July 26, 2017, Virthli (ONP): Eini laia ballpet ei ien tlangpui le club tan ei hauna tak English Premier League (EPL) a tuta season thar team kaitharhai chanchin tlangpui ei hung tarlang ding a nih.

Tuta seasona EPL kai hmasatak chu Brighton & Hove Albion hai an nih. 17 April 2017 khan Wigan Athletic 2-1 a an hne a, chu khelah Hudderrsfield Town ha'n derby County 1-1 in an in-draw pui khan an kai ding a chieng an'tah. Brighton hai hin kum 1983 hnunga English football a level insangtak an inkhel nawk na ding chau ani a, Premier League chie lem hi chu an chanchina an inkhel vawikhatna ding chau anih.

Club kaisang a pahnina chu Newcastle United niin, 24 April 2017 a Preston North End 4-1 a an hne tum khan Premier League ah an kir nawk nghal ding an sukchieng anih. May 7 2017 khan Barnsley 3-0 a hnein EFL Champipnship 2016/17 champions an ni nghe nghe.

Club kaisang pathumna le tawpna tak chu Huddersfield Town hai an nih. An ni hin 29 May 2017 khan EFL Championshiap final ah Reading FC hai hne in kum 45 hnunga English football level insangtak an pet nawkna ding chau ani a, Premeir League an vawikhat inkhelna ding ani bawk anih.

1) Brighton & Hove Albion F.C:
The Seagulls hai hi Chris Hughton in a enkawl niin Falmer Stadium (American Express Community Stadium), mi 30,750 inthungtheina a inkhel hlak an nih. Chris Hughton hin Premier League ah Newcastle United le Norwich City hai a lo enkawl ta hlak a, chu bakah an player hai hieng; Steve Sidwell, Glen Murray, Liam Rosenior le nikuma EFL Championship Player of the Year Anthony Knockeart hai hi Premier League lo inkhel ta hlak vawng an nih.
Player ngaiven hlaw dinga beiseihai: Glenn Murray, Anthony Knockeart le Lewis Dunk.

2) Newcastle United F.C:
The Magpies hai hi manager hlawtling le inlar em em Rafael Benitez in a enkawl niin mi 52,354 inthungtheina, Saint James' Park a inkhel hlak an nih. An manager le an player hai hi a tlangpuiin Premier League lo hmelhriet ta sa deu vawng an nih a, chu el khelah kum khat sung chaua Championship a'nthawka Premier League hung kai nawk thei an ni leiin an nep naw hle ding anih.
Player ngaiven hlaw dinga beiseihai: Dwight Gayle, Matt Ritchie le Jamaal Lascelles.

3) Huddersfield Town A.F.C:
The Terriers hai hi Dav id Wagner in a enkawl ani a, ama hin Huddersfield a enkawl hma in Borussia Dortmund II a enkawl hlak a, Premier League ah sulhnung iengkhawm la nei lo anih. An ni hi John Smith's Stadium (Kirklees Stadium), mi 24,500 inthungtheina hmuna inkhel hlak an nih. An player hai hieng; Dean Whitehead, Tom Incele Jonathan Hogg hai hi chu Premier league lo inkhel ta hlak vawng an nih.


Player ngaiven hlaw dinga beiseihai: Elias Kachunga, Aaron Mooy le Tommy Smith. 


Post a Comment

Powered by Blogger.