~ By. J Lalremruot Darngawn

Zîngkhuo a hung var a khuma inthawk inchawmthla in ka Ka le Hmai hai sukfai in, thingpui dawn malamin Chanchinbu ka tiem hlak a. Chanchinbu a ka hmu inzing ve èm ém el chu, Zu tha lo dawn lei a thi zat an hung suklang hlak hi a nih. Hi thu ka tiem zatin, "Zu hi a tha a um am a ni?" ti hi a mi'n ngaituotir zie a. Zu suktak na ding in amani a dawntu hai an inrui vat thei na dinga a zawrtu hai in amani Zu Urtu hai in thil dan an pawlsa hlak hai hi Zu tho lo ei ti tak chu niin an lang a. Hienga thil dang an pawl hlak hi a tha naw ngei el. Sienkhawm ieng anga Zu man tam le changkâng, thil dang pawl der lo khawm nisien; ei taksa, lungril ngaituo na le puotieng nun cheng a suksiet thei dàn hrietchieng chun Zu tha hi a lo um der naw a nih.

Zu ei dawn hi ei Phîngpui le Rîl haiin an hîp (absorbed) ral a, chu taka inthawk chun ei Thisena lutin chu taka inthawk bawk chun Thina a lût nawk a, chu taka chun Thina 'Enzymes' chikhat, tium tak el 'Acetaldehyde' an ti ah a hung inchang ta hlak a nih.

Zu dawn hai inrui nasan le an inrui tak chu 'Acetaldehyde' hi a ni a, chun natna le harsatna chi dang dang intluntu a ni bawk. 'Acetaldehyde' hai hi ei taksa a 'Enzymes' chidang 'Acetaldehyde Dehydrogenasn' hai hi 'Acetic Acid'-in an hung inlet ve nawk, hi lei hin Zu inrui khawm an hung har nawk thei hlak a nih.

ZU HI IENGLEIA EI DAWN AM?
Zu ei dawn nasan chu zu ei dawn hin inhawi ti na amani zângkha deu hieu a inhrietna ei nei hlak lei a nih. Mihriemin inhawi ti na ei nasan chu 'Dopamine' zar a ni a. Hi 'Dopamine' hi inhawi min ti tirtu, hlimna min hriettirtu le ei thluoka 'area' pakhat 'prefrontal lobe' hmanga ei hrietzing thei na (memory) thangpuitu a ni a; chun tha le tha naw min thlirhran tir thei tu le nupa nun (sex) ei hmang huna hlamna/inhawi ti na min hriettir tu le Zu inrui inhawi min ti tirtu a nih. Sienkhawm ei 'dopamine' hi a ni ding baka insâng taluo a ni chun 'Hypersocial', 'Hypersexsual' baka invetna chikhat, 'Psychosis & Schizophrenia' hai an tlun thei a nih.

Mithiem hai in an inchûk chiengna a chun, Zu ei dawn amani Ziel ei hawp hin inhawi ei ti na (dopamine) hi a lêt 100-200 chenin a suksâng thei a nih an ti a. Chuonga 'Dopamine level' an sâng chun mihriema hin inhawi ti na danglam tak el a um thei a. Chu chu puotienga inthawka an lâklût Damdawi amani Zu hmangin an suk insâng charin inhawi ti na an hung nei a, an hawi na thlakhla lei chun an thaw pei a a tawpa chun Zu/Damdawi Addict an hung ni ta hlak a nih.

Zu hin ei thluoka hrietna zâm a them tak a. Hi lei hin zu rui ei ti hai hi an ţawng invai a, an chet vêl a muong a, nakawr-a hrietna an hnuoi a nih. Zu hin ei thluok hmun dang dang a them dàn anzat naw a.


1. Cerebral Cortex
Hi hi ei thluoka hmun lien le insang taka um a ni a, zu in sin a thaw dàn chu hieng ang hi a nih.
*Insum theina a suktlawm.
*An ţawng tam.
*Hrietna a suktlawm
*An mit an vai.
*Na hrietna a tlawm.
*Lungril ngaituona a tawi.
*Ngaituona fîm a sukbuoi.

