin Khawvel a ram po po an hriettirin, hrilin an um a. Chu a puong le inruola Articles an duonghai lai Article 5: Mi tukhawm hremna mani mihriem hlutna sukhnuoi khawpa insawisakna, nunrawngna le tuorna nasataka inumtir a thieng nawh thu hi thina le inzawm hin Human Rights Activist le Social Activist ni bawk chun a hril.
Rukru le misuol khawm ni sien nuoma mi sukhlum el theina tukhawma an nei naw thu le dan ang taka sawrkar tienga thuneitu ha'n ro an rel a pawimaw thu a hril bawk.
