Virthli leh Pu Lalthomlien Hmar hohlimna le Mipui hmaa a thuhril

Assam Assembly Election 2016 a 13 - Lakhipur Assembly Constituency a ngir tum le candidate hai laia riva nei nasa pawl tak Pu Lalthomlien Hmar chu Virthli in hohlimpui tumin hunremchang a zawnga, hun inteptak kara inhawng takin hohlimna hun a hranpa tawp in a hung buotsai a, ahnuoia ang hin holhimna tawite neipui a nia, chun a hnuoi takah mipui hmaa a thuhril (Vai tawnga) ngai nuom hai ta dingin a link sie a ni bawk a nih.


# Virthli News = VT
# Pu Lalthomlien Hmar = LTL
-----------------------------------
VT: Pu Thoma, 13-Lakhipur Assembly Constituency ah Janata Dal United (JDU) candidate dingin nomination i file a, rorelna indik suolsuok dinga intiem thu nikhat lai el khan Virthli khawm i hril a. Kha thu le inzawm khan hohlim vak inla tuta Chairman, Barak Valley Hill Tribe Development Council (BVHTDC) hi iengleia i tlansan tum am a ni a? Development Fund hi a mumal naw lei am? MLA ni hi a hmaa i lo tum reng?
LTL:  Chairman ka nina hi tlansan nilovin Hnam hmasawnna ding chun chan ngam a ngai lem a ni lem. Development Fund hi nawr hrat a ngaia, Kum 4 sung hin Council umtira inthawkin fund hmu popo nekin fund hi a let 13 vel in hmu ani lema, nawr danin a zir la ngai. MLA hi tum reng naw langkhawm Pathienin rem a hung ruot tak meu ani lem. Thil fedan popo ngaituo hin MLA hi Council Chairman nekin thil pawimaw hai an thawthei lema Assembly ah member niin mi aiawtu indiktak ani leiin.

VT: Chairman, BVHTDC kha Term (Kum) iengzat am i chel hman a? BVHTDC hin ama area sunga mipui sukhmasawnna khawp sum a nei thei dan a um naw mani?
LTL: Kum 4 le Thla 2 an tah tuchena hin, Area suk hmasawnna khawp hi sum hmu ding State le Central sawrkar cheltu Hmar nau pakhat khawm ei um si nawa, Sawrkar a rawl nei thei ding hi a tul a nih, chu chuh lampui umsun a nih.

VT: BVHTDC hmatieng ding hi iengang tak am a ni a? Chairman i lo ni hlak naah indawn pei ta inla. State sawrkar le chauva indawr a BVHTDC hi indin le a hraw ding lampui induong a ni el am? Sawrkar thlungpui a hung inrawl am?
LTL: MLA ka lo tling chun, Resignation ka pek charin BVHTDC hi Chairman thar siem ning a tih. BVHTDC chauh nilovin Assam a hin Development Council 26 a um a ta, chu hai chu Common Guideline (for all development council of Assam) siempek a nia, chu guideline chu Finance le WPTBC Deptt siem a nih. Central sawrkar chu an rawl phak nawh.

VT: Cachar phairuoma Hmar mi MLA dinga in candidate hmasatak i niin an hril a. Hihi thudik a ni am? Iengleia tuta hma khan Hmar mi in Candidate an um ngai naw?
LTL: Thudik a nih. Hmar chauh nilovin Barak Vallley (Cachar, Karimganj, Hailakandi) district sunga Tribal mi ngir hmasatak ka nih. Hmar hi ei tlawm leiin a ngir ngam ei um naw a, amiruokchu election hi hnam pakhat vote chaua tling thei an nawh, Pu HT Sanglien kha hei en tum.

VT: Hmar Inpui le HYA Barak Valley Region a President ni lai zing i nisi a, hieng sin pawimaw tak tak i chellai hai hi iengtin am i thaw ta ding a ni a?
LTL: Hnam le thil dang danga hin pakhat chauh leia hring ani naw a, fel le tlak dang tamtak um hai leia hring ani leiin pakhat sin hai hi chawl naw nih.

VT: Nomination paper i file zo a chanchinbumihai inpawlpui huna khan Independent Candidate a ngir dingin thutlukna i siem thu le JD (U), AIUDF le RJD in support an pek che thu i hril a, lo tling ta ang la iengang ngirhmun am chang phak i ta? Beiseina insangtak an siem pek dan che dam i mi hril thei ding?
LTL: Independent candidate ka ni nawa, JDU candidate ka ni lem. AIUDF le RJD in Alliance na a ticket an mi pek ani lem. Ka tling chun Party chun Minister (Independent) an mi pek ding thu an hrila, Barak Valley a Tribal kei chauh ka ni leiin.

VT: Barak Valley ah tribal population thahnem tawk tak el a uma, India in zalenna a hmu a'nthawk tribal mi vawikhat khawm an la thlangtling ngainaw thu hai i hril a. Lakhipur Constituency ringawta tribal voters 17,000 um haiin an support ding che thu le All Assam Tribal Sangha, punji headman hai povin support an pek ding che thu hai i hril bawka iengang chie a ringzo um am a ni a? Thaw suol pal dam in ring der naw a ni?
LTL: Tribal tlangtling thei ding tukhawm an la ngir si nawa, Tribal voter hai hi Decider eini leiin Party tinin an inchu hlak hi ami suktlingtu ding a nih. Party tin in Voters an nei sa reng a um leiin. Organisation hai hi tribal vawikhat candidate ei neina hi a thlawnin in liemtir naw mei niu an tia, nasatakin tuchen hin party workers hai leh campaign an mi thaw pui zing a nih.

Thawsuol pal chu thil umzie hrenaw ei hnam mi thenkhat hai chun an ring, amiruokchu kei chun ka ring nawh. Tling dingin in ringzona a um tlat leiin. Chuleiin thawsuol nekin tribal mipui Lakhipura hnamtin hai tadinga innghat tlak ni hi kan ring lema, asanchu tuta alliance party thanglo hin Assam ah hin sawrkarna an siem theinaw ding a chienga,chuleiin ka lo tlingnaw pal khawma Power (Sawrkar) cheltu a thang ngei ka tih.

VT: Election ding ni tak le inhnukdawk theina hun nuhnung tak ni hriet nuom a um?
LTL: 4 April a election nei ning a ta, withdrawal date chu 21 March 2016 hi a nih.

VT: I hung hlawtling ngei lo beisei kan ta, mi tam tak tadinga malsawmna i hung ni ngei kan lo beisei che a nih. Pathien kuoma kan tawngtainaa hai lo san kan ti che aw.
LTL: Ani ngei, thilthawthei chu tawngtaina chauh hi a nih.

VT: Mipui hmaa lecture ding le a hmu nuomtu che tamtak an um zing bawk leiin, zawna khawm siemsap chuong ta lovin, i hun hlutak imi peka Virthli chun kan lawmtakzet chea, hlawtling ngei dingin ditsakna insangtak kan inhlan che.
LTL: Ka lawm khawp el, Virthli'n in mi hung hrietfuka, ei hnam hmasawnna dingin Virthli hi dam zing sien la, inthanglien pei dingin ka ditsakna kan hlan.

Fulertawl a April 01, 2016 nia mipui hmaa Vai tawnga a thuhrilna tawite upload a nia, alo ngai nuom hai chun ahnuoia hin ngai thei a nih.


Post a Comment

Powered by Blogger.