CCPUR, July 27, 2017, Virthli (ONP): July 27, 2017 (Ningani) sun dar 11:30 AM - 1:30 PM khan RWUS Training Hall, Sielmat, CCPur ah Rural Women Upliftment Society (RWUS) le Women in Governance (WinG) hmalakna le huoihawtnain Hmar Customary Law le inzawmin interface meeting Hmar hnam sunga pawl tum tum thuoituhai lai buotsai a nih. Hi huna hin Hmar Customary Law le inzawma abik taka nuhmei hai harsatna chungchang thu chipchier taka hriltlang le Hmar Customary Law la ennawn le siemthat a ni theina dinga an hmatienga Hmar Inpui, Gen. Hqrs ah thil umdan intluntu dingin Independent Working Group pakhat nei a ngai thu le indin vat dingin tha an ti tlang a nih. Hi hun hi Mr. Dennis Lallienzuol, Youth Advocate, Major Group on Children and Youth, United Nations chun Moderator a thangin a'n rawi a, Facilitator in Ms. Deborah Infimate, Proj. Coordinator, WinG-North East India a thang bawk.


Hnam pumhuop a thuneina pek an ni anga Hmar Customary Law hi HYA, Gen. Hqrs in a sut chu hmang mek a nih a, Hmar taphawtin inkhuongruol taka hmang le zawm a ni theina dinga hmalak dinga rel tah. Hi le inzawm hin revised and enlarged' thaw dinga 8th Hmar Inpui Assembly VTI, Rengkai, CCPur a 12 & 13, Feb. 2016 a kha Agenda le Resolution 5-na a khawm lo um tah le hi thil hi HYA General Conference hmasataka 'publishing/guardianship' chungchang khawm thutlukna hung siem dinga thurawn pek dinga lo remti tahsa a nih thu hi huna fiel ve a um Hmar Inpui, Gen. Hqrs aiaw hai chun an hril.

Hi hun hi Notheast India huopa Women in Governance (WinG) in a lo ruoi research thawtu Dr. Immanuel Zarzosang Varte khawmin uopin hun a hmang ve.

Hieng lai zing hin State thenkhat a chun Hmar Customary Law chu hnam pumhuop a sukfel a ni hma'n English a inlet tah le Govt. ah tul le pawimawna leia lo pelut tah khawm an um a hril a nih.






Post a Comment

Powered by Blogger.