Mi tamtak tadinga malsawmna ni rawp hlak;
HYA IMPHAL JHQ  in CCPur-a Dist. Hospital an kan, thilṭha tamtak an thaw; anni ruol hin EFCI Imphal Nuhmei Pawl le KṬP khawmin rawng an bawl ve

CCPUR|Sept. 28, 2015 (Virthli News): Manipur-a Tlawmngaina kawnga an hming lam ṭhel ngailo khawpa Hmarhai hming suk ṭha em em el hlaktuHYA  IMPHAL JHQ chun Tribal Martyr-hai ruong nghakna le Martyr sungkuohai lusûnna sûnpuina District Hospital Churachandpur ah an vawisun (28/9/2015) khan nei. Hi hun a hin Media-hai hmaah an President Pi Thangṭhatling-in thuhrilna aneina a chun, Lusun suongkuohai an tuorpui ziet thu le pawi tawklo, nunrawng taka hringna latu, Manipur Sawrkar an dem zie thu hai a hril a. Vawisuna kan hung nasan tak chu lusun sungkuo hai kan tuorpui ziet suklangna le Tribal hai ei inthuruol zie suklangna dinga hung kan nih tiin a hril bawk.

Anni hi Manipur Capital Imphal, CCPur a inthawka 61 KMs+ a hlaa in thawk an hung a nih. Hi huna hin mi 300 vel ding HYA Hmar Ambulance 1 sip, Bus - 3 sip, Car-15 sip lai ding zet a tlawmngaina insang tak insuoin an hung inthawkdawk a nih. Hmar Pi-Pu tlawmngaina le nun zie mawi tak an suklangna hi mitamtak inpak le ngainat an hlaw pha hle.

Chun, hi ni tak hi JPO hnuoia rotation dungzuiin HYA GHQ Thingpui inlum ni ding a ni a, sienkhawm anni hin an thaw lem tah a nih. Hi ding hin Branch hai tlawmngai dinga fiel hlak an nih a, hi thu hi an hriet charin branch hai lo hril lo ding le an ni'n thingpui an inlum nghal ding thu an HYA GHQ hotuhai kuomah an hril nghal tah a nih. An inpekna le tlawmngaina hi Hmar nau umna taphawtah entawn ding le an thawdan ṭha hai hi inchûk tlak an nih.

Pu Vula Lalvulthang Khawbung Ex-President, HYA Imphal JHQ chun hi thu hi internet Social Media ah lo hmuin hiengang hin a hril hiel a nih. “Ka lenruol ngai um hai, HYA member Imphal hai vawisun ni a in laia ka ṭhang phak ta naw hi pawi ka ti hle a, sienkhawm ka thlarau chu nangni lai a um zing a ni aw, inthaw ṭha taluo tiin a thawkna hmun DDK, Kohima (Nagaland) a inthawk Comment a hung pek a nih.

Hi huna hin tlawmngaina laia mawi em em tlangval ha’n morgue sung ten derlo le thafan takin inthielfaina sin an thaw bawk, nupui ruolin lengkhawmna program ah ṭhangin, ṭhalai ha’n thingpui an inlum a. In tina ralna in 300 a’nthawk Rs 30,000/- an dawlsuok chu JPO kut ah an inhlan nghal bawk. EFCI Imphal Presbytery Nuhmeipawl in Rs 5,000/- le EFCI Imphal KṬP in Rs 3,000 inhlanna an nei ve nghal bawk a nih. Zantieng Imphal an inlawi tieng District Hospital a inthawk Peaceful and Silent Procession an nei a, Tuibuong Peace Ground, CCPur  fe pel peiin Khawmawi ah procession hi suktawp in motor in zantieng dar 4:45 PM khan Imphal an pan nawk a nih.

Pu Zorisang Secretary HYA Imphal JHQ nilai chun ei inpawlpui hunah hiengang Pawitawklo hai hringna Security Forces haiin an lakna chu pawi a ti hle thu hrilin thil vangduoi thlak tak el le inhmangna lien tak a ni thu hai a hril a, hiengang thil a tlung nawk ta ngainawna dinga ṭhangruol a ṭul zie thuhai uor takin a hril.

-LRS Puruolte Virthli News|CCPur

Post a Comment

Powered by Blogger.