Parbung, May 14: Pherzawl District Football Association le HMARTOB Hmarram inkawpa an huoihawt, Hmar Martyrs' Trophy 2026 Football Tournament, Parbung Mini Stadium-a nei mêka um chu Semi Final hai inkhêl zo a lo ni tah. Semi Final match khatna ah Damdiei FC in an khingpui Sinlung Camp FC 5-1 in an hne a, Semi Final match hnina ah Electric Department in an khingpui hai, Rawvakawt 2-1 in an hne ve thung.
Semi Final inkêl hi Pu Lalbiakzama, Hon'ble Speaker Mizoram, Pu V. Malsawntluanga, Lunglei North MLA le Pu Vanlalsiamsanga, Member, Sinlung Hills Council ha'n an uop a, Pu Lalbiakzama, Hon'ble Speaker Mizoram in players hai inspection neiin thu hrilna a nei a, Mizo sûng a hin hnam tamtak an um thu, in suk Mizo a á¹Ã»l zie hai hrilin hmun tin le ram tina chêng Mizo ha'n harsatna le beidawngna ei tuok châng khawma Mizo hai Jerusalem, Mizoram hi hung bêl hlak dingin mitin a fiel a, Mizo sûnga hnam chi hrang hrang hai pum khata luong khâwm le, kal châwi tlâng pei hi ZPM sawrkar a thil tum pawimaw tak el a ni thu hrilin a Mizo chanpui hai abîktakin Pherzawl District, Manipur a chêng unau Hmar hai, an chengna hmun ngeia kan theia a um chu lâwmum a ti thu a hril. Lunglei North MLA- Pu V. Malsawmtluanga khawmin thu hrilna neiin a thlatuhai a suina a chun Hmar pahnama mi tho an ni ve leiin an suk mikhuol naw thu le, Parbunga a unauhai kan angin a'n ngai thu le, an suk chawngpu hle thu a hril.
Pherzawl District Hmar Martyrs' Trophy 2026 Football Tournament Final match hi hung tlung ding Martyrs' Day (May 16, 2026) hin hnam ta dinga martyr hai ursûntaka sûnna hunser hmang a ni zoin inkhêl ning a ta, Finalist- Damdiei FC le Electric Department han final match inkhêl an tih
