Hmar nunghak hlasakthiem, hmeltha bawk Bachelor of Dental Surgery (BDS) zo thar chauh, Nk. Ruby Zote le Virthli hohlimna.  Nk. Ruby Zote hi a chinlaia inthawka hlasak hlak, Album le Music Video khawm 7 laizet lo siem tah a nih.

VT: Virthli
RZ: Ruby Zote

VT: Chibai! Keini Virthli hai le inpawl theina hun, i hun hlu tak i mi pek a kan lawm tak zet che.
RZ:  Chibai! Kei khawm in mi hung hriet fuka, inpawlna hun dam in min neipui nuom leiin ka lawm takzet.





VT: I hming indik tak, I pa hming, nu hming, unau nei zat le an hming?
RZ: Ruby Zonunmawii Zote

DoB: 16 Sept 92
Pa hming: Zosangliana Zote
Nu hming: R.Zodinpuii
Unau pahni:
Ka U: Isaac Zodinsanga Zote, SDO P&E, Govt.of Mizoram
Ka sang: Benjamin Zonunsanga Zote, Christian Medical College, Vellore ah MBBS an chuk mek

VT: In chengna hmun tak mi hril nuom i ti?
RZ: D 86-C, Basic Mual, Ramhlun North, Aizawl, Mizoram.

VT: I skul kaina (X& XII) le BDS inchukna hming le hmun?
RZ: Class X chu Home Missions School, Zarkawt Aizawl, Class XII chu St. Pauls Higher Secondary School, Tlangnuam, Aizawl. BDS chu Navodaya Dental College, Raichur, Karnataka hmunah.

VT: I Hobby ? Fak le dawn ngainat zawng?
RZ: Ka hobby chu hlasak le lam (haha). Tlangmi hme hrim hrim hi chu ka ngaina a, sa khawm ka fak thei vawng. Dawn tieng pang chu tui hi inhnik ka ti taka, nikhata litre 2 bek ka dawn hlak.

VT: Tui dawn rawn hi tha in i hriet am? Bawngnene/dut teh i dawn hlak am?
RZ:  Aw tha ie! Vun le taksa ta ding khawmin a tha, ei taksa a cells ei ti hai hin tui an mamawa, kal ta ding khawmin a tha. Bawngnene anthawka siem thil hrim hrim chu ka du vawng.

VT: Hmatienga i thil tum hai mi hril thei i ti?
RZ: Internship hi hang zo phawt ka ta, chun ka hmatieng thil ding chu la ngaituo'ng ka tih. PG sunzawm ding am, Clinic ka hawng lem ding ti hai chu damte'n la ngaituo'ng ka tih.

VT: Ha le inzawma mitin in ei hriet dinga i dit le ngai pawimaw zuol iem a ni a?
RZ: Ha hi nitin vawihni nawt zie ding a nia, vawhni neka tam chu a tha chuong nawh, asanchu tooth structure enamel ei ti hi a tla theia chu chun sensitivity an umtir thei a nih. Chun, bau hi thuo (rinse) ngun a ngai bawk.


VT: Ha doctor ni hi i lo tum hrim a ni?
RZ: Aw, ka chinlai a'nthawka ka lo tum reng a nih.

VT: Medicine tieng pang neka Dentistry i thlang lemna san?
RZ: Kan hnik lem leiin ka rhlang a nih. Chun nuhmei ta dingin sin a zangkhaia, medicine tieng pang hai angin night duty dam a um nawa nuhmei thaw chi tak ni'n ka hriet.

VT: Ei ni hnam hi hawp le hmuom uor mi ei nia...bau sung (oral) cancer le a dang danghai leh an zawmna le inveng dan ding?
RZ:  Inveng dan tha tak chu thaw naw tawp niin ka hriet. Hawp le hmuom lei hin natna tamtak an tlun theia, Ziel hawp nasa lei hin Leukoplakia (precancerous lesion) dam a um theia, chun Gutkha product le ziel hin bau ei ang (ka) thei chin a suk chin theia, Oral Submucous Fibrosis (OSMF) - reduced mouth opening an ti dam a um thei a nih. Hieng hai pahni bak a hin tamtak a um.

VT: Leukoplakia ei ti chu sukdam thei ani am?
RZ: Leukoplakia chu ei bau sung a var angin an langa, OSMF chu kuta hang them chun inraw hrup el a nih. 40 mm neka lienin bau an ang (ka) thei ngai nawh. Suk dam thei a nia, in sum le dentist a fe a, a serious dan i zirin treatment lak ding a nih. Leukoplakia a chun Tab Lycopene dam an pek hlaka, chun OSMF a chun SM Fibro an pe hlak. Hienghai bak a hin iron supplement dam pek hlak an nih.

VT: Virthli Admin pakhat hi accident na ah a ha a kawia, hienganga ha kawi hai hi siemtha nawk a harsa am?
RZ: Composite restoration khawm a theia, Class 9 in an thea, a kawi (fracture) dan i zirin siemthat thei a nih. Class 1 chu outermost layer enamel kawi kha na, Class 2 chu enamel le dentin, chun Class 3 chu enamel, dentin le pulp ania, a pulp a thangsa chun RCT (ha tling suk thi)/ ha phawi (extraction) thaw a ngai hlak.

VT: Scaling hi thaw chi a ni am? Long term affects iem?
RZ: Hand Scaling (HS) le Ultrasonic Scaling (US) hai hi an thaw tlangpui ania, HS a chun ha raw an ti plaque (soft food debris/deposits) le calculus leia haraw insiem le inkhal hai an remove/pei hlak. US chun Gutkha le kuva leia ha dum el tah hai sukfai/pei a ni hlak.

VT: Scaling hin Enamel iengang char in am a suk hek?
RZ: Enamel tooth structure chu tlawm te a suk hek/tla ve hlak. Inzing taluoa thaw chu a tha nawa, amiruokchu ha bal tak tak le ha-ni inthi hlak hai ta ding chun thaw ngei ngei chi a nih. Asanchu ei thli fak a hin bacteria ramtin an um hlak leiin ha-ni a suk thi hlak leiin sukfai ngun chu a tha.

VT: Ha awlsam deua suk fai dan iem?
RZ: Ha suk fai dan chu a tam khawp ela, hang hril seng el thei an nawh.

VT: Thawdan tlangpui (common) deu tak iem a ni?
RZ: Dental floss, patzaia ha kar ziet fai dam, ha nawt (brushing) hi vibrate le circular motion combination a thaw, zing le zan vawi 1 veve. Chun damnaw taluo khum anthawka tho thei naw dam anni chun Chlorhexidine mouthwash hmang a tha. Damtha hai khawma Mouth wash hi chu hmang a tha.

VT: Thildang tieng met hang pakai ta inla, tlangval hai hriet chak, Vacancy a la um am?
RZ: Aw, ala um (haha).

VT:  Iengang mi am a ni a, i kawppui dinga i dit?
RZ: Mi ringum, mi intodel, mani kea ngir thei mi, ka neka upa lem, zaidam, hrietthiemna hau mi le mi duot thiem.

VT: Hmar tlangval ngei i ti ve naw ding? Pasal ding hin social status nei met hi i en ve am?
RZ: Hmar ngei chu ka dit tak an nawm, sienkhawm Mizoram a khawsa kan ni leiin ka hril thei bik nawh. Aw, social status chu ka en ve tho.

VT: Ngaisang tak ti dam khawvela hin i nei am? Iengang am i ngaisang a?
RZ: Ka nu le pa. Ka nu hi ka ruolthatak a nia, iengkimah kan nghatna le ka hlawtlingna bulpui  pakhat a nih. Ka pa hi a nauhai ta dinga an pumpek ve tawpna hi ka ngaisang.

VT: Hla kha i sak hlak am an ta kha? Abum i nei ta hlak am?
RZ: Aw 2005 khan "Chatuan Pathian" ti album ka lo siem va tah.

VT: Zohnathlak hai inpumkhatna dingin ieng am a pawimaw takin i hriet a?
RZ: Inzatawnna pawimaw ka ti a, ei tawng le nunphung hai hi inzatawn pek seng inla tha ka tih.

VT: Inchuklaihai hlawtlingna dingin iengam pawimaw takin i hriet a?
RZ: Pathien tri le taimakna pawimaw takin ka hriet.

VT: Internet khawvel a cheng ei ni tah a. Mobile phone, Computer, Facebook, WhatsApp etc khawvel thiemna hai hi iengangin am hmang inla ditdan i lo neia? Tulaia ei hmang dan hai hi lungawi tawk i ti am?
RZ: Mobile phone, Fb, Whatsapp etc hai hi ka hmang vawnga, anachu lekha tiem hunah ka si bo tawp hlaka, ka lekha tiem ding a suk  buoi ngai nawh.

VT: Virthli tiemtu/member hai kuoma incha nuom dam i nei am?
RZ: Iengkima Pathien tiin, ei thilthawna le fe na zawn sengah theitwp ei suo ding a nih.

VT: Virthli i lo hmu dan iengang am a ni a?
RZ: A tha khawp el. Hmun hrang hranga um Hmar nuahai ta dingin chanchin inhriet pawna tha tak a ni leiin bengvai tlak ka ti hle.

VT: I hun hlutak el imi peka, kan lawm takzet che!
RZ: Kei khawm ka lawm takzet, Virthli damzing raw se!

Post a Comment

Powered by Blogger.