New Delhi,24 April 2016 ( Virthli News) : Zani, April 23, 2016, chawhnung dar 3:30 khan All Manipur Tribals Women Union thuoitu New Delhi a châm mêk hai le Manipur Tribals Forum Delhi thuoitu hai thangruollin, Press Club of India (PCI) Conference room-ah, Manipur sawrkarin Manipur tlangmi hai hnawchepna dinga bill pathum a lo pass dodalna le Manipur tlangmihai inhumhimna dinga hmalakna le inzawmin chanchinbumihai an inhmupui. Hi huna hin Virthli palai khawm thang ve in, North East besan chanchinbu hrang hranga inthawka palai hai an thang.

Tuta tuma Delhi khawpuia châm mêk, All Manipur Tribal Women Union thuoitu: Pi Nianglian, Pi Ngaihkhanvung, Pi Niangsial le Pi Buonzamawi haiin an Manipur a tlangmi hai tadinga an hmalakna kawngah harsatna chi hrang hrang, inthithaina thangin an tuok thu an hril a. Bill pathum pass le inzawma buoina thenkhat hai a video suklangna an nei bawk. AMTWU thuoitu haiin an hril peina a chun, MTFD keihruoina hnuoiah Sawrkar tienga hotulien tamtak an in hmupui a, an inhmupui hai khawma lawmtaka lo dawngsawngin an thil ngen hai chu sukpuitling pek ngei tuma hma an lakpek ding thu hai an lo hril a nih. A hnuoia sawrkar tieng mi lien hai le politician hai hih Delhi an châm sunga an inhmupui hai an nih:

1.Biswajit Daimary, MP, Bodoland
2. Rabi Thakur, VC ST commission
3. Satender Garg, Jt Secy,NE
4. Vumlunmang Vualnam, Jt Secy Police 2
5. Oscar Fernandes, Cong MP
6. Narayanswamy, Cong NE incharge
7. Tarun Vijai, BJP MP
8. Jual Oram, Minister, Tribal Affairs
9. Sonia Gandhi, AICC President
10. Rajnath Singh, Home Minister
11. Brinda Karat, CPI MP
12. Jitender Chowdhury, Tripura MP
13. Mohan Prakash, Gen Secy AICC
An ni hai baka hin National Media panga le The Hindu haiin inpawlpuina an nei bawk ni’n an hril.
Chanchinbumihai an inpawlpui zova hin, Jantar Mantar (Peace Protest neina hmun)-ah mipui tamtak fekhawm hai lai an rengin thuhrilna an nei a. An thuhrilna hai a chun, Manipur tlangmi po po thangkhawm a hma lak a ngai thu, chu chu an tawngtaina khawm ani thu an hril. Tuta tlangmihai tuorna khawm hi thil thalem le in unauna thalem a hung suokna dinga Pathienin hmangruoa a hung hmang a nih an ti'n, MTFD hai chu chawl lova ni 236 lai an lo inrimna chu lawmum an ti hle a, thangpuina dingin cheng singkhat (10000) an inhlan bakah mipui a fekhawmhai thingpui le beiin an hrai bawk a nih. AMTWU hai chu vawisun (24 April 2016) hin Manipur Governor inhmupuiin, Senapati District Manipur tieng ei tribal unau danghai kuomah hi movement le inzawma inpawlpuina hun hmang dingin New Delhi suoksan an tih.



1

2

3

4

5

6

7

8

9

10

11

12

13

14

15

16

17

18

19

20

21

22

23

14

25

26

27

28

29



Post a Comment

Powered by Blogger.