Aizawl, 27 July, 2016, Virthli (ONP): Sinlung Hills Accord Implementation Demand Committee (SHAIDC) in Mizoram sawrkar le HPC ha'n kum 1994, July ni 27 a inremna thuthlung (accord) an lo ziek tah, kum 22 lai a liem hnung khawma vawisun chena sukpuitling (implement) a la ninaw chungthuah inhrilfie ding le accord sukpuitling dinga Mizoram sawrkar, Gauhati High Court, Aizawl bench ah a khingna chu vawisun July ni 27 khan second hearing nei a nia, sawrkar ukil hai chun respondent department hai an lan zo naw thu suonlamin inhrilfiena hun dingin karhni lai an hun hni belsa.

SHAIDC hin May ni 25 khan Gauhati High Court, Aizawl bench ah Mizoram sawrkar khingin kum 22 liam hnunga khawm HPC accord implement a ninaw nasan inhrilfie dingin a ti a. Senior ukil pahni Pu Prusthy le Pu Neichunga Darlawng hai chu complainant (SHAIDC) ukil dinga ruoi an nih. June ni 22 khan hearing vawikhatna nei a nia, hi huna hin sawrkar ukil hai chun respondent department iemanizat hai kuomah thu (information) an la lak khawm a tul thu hrilin thlakhat lai hun an hni bela. Chuleichun vawisun khan hearing vawihnina neinawk niin sawrkar ukil hai chun department an lan zo naw leiin karhni hun an hni belsa a ni thu, SHAIDC thuoituhai in ei palai an hril.

Hi le inzawm hin SHAIDC thuoituhai chun dawthei taka lo nghak fan fan dingin mipui an ngen bawk a nih.

SHAIDC Chairman Pu Vanlalsiama anthawka thu ei dawng danin sawrkarin respondent department dinga a ruot pakhat hi SHDÇ a nia, tulaihnai khan SHAIDC thuoituhai chun SHDC chairman Pu Hmingchungnunga chu a office ah inhmupuiin amachun sawrkar GAD anthawkin notice an dawng thu le implementation iengkhawm a um nawh ti in sawrkarah report pek an tum thu Pu Hmingchungnunga hin SHAIDC hai chu a lo hril a nih.

SHAIDC hin February thla khan Chief Minister Lal Thanhawla kuomah accord sukpuitling ding thuah thlakhat sung inhriettirna (assurance) pe dingin ziekin ngenna an lo thelut ta bawk a nih.

Hienga Mizoram sawrkar khing a ni taka chun court sengso man le ukil ruoi man a to em em a, SHAIDC khawm nikum lai el a indin a ni leiin a nei a chuong liem a ni bik naw leiin sum a harsat thu Demand Committee thuoitu hai chun an hrila, chuleiin mipuihai, thahnem ngaia ram le hnam ta dinga kal pensuok dingin an ngen tak meu a nih.

Sum le paia thangpui thei hai chun a hnuoia Bank Account a hin iengtik lai khawm SHAIDC chun lawm takin a dawng thei zing a nih.

BANK ACCOUNT DETAILS
Holder: Sinlung Hills Accord Implementation Demand Committee
A/C no: 1439050013217
Branch: Aizawl
Branch Code: AZLH57
IFSC Code: UTBI0AZLH57 (5th Character is Zero)

Post a Comment

Powered by Blogger.