Parbung, May 18, Virthli (ONP): Zoram khawvela rimawi tienga mitin hriet lâr, India ram sûnga le tuipui râl a haia hla sak dinga ko hlaw tak el, Mizo Artiste- Nk. Siampuii Ralte in Jubilee Standard School Hostel a inchûklai naupang hai a kan. JSS Brand Ambassador- Nk. Siampuii Ralte in JSS hostel naupang hai a kan huna hin thilpêk chi tum tum, hostel naupang hai fâk le dâwn ding inhlanna a nei a, inchuklai naupang hai hohlimpuina neiin an talent kawl hai chu sukpung pei ding le, an thiem thil nei hai chu an lekha inchûkna tieng sukbahla lova hmang ṭangkai thiem dingin inchûklaihai an fui tâwl a, JSS hostel naupang hai hohlimpuina neiin hun hlimum tak el hmang a nih. JSS Parbung chun Ms. Siampuii in JSS Brand Ambassor dinga an pawm chu lâwmum an ti thu hrilin an lâwmthhu hrilna'n Ms. Siampuii Ralte a nu hi fâk le dâwn tuihnai tak el an lo kiltlângpui.
Jubilee Standard School in April 24, 2026 a'nthawka Football Training Program an nei le inzawmin Nk. Siampuii Ralte hi Coaching Staff ha'n hohlimpuina an nei a, hmâ tienga ṭhang tlâng pei dan ding hriltlâng niin JSS jersey mawi tak el Head Coach le Saff ha'n Ms. Siampuii an lo inhlân. Jubilee Standard School chun football training program le inzawma iengkima hmâ la puitu- Pu James Pusing, President, Pherzawl District Football Association kuoma khawm lâwmthu an hril bawk a nih.
Hi huna hin Mr. Kapkhanlian Shoute, Headmaster, Jubilee Standard School in thilpêk hai chawia JSS Hostel a kanna chungthuah JSS Brand Ambassador- Ms. Siampuii Ralte kuomah lâwmthu a hril a, Jubilee Standard School in hma tieng peia hunser pawimaw an nei hun a hai ṭhang tlâng pei dingin Ms.Siampuii chu a lo fiel bawk a nih. April 6, 2025-a Siampuii Ralte in JSS Hostel a kan ṭuma a thlalak chuongna, Academic School Calender chu Academic Dean- Mr. Lalngaisak Infimate in Ms. Siampuii Ralte kuomah inhlânna a nei.
