MARTYRS DAY, 25th. ANNIVERSARY ( SILVER JUBILEE) PUOLA CHIBAI BUKNA LE NGENNA

To,

Hmar Hnam le Ram tadinga thawpui dittak hai,
1). The Chairman, HPC “ D
2). The President, HPC “D
3). The President, HNA.

Ahmasatakin hnam a misiemtu le vawisunni chen a hnam tadinga rawngbawl thei a misiemtu chu inpak in umsiemla. Diksakna chibai vouchuom ka hung buk cheu.

Ei hnam, political movement chu abula inthawka hril ngailovin, vawisunni chen hin rinumna tinreng le neksawrna, hlem le deusawna inkara dam khawsuok tum in ei bei tang tang a. Ngaidan le nuom danhai khawm thlur tamtak a chu inanglo in, mani hmalakna senga hai rinumna, hrilsietna le hmusitna tamtak tuok inla khawm “Hnam tadingin” ti’n thahnem ngaitakin theitawpin hma eilak seng a, Hnam leiin Martyr chen chang in ei pasaltha tamtak chun muol anmilo liemsan ta hiel anih. Nisienlakhawm, vawisunni chen khawm hin ei thathnem ngaina le thaw ra chu hmuding (eithil nawr tak ADC) ala um chuongnaw a, ei hnam sunga harsatna le beidawngna, inremnawna le inthatna, in nghirnghona le in hmelmakna, unau hmelhai bak chu eila hlaw dawk nawh.

Chuongang ngirhmun le harsatna vawisunni min hmu tirtu, ei Pathien, hin tum dan le dit dan ei hnam tading hin, nei ngei atih. Chu Ditdan le remruotna ngaituoa suisuok zawm ding chun Hmar hnam le a ram tadinga thawpui ditum tak takhai ka hung ngen cheuin ka hung fiel takzet cheu anih.
1989, May ni 16 khan Hmar hnam tadingin Pu. Lienhmingthang, Sartuinek le Pu. Lalhuoplien, Sakawrdai chun Moniarkhal a Mizoram Armed Police hai silaimu tourin an hringna anlo inhlan ta a. 1990 kumbul a HPC Executive meeting chun hnam tadinga hringna lo inhlan tahai hrietzingna ni, NISER siem chu lo rawt thlu in, May ni 16 besan chun 1990, May ni 16 khan Hmarkhawlien a Hmar Student Association hmalakna in ei hnam tadinga hringna lo chan tahai popo puola dingin, niser, “MARTYRS DAY” tin eilo hmang tan ta anikha.

‘MARTYRS DAY’ ei hmang tan na kum hai khawm hung liem pei chun 1990 May ni 16 a inthawk a 2015 May 16 ei thlung hin “MARTYRS DAY” chun kum sawmhni le panga (25yrs) SILVER JUBILEE eilo hmu chu anta der el.

Chuleiin, unau, thuoitu ditum tak takhai, hnam tadinga mani inlum khawm hluo theiloa hnam vakvai puia vawisunni chen a rinumna tuorhai popo, ei MARTYRS’ DAY SILVER JUBILEE hin INREMNA JUBILEE DAR vuong eitieu ti hi Hmar hnam chun a ngenna cheu le a fielna cheu anih. Ei thuring Bible a chun " Tu ram khawm mani indo taphawt chu an bo hlak; tu khuo khawm , sungkhat khawm, mani indo taphawt chu ngirsuok naw ni hai" (Mathai 12:25.) ti ziek eihmu a. Israelhai chu Pathien hnam thlangsuok nihai sienkhawm annilai a inremnawna le Hnam a siemtu Pathien annghatsan chun sietna le hremna nasatak antuok hlaka, hnam dang SAL a hai chen khawm thuoihmang in an um ti khawm ei hmu a.

Vawisunni a ei hnam ngirhmun, ei SUNGKUO en hin INREMNA JUBILEE DAR eivuok naw chun, vawisunni a ei tienami (History) hi ei thlahai tadingin hrietzing le tiemnawk pei umlo tak HMAR HISTORY a lan chang ngei ngei atih.

Atawpna taka dinga ka hung ngen nuom nawkna cheu chu, “ Rawng inbawl pek hnam a Misiemtu le hnam a asiem Hmar nauhai beiseina le in nghatna chu, nangni Hnam Sipaihai hi innih”. Thuoitu tha le ringum chun NGILNEINA, ZAIDAMNA, ZAIDAWTHEINA, THUHNUOI RAWLNA, RINGUMNA, HUOISENNA, HRIETTHIEMNA, REMHRIETNA le THILTHAWTHEI TAKA athuoi angin nangni khawma ahun le hmun ang peia in Hmangai Hmar hnam hi mithuoi dingin kan nghak cheu a, eihmang mek ei hnam PASALTHAHAI puola MARTYRS DAY, kum sawmhni le panga (25yrs) na JUBILEE eithlung hin INREMNA DAR hung vuo ngei ding le "THANGRUOLIN, LUNGRUOLIN, HNAM TADIN PEN EITIEU" tia hla a eisak hlak anga Hnam tadinga Lungruol tak le Goal tumna pakhat tum einina angtakin penkhat in pheikhai vawr ruol zai rel eitieu ti in, beiseina insangtak le kan thlir zing cheu anih. Martyrs hai Martyrs Day Jubilee Dar chun ei hnam sunga inremna le in unauna siemthar in hung phursuok ngei rawseh.
Malsawmna tamtak, Thangsuopuon, Tawnlairang le hnena hlado insama hmuok ding cheu hin Hmar hnam hin kawtsuo a anghak zing cheu.

Ka lawm ie. HMAR damzing rawseh.

Hmar ram le a hnam tadinga in thahnem ngaipui,

Sd/-
(LALBIEKSANG HMAR)
Aizawl, Mizoram.


Post a Comment

Powered by Blogger.