Aizawl, 16 April, 2015: Mizoram sira hungin zin BJP National President Pu. Amit Shah chu vawisun tarik ni 16 April, 2015 zantieng dar 6 khan Hmar hnam țhuoitu ha'n Aijal Club ah inhmupuiin Mizoram a Hmar political movement chungchang le Mizoram sawrkarin HPC accord (1994) a sukpuitling nuomnaw leia an lungawi naw thu le Hmar hnamin harsatna tamtak an tuok thu BJP president kuomah ziekin (representation) an intluna, BJP sawrkar chu iremna lampui dappuia an rang thei anga Hmar hnam harsatna chingfel dingin Pu. Amit Shah hi an ngen a nih.


Hmar hnam țhuoituhai chun Mizo Union movement le MNF movement ânthawka Hmar hnam chu Mizoram sawrkar i hlembawl a ni thu le chu lungawinaw leia HPC khawm 1989 khan Mizoram hmartieng (North Mizoram) a Hmar bubitna ah ADC ngieta ramhnuoi lût an ni thu an hrila, 1994 a HPC le Mizoram sawrkar inremna dungzuia SHDC khawm kum 2 interim period zo a Indian Constitution hnuoia Sixth Schedule a hlangkai ding ti chu kum 27 lai a liem ta hnung khawma sukpuitling a ninaw thu uortakin an hril bawk.

BJP National President Pu. Amit Shah chun Hmar hai lungawinawna le harsatna intluna um chu a lo bawzui ding thu Hmar hnam țhuoituhai a hrila, hun remchang hmasatak ah ama an hmu theina di'n party țhuoituhai fethlenga remchang a siempek ding thu a hril bawk a nih.

Hmar hnam țhuoitu aiaw hin Mizoram Hmar Welfare Committee (MHWC), HPC party le HSA Gen. Hqrs. țhuoituhai an țhang a nih. Hmar hnam țhuoituhai chun BJP sawrkarah ringna nasatak an innghat thu an hrila, kum 2008 (Sakawrdai) le kum 2013 a Vairengte a public rally a neina ah BJP leader Rajnath Singh in Hmar hai ta dinga ADC siem a harsat naw ding thu a lo hril ta chu Pu. Amit Shah kuoma hin intlun a ni bawk.

Post a Comment

Powered by Blogger.