CCPur, October 19, 2014 (HT) : Churachandpur Joint Women Organisation (CJWO) chun zani zantieng 2PM khan an office, Vengnuam, Hiangtam Lamka hmuna press conference an ko a, October 7, 2014 nia Khuga Dam Pump House-a nuhmei naupang kum 8 le a chanve mi, class 3 inchuklai tu ti hriet lo Auto driver in a thuoihmang chu an dem thu hrilin, hi thuah hin FIR registered a ni a, sienkhawm Police han nuhmei naupang sawisaktu Auto Driver an la man theinaw chu mak an ti thu an hril. CJWO President J.L. Sawmi chun, sawisaka um nuhmei naupang hin a sawisaktu auto driver hmel ding awm le a Auto sung um dan ziekdawk thei sia tuchena iengleia man lova la um am a ni a? tia indawnna siemin mak a ti thu reporters hai kuoma a hril a. An rang thei anga nuhmei naupang sawisaktu hi man dingin Police hai a ngen.


Ei thu dawngnain a hril danin sawisaka um nuhmei naupang hi October 7, 2014 sun dar 12-2PM inkara Tangnuam hmuna an in bul lamsira inthawk Auto driver pakhatin a thuoihmang, hi ni zan inthim hmunga Kawnpui village-a hmun pakhata a maksan nawk, Lanva tieng kir nawk lo dinga a thuoihmangtupa hin a vau leia nuhmei naupang hi Khuga Dam tieng pana fe, hi zan hin sungkuo pakhatin an hmu a, an ina lalutin zankhat an inriek tir a, a zing October 8, 2014 nia nuhmei naupang zawngtu han an va lam niin CJWO chun an hril. A thuoihmang tupa hin a bau hup pekin, khek a, a hming a hrillang chun thir tluon hmanga that dingin a vau bawk niin CJWO chun an hril. Nuhmei naupang hin ama sawisaktu hi T-shirt pawl (blue) hak, tarmit bun le sam sei niin a sawisaktupa lim hi a ziek a nih.

CJWO chun hi chungthu hi an bawzui pei ding thu le a tul chun helna le nuorna hai khawm an la thaw ding niin an hril.

Post a Comment

Powered by Blogger.