Pherzawl, November 12, 2025, Virthli (ONP): Pu Ajay Tamta, Union Minsister of State for Road Transport & Highways chun November 12, 2025 khan Pherzawl District a kan, hi huna hin Pherzawl ah Tipaimukh MLA le DLO hai meeting a neipui a, Pherzawl district sûnga sawrkar department hran hran hai ṭha taka a function pei thei dân ding le, sawrkar office/infrastructure hai bâwl le sukhmasâwn dan ding chungchâng hriltlâng le ngaituo tlâng a ni a, Union Minister chun central tieng hmâ a lâk ding thu le, state sawrkar khawm inhriettirin hmâ a lâk ding thu a hril.
Pherzawl ah meeting a neipui zoin Tipaimukh Sub-Divisional Headquarters- Parbung tieng a pan phei a, Union Minister hi Parbung kawtsuo-ah mipuiin ropuitakin an lo hmuok. Parbung CHC Campus ah hunser hmang niin Union Minister of State for Road Transport & Highways, Pu Ajay Tamta chun mipuiin ursûntaka an lo hmuok le an lo lâwmlût chu ropui le lâwmum a ti thu a hril a, Pherzawl district a ram leilung mawi zie thu hrilin Union Minister chun NH-2, Tipaimukh Road hi two lane a siem vat a ni ta ding thu, PMGSY hnuoia lampui hai khawm siemṭhatna sin thaw vat a ni ding thu a hril a, hun liemtaa PMGSY hnuoia lampui lo siem hlaktu contractor, sin ṭha taka thaw naw hai chu hnâwl an ni ding thu a hril a. Hi huna hin NHIDCL hotuhai khawm mipui lai inngirtirin inhmelhrietna an nei tir a, lampui siemna sin chu ṭan vat ani ta ding thu a hril.
Union Minister Pu Ajay Tamta chun