CCPur, October 14 (HT): Zani Oct. 13, 2014, 12:00Noon khan District Training Centre, Tuibuongah Mr P.K. Jha, IAS, DC, CCPur inthlana ‘farewell’ programme hmang a nih. Hi huna hin DRDA, CAF &PD, NIC, Planning, Election le Revenue departments hai bakah SDOs han inthlana thu hrilin thilpek inhlanna an nei tawl.

Hi huna Pu P.K. Jha in thuhrilna a nei huna chun, March, 2014-a DC, CCPur sin a hung chel huna Social organisations, Phillanthropic Organisations, Student Leaders le Tribe Leaders han tha taka an lo lawmlutna thua lawmthu a hril a, 16th Lok Sabha election hlawtling tak le re-poll um tul lova nei zo theia a umna thuah CCPur mipui chunga lawmthu a hril. District Administration Office in tan le thlier bik nei lo a ‘neutrality’ kengkaw a pawimaw thu a hril a, CCPur DC a ni sunga staff han tha taka an thlawpna thuah lawmthu hrilin staff hai le sin thaw tlang inhawi a ti thu a hril. Manipur-a a hung um tuchena Senapati le CCPur haia DC-a a um theina thuah Pathien kuoma lawmthu a hril a. CCPur District-a inthawk sawn dawk phuta a umna thuah mithenkhatin an lo ngaithiem  naw deu khawm a ni thei. Sienkhawm, Govt. employees hai chu hmun dang danga sawnkuol le experience nei pei le inthlakthlengna hung um pei ding a ni a, chu thil chu hmasawnna dinga pawimaw a nih tiin a hril a, hmatieng peiah staff hai chu quality ngaipawimaw dingin an fui.

Hieng laizing hin CCPur DC thar dinga ruot Pu Lunminthang Haokip chun vawisun hin Pu P.K. Jha kuoma inthawk DC, CCPur charge lain charge inhlanna nei an tih. Pu. P.K. Jha hi Joint Secretary (Fin) and Project Director (MACS) in addition chel dinga sawn a nih.

Post a Comment

Powered by Blogger.