2. Limbic system
Hi hin thil hriet zingna (memory) le lungril fîm pangngai baka umna a vawng a. Zu chun hriet zingna a suktlawm a, lungril chawk thona:
Phûr rak.
Lâwm rak.
Lungngai/khawsawt èm ém etc. an tlun thei a nih.

3. Cerebellum
Hi hin ei tirawl chêt dàn a vawngin, ei nuom dàn le dit dàn anga chêt thei na din ei tirawl hai a chang inruoltir hlak a. Zu in hi thluok 'part' danga sin a thaw chun chang dàn a sukbuoi a; zu rui chu an tlu khet khet nuom bîk a, an lamlawn khawm an pei hlak a nih.

4. Hypothalamus & Pituitary gland
Hi taka hin zu in sin a thaw chun tisa châkna a suksuok thei a; zu dawn rawn chun mi a sukphur thei ruolin nuhmei-pasalna hmang nuom na a sukhnuoi thei thung. Hi lei hin zu dawn mi pasal tam tak chu an nuhmei hai nupa nun an hmangpui tlawm leiin an nuhmei han harsatna an tuok hlak a nih.

5. Medulla
Hi thluok part dang hin ei ngaituo ngai lovin thaw ding tam tak a thaw a:
*Thuok lâk–boruok hip lut le pêk suok.
*Lung a sukphu.
*Taksa lumna a enkawl etc.
Hi 'medulla' sin thaw a sukhnuoi leiin zu chun imu a suksuok thei a, zu rui chatthla ei ti tlung dàn a nih. Ei taksaa zu umzât (BAC) a tam taluo lem chun thuok a suktawp thei a, lungphu a sukchawl thei a, thina chen an tlun thei a nih.

Zu dawn mi in zântieng zu a dawn nasa chun a zînga luoksuok, bu du lo, lu na, taksa sil ţhem ţhum, dangcharna nasa tak an nei nuom hle; a tawi zawnga Penţawng ti a an hril hlak hi a nih.

Zu hi mi'n a dawn nasa chun a taksa in a peisuok theina kha a hrat deu deu a, inrui tawk taka dawn ding chun a dawn rawn a hung ngai ta hlak a nih, hi hin zu he na le a ngawl veina a siem ta hlak a nih. Thluok sinthaw khawm zu in a sukhnuoi leiin ngai aw dingin a bei nasa a, sienkhawm ei taksa a inthawk zu an peisuok vawng hnunga khawm a bei nasat ngaiin a bei sunzawm zing a; a umzie chu thluok sinthaw kha zu leh a pangngai lem ti na a nih. Hi hi nghawng ţhalo pei in zu châkna nasa tak a siem a, zu ngawlveina an tlun thei a, ‘chiri’ ei ti ang chen an tlun pha thei a nih.

Hun sawt tak zu dawn chun taksaa sietna pawi tak tak an tlun thei hai.
*Thin tawl – thin timur a sukthi a, thin tawl (cirrhosis) a siem a, a siem a, an thi pha rawp a nih.
*Thluok timur a thi pei a, thluok tamzawng a suktlawm thei.
*Phingpui le rîl inlâwng (ulcer) an tlun thei.
*Thisen insang (hypertension/BP sang) a siem thei.
*Pasal tilmu a sukkhawhlo thei a, pasalna a sukbo thei.

Zu dawn nasa mi chu a tlángpui thuin an bu fâk a tlawm a, hi lei hin an dawldângin, thisen an nei tlawm thei. Zu rui lai taka tlûk ngun leiin ru tliek le pânna ti vel an nei tam nuom bîk a nih.

Zu hin taksa el nilo lungril le khawtláng nuna ţhalo tinreng an tlun a. Zu hin ei thluok a them suok vawng leiin a dawn nasa mi chun lungril buoina: lungngaina, lungril sawlna le mani inthat nuomna chen an nei thei a nih. Nupa nun inkar a sukkhawhlo thei a, pasal mani nuhmei hai chung kutthlâk chingin a siem thei a, khawtláng ta dinga mi hnawksak an ni thei a; sinthawna hmuna khawm thinsietna le inthladana leiin harsatna a siem thei bawk a nih.

Zu ruina hin mimal hriselna le a bul vela buoina nasa tak an tlun thei laiin, damdawi le lungril tieng thiemna hmanga enkawl thei a nih.

Post a Comment

Powered by Blogger.