Parbung, May 16: Pherzawl District Sport Association le HMARTOB Hmarram huoihawtna hnuoiah May 16, 2026 khan Parbung Mini Stadium, Hmarram, Pherzawl District ah Hmar Martyrs' Day 2026 ursûntaka inser le hmang a nih. Hi huna hin Hmar hnam ta dinga martyr lo chang ta hai sûnna le inzâ inentirna hunser HPC (D) Manipur Region in an nei a, HVV Hmarram in kuong zâwnna neiin ram le hnam ta dinga martyr hai inzâna suklangnain gun salute an pêk. Hi hunser hmang dinga mipui fê khâwm ha'n toṭawka martyr hai sûnna an nei a, pâr inhlânna hai nei a ni zoin Rev. Lalneikhumin martyr sungkuohai ta dingin ṭawngṭaipêkna a nei. Hnam ta dinga martyr lo chang ta hai sungkuo aiaw'n, Pu Lalsawnlienin thuhrilna a nei bâkah, Pastor Robert L. Hmar in hnam pasalṭha hai ṭawngṭaipêkna a nei.
Hi hunser a hin Khuollienin Dr. Laldawmsang, MO, CHC Parbung a ṭhang a, Khuol Inzaumin Pu Lalpeksang, Manager, Punjab National Bank, Senvon Branch, Hunser Chawngpu in Pu Joshua Hmar, C-in-C, HPC(D), Manipur Region a ṭhang a, Khuol Chawngpu'n Pu Lalringfel Hmar, HYA Pherzawl Jt. Hqrs. a ṭhang. Khuollien ha'n thu an hrilna a chun an hringna chen thâp ngama hnam ta dinga martyr lo chang ta po po inzâna insângtak an pêk thu, vawisuna a la dam ha'n martyr hai inpêkzona le an hringna hlutak an inhlanna hi innghil lova hnam sûnga hartharna intluntu ni mawl hai sien ti an nuom thu hai an hril.
Martyrs' Day hmang huna hin JSS Parbung, PMS Jr. High School, Parbung Govt. High School le NSCBAV ha'n hnam lâm mawi tak tak el inentirna an nei a, Hmarram Region sunga HSA, HYA, HWA, Hmar Inpui, HKI, Parbung VA le, ITAC ha'n thuhrilna an nei a, Martyrs' Day ni le zân huna Artiste- Upa Lalbieklien, Nk. Lawmsangzuali Ralsun, Nk. Jenise Pudaite, Nk. Zaii Hauchhum le Nk. Siampuii Ralte ha'n hla in mipui an inâwi.
.jpeg "Hmar Martyrs' Day")
.jpeg "Hmar Martyrs' Day")
.jpeg "Hmar Martyrs' Day")
Hnam ta dinga martyr hai chanpuola hunser bîk hmang a ni zoin PDFA le HMARTOB Hmarram in martyr hai hrietzingna dinga May 9, 2026 a'nthawka an huoihawt, Pherzawl District Hmar Martyrs' Trophy 2026 Football Tournament final match inkhêl a ni a, inkhêl hmâin PDFA Anthem ''Aw Kan Hmarram'' sak niin players ha'n toṭawka martyr hai sûnna minute khat an nei zoin inkhêl ṭan a ni a, Electric Department in khingpui Damdiei FC 3-2 a hnein Pherzawl District Hmar Martyrs' Trophy 2026 chu an lo dawm ta a nih. Champion team Electric Department hai Martyrs' Trophy le cash prize Rs.100,000/- inhlân an ni a, 1st Runner-up latu, Damdiei FC hai cash prize Rs.50,000/- inhlân an nih. Tournament sunga Individual prize dawngtuhai: Best Goalkeeper- Thangneilal (Electric Dept.), Best Defender-Thanglianjohn (Damdiei FC), Top Scorer-JB Faihriem (Damdiei FC), Best Midfielder- Peter Khumrolian (Electric Dept.), Player of the Tournament-Thanglianjohn (Damdiei FC). Player of the Tournament hi sumfai Rs.3000/- le trophy inhlân a ni a, individual prize hran hran dawngtuhai hi Rs.2000/- le trophy inhlân an ni bawk.aa
