NECA Student hai Mary Kom film an enpui
CCPUR: North Eastern Children’s Academy (NECA), Rengkai chun Sept. 10, 2014 khan Annual Games and Sports opening ceremony an hmang a. Hi huna hin Major Vaibhav Singh, 27th Assam Rifles chu khuollienin a ṭhang. Opening Ceremony hmang zovin Assam Rifles le NECA team han friendly volleyball an inkhel. Major Vaibhav le a rawi hai chu zani (12/9/2014) khan NECA hmuna va fe nawkin student hai sukpurna dingin projector hmangin M.C.Mary Kom chanchin film-a siem chu an enpui.

Awareness on Myanmar Trade & Look East 
CCPUR: Sept. 16, 2014, 10:30AM a inthawk khin DTC, Tuibuong-ah “One Day Awareness on Indo-Myanmar Trade & India Look East Policy” um a tih. Hi huna hin Indo-Myanmar Trade Agreement, 1994; How to Obtain Import-export code number (IEC); Custom procedure on export; Custom procedure on import; Role of banks in export & import; Trade in ASEAN Countries under Look East Policy ti thupui hai hmangin mi tum tumin thu hril an tih. Hi Awareness programme a hin inhnikna nei taphawt ṭhang thei ning a tih.

First Division League Prize distribution
CCPUR: Vawisun 3:00PM hin CDSA Office, Hiangtam Lamka hmuna Prize Distribution le First Division League-2014 League Standings declaration programme um a tih. Hi huna hin Thangjang Haokip, President KIC le T.Goukhomang Simte, President, ZYA hai chu chief guest le functional president in ṭhang an tih. Hi huna hin First Division Club managers le captain hai bakah individual awardees hai chu kim taka ṭhang seng dingin CDSA in inhriettirna a siem.

Munpi Primary School hawng ding
CCPUR: Vawisun 11AM hin Munpi Village Authority le Global Foundation for Eradication of Poverty & Social Evils hai huoihawtnain Henglep Sub-Division sunga Munpi Primary School building hawngna le literacy campaign, 2014 um a tih. Hi huna hin Pu P.K. Jha, IAS, DC, CCPur khuollienin ṭhang a ta, Soiminlen Lengen, MCS, SDO Henglep le R. Vaiphei, DI of Henglep hai chu functional president le guest of honour in ṭhang an tih.

Paupu Lenlai 2 tlangzar
CCPUR: Henry, Chairman, ADC, Senapati district chun zani 12:00Noon khan Zotal Film Company in Zou ṭawnga an inlet Paupu Lenlai 2 ti video chu Zogal memorial Hall complex-ah khuolliena ṭhangin a tlangzar. Hi huna hin John Raleng, Chairman, ADC, Ukhrul district chu guest of honour in a ṭhang a, Thangjang Haokip, President, KIC, CCPur chief host in a ṭhang. Khuollien chun, Manipur-ah Hindi film insuo khap (ban) a ni leiin film tiengpanga inhnikna nei hai ta dinga film tiengpanga career siem thei a ni thu a hril a, Paupu Lenlai film chu mi tam tak suk nuitu a ni ngei a beisei thu a hril a. CCPur district chu Manipur khawpui pahnina le lekhathiem tam tak um khawmna a ni thu a hril a, lekhathiem hai chu Pathien ṭi le inza mi an ni hlak tiin a hril. Pu John Raleng chun, Tlangmi han film siemna kawnga ei baksam le thawhla tak chu market umnaw hi a nih, ei population a tlawm leiin duthusamin a hlawtling ngai naw a nih tiin a hril.

Dr H.H. Mate India Pride Award inhlan ding
CCPUR: Dr H.H.Mate chu September 16, 2014 nia India Islamic Cultural Center, Lodhi Road, New Delhi hmuna National Award Presentation Ceremony um dinga India Pride Award (Bharat Gourav Puruskar) dawng dinga thlangsuok mi 30 hai lai a 23-na in a ṭhang. Award semna huna ṭhang dingin Dr Mate chun Sept. 14, 2014 khin Imphal suoksanin New Delhi pan a tih. NE mi hi award dawng dinga thlang hai laia ṭhangve umsun a nih. Dr Mate hi Sept. 22, 2014 khin Global Society for Health and Educational Growth huoihawtnaa Speaker Hall, Constitution Club of India, New Delhi hmuna national seminar-a khawm ṭhang a ta, hi huna hin Best Educationist Award inhlan ni bawk a tih.

Refresher Course Training
CCPUR: DHS/CCPur huoihawtnain zani 10AM a inthawk khan CMO Mini-Conference Hall-ah ‘1-Day Awareness-cum-Refreshers training on Programme Components of NHM-USSD/MCTS,MCP Card,JSSK&JSY’ nei a ni a, Multipurpose Worker(NHM/NRHM) mi 26; BPMU mi 15 le ASHA Facilitator mi 30 an ṭhang. Hihuna hin resource person in Dr V.C Pau, DFWO;Seiboi Mate i/c DPM/DDM,NHM/CCPur, Dr Vanlalkungi i/c MO Saikawt/PHC le Baria Uddin, DFM hai an ṭhang.

Tuoithur tui a dawn leiin a thi
MAKOKCHUNG: Tuolsuok Zu sawnin Manto Prasad s/o Pancham of Pali village, Gorakhpur district, Bihar le Raj Kumar Singh han tuoithur tui inchawin an dawn a, an damnaw pha leiin Hospital panpui an ni a. Manto Prasad chu damzo lovin a thi a, Raj Kumar Singh ruok chun ṭhat tieng a pan pei tah. Hi thil hi September 10, 2014 a tlung a nih.

Police han mi 11 hmun hran hranah an man
IMPHAL: JCILP student’s Wing a Human Resource Secretary, Manjit Singh ṭhangsain zanikhan Police han hmun hran hranah JCILP student’s Wing members 11 an man nawk. Zani zing dar 8 khan AMSU Headquarters Office complex-ah members 4, Prem, Rojit, Naoba le Yaima hai man an ni a, Paona Bazar ah member 2, Ranjan le Rakesh hai man a ni a, DESAM Bishnupur Unit members 5, Bullet, Bishorjit, Rocket, Manojan Naoba hai man an nih. Zani hmasa khan mi 5 an lo man ta bawk. Non-local hai chunga curfew an puong leia man an nih.

Motor nidang ang bawkin
IMPHAL: UNC bandh hlip a ni ta leiin NH-2 & 37 (Imphal-Dimapur Road) haiah motor chi tum tum hai chu ni dang ang bawkin an tlan ṭan nawk ta a, Jiribam a intang Trucks 200 chuong zanikhan Imphal an hungtlung niin ei thu dawngna chun a hril.

Luman Rs. 18 lakh chawi dingin
AIZAWL: Gauhati High Court, Aizawl Bench chun Mizoram sawrkar chu Thanghliri kuomah a naupa Vanlalnghaka luman Rs. 18,00,000 pe dingin a rel. Vanlalnghaka (32) s/o Thanhliri chu 31-12-1999 zan dar 7:30 velin Excise constable pahni, Rokunga le David Lalremsiama han an ṭhuoihmang a, Vanlalnghaka thisa ruong hi 3-1-2000 in Sethawn khaw bulah a thisaa hmu a ni a, Rokunga le David han an ni that niin an puong. Hi lei hin Court chun Thanhliri chu a naupa luman Rs. 10,00,000 le a pung 9% pe dingin kum 2010 khan Mizoram sawrkar an hriettir a, sienkhawm a pek naw leiin kum 2001 a inthawka 6% interest leh chun Rs. 18,00,000 pe dingin Mizoram sawkrarin an pawisa chawi ding hi Rokunga le David hai hlawa inthawk a kat ding a nih tiin Court chun an hriettir.

NE student-hai ta dingin Scholarship
NEW DELHI: India hmarsak biela cheng student-hai ta ding bikin Special Scholarship Scheme thar, ISHAN UDAY, UGC in a siem a, Academic Session 2014-15 a inthawk students 10,000 han hi Scholarship hi hmu ṭan thei an tih. Hi Scholarship hmu thei dinghai chu kum khata nu le pa sum hmusuok Rs. 4.5 lakh neka tlawm ning a ta, Scholarship sum thla khatah an hmu ding zat chu Rs. 3,500- 5,000 ning a tih tiin Union Minister for Human Resources Development, Smriti Irani chun Sept. 11, 2014 khan a puonglang.

Sept. 15-ah K.K. Paul in Manipur Governor dingin
IMPHAL: Manipur Governor thar dingin Krishan Kant Paul chun September 15, 2014 khin Raj Bhavan, Imphal-a Durbar Hall-ah sesamna nei a tih tiin Raj Bhavan Secretariat thusuok chun a hril. K.K.Paul hin September 16, 2014 khin Raj Bhavan, Aizawl-ah Mizoram Governor dingin sesamna nei bawk a tih. Paul hi Meghalaya Governor a ni a, Manipur le Mizoram Governor thar ding hai ruot an ni hmapo Manipur le Mizoram Governor sin hai a lo chelsa ding a nih.

External/Supplementary Candidate
IMPHAL: HSLC Examination, 2011, 2012, 2013 & 2014 le Compartmental Examination, 2014 a failed, HSLC Examination, 2015-a External Or Supplementary Candidate-a exam nuomhai ta dingin prescribed proforma hmangin September 15, 2014 a inthawk October 16, 2014 inkarin permission fee Rs. 400/- pei pekin hming registered thei ning a tih tiin Controller of Examination, Board of Secondary Education, Manipur chun inhriettirna a siem.

Cabinet meeting in NIA suizui dingin
IMPHAL: Zanikhan Commando pakhat kap hlum Chief Minister’s Bunga- le Police Commando 2 kap low, Imphal-ah CM O.Ibobi Singh inrawina hnuoia State Cabinet meeting nei a ni a, Sept. 9, 2014 a Imphal-Ukhrul Road-a Lower Hundung a inlambunna tlunga Police hliemna thu le Ukhrul ADC a MDC, Ngalangzar July 12, 2014 a Finch Corner bula kap hlumna thu hai chu National Investigation Agency (NIA) suizui dingin an rel.


Post a Comment

Powered by Blogger.