- Alan Famhoite

Tuithaphai: March 7, 2015; 2PM khan Saikawt Playground ah Hmar Martyrs’ Trophy Organising Board (HMARTOB) hai hmalakna hnuoia The 12th State Level Hmar Martyrs’ Trophy Football Opening chu tan a nih. Hi hun hi Pu Lunminthang Haokip, IAS, DC, CCPur chu Chief Guest niin, Solomon L. Fimate, SDC, Tipaimukh le Upa Laldawnlien Varte, Gen. President, HYA GHQ hai chu Guest of Honour le Functional President an nih. Special Invitees in Shri Lalhossan, Executive Member, ADCC; Shri Lalhmangpui Fimate, Member, ADCC; Shri Lalhrillien, Member, ADCC; Zodingliana, Member, ADCC hai an thang. Special Invitees hai bakah Rev. Dr. Rochunga Pudaite, Founder, Bibles for the World; Prof. Lallukhum Fimate le Balram Singh, Addtl. SP/CCPur le Hnam sunga organization tum tum thuoitu le Kuki Student Organisation(KSO) hai khawmin an hung uop a, Dr. Pudaite in Martyrs Day-a hmang hlak ding Football Net tha chi khawm a pek bawk a nih. Guest Artiste in Nk. Christina Shakum (Platinum Star); Nk. Lalengvari Sinate; Nk. Gladys Lalparzo Sanate; Nk. Emma Lalawmpuii, Tv. Vanlalchhunga Joute le Saikawt HYA Choir haiin Hnam hla mawi tak takin mipui an inawi bawk.

Flag Hoisting Pu Lunminthang Haokip, IAS, DC, CCPur-in a nei a, Organising Board hai thangpuina dingin Rs 10,000/- a pek a, chun, a office ah inhmupuia thangpuina a thei ang ang lo thawpek dingin OB hai an tiem bawk. Thuhril tawi an nei huna Pu Haokip le Pu Solomon L. Fimate hai chun Ringumna le Taimakna a pawimaw zie uor takin an hril a. Pu Laldawnlien Varte, Gen.President, HYA GHQ chun hringna hlutzie le inza a tul zie hai a hril a, Hmar hai hi zani laia mi mi hmu ang mei mei kha ei ni ta nawh, a tâwk ei inkhaw ve det det ding an tah. Thla iemanizat a’nthawk khan hotu haiin hma nasatakin an hung lâk a, hun sawtnâwte hnungah ei hnam sunga danglamna ala hung um ding thu hai a hril a. Pawlpui (Hmar Inpui) in a ti chu a ti a nih ei ti thei hun a hung tlung ding an tah. Hmar hai hi ei Organisation nei haia inthawk survive ei tum naw a, Hnam anga survive ei tum lem ding thu hai a hril bawk. A hril pei naa chun mipui le hotu hai kara khawm inringzona (trust) hi nei tum ei tiu tiin a hril bawk.

Zantieng group-A a um Lamka SC le Muolvaiphei hai an inkhel a, LSC haiin 1-0 in Muolvaiphei hai an hneban a nih. Hi tournament a hin champion team hai chun Rs.1 Lakhs dawng an ta, runners up in Rs.50,000/- le 3rd Place team haiin Rs.20,000/- dawng an tih. Kum dang ang naw takin tukum Hmar Martyrs’ Trophy hi State Level a ni leiin Opening Ceremony a hin mipui fekhawm an thahnem tan hle a. A nipui ni tak May 16 lem hi chu mipui ei thahnem zuol an ring thu Organising Board hai chun an hril a. Hun sawtnawte hnungah a nipui ni May 16-a in tina khai ding Hmar Martyrs’ Day Flag chu hung zawrsuok vat a ni ta ding thu an hrilsa bawk.
























































Post a Comment

Powered by Blogger.