Aizawl, 28 September, 2016, Virthli (ONP): Hmar people’s Convention (Democratic) le Mizoram sawrkar inbiek hun ding kha hmaa Mizoram Home Minister R. Lalzirliana in October ni 4 a ding a lo ti chu October ni 5 ah sawn a nih.

“October ni 4 ti kha tentative chun kan hei tum sin phawta. Sienkhawm October ni 5 a di’n ti nawk a nih”, tiin Mizoram home department additional secretary Lalbiakzama chun ‘The Aizawl Post’ chanchibu a hril.

August ni 10 a inbiekna a khan September thla lailunga inbiek nawk dinga ti a na, sienkhawm buoina dang dang leiin thla thar October a di’n sawn a nih.

Inbiek hmasa Chaltlang tourist lodge a nei tuma khan Mizoram sawrkar chun HPC(D) palaihai chu August thla sung HPC(D) thil phut- inrelbawlna hran nei chungchangah rawtna (proposal) thelut dingin a tia,hi hi HPC(D) palaihai chun September ni 3 khan email hmangin Mizoram sawrkar kuomah an thelut.

Pu Lalbiakzama chun HPC (D) thu thelut hi October ni 5 a an hriltlang ding tak a nih ti hrilin, hi chungchang a hin Mizoram sawrkar ngaidanhai hril ni bawk a tih, ti'n a hril.

The Aizawl Post chanchinbu in a tarlang danin HPC(D) tieng hin Nilaini khin Mizoram sawrkar anthawkin inhriettirna dawng an inbeisei thu an hrila. Sawrkarin inbiek hun ding anhriettir pha leh palai ding ruot fel ning an tih tiin HPC (D) palai Pu Lalthalien chun phone-in The Aizawl Post a hril.
“Inrem tuma inbiek kan nia, lungril inhawng takin inbie’ng kan ta, kan inrem thei ngei khawm kan beisei a nih,” tiin Pu Lalthalien chun The Aizawl Post a hrila, HPC(D) tieng khawmin beiseina insang tak an nei thu a hril bawk.

Post a Comment

Powered by Blogger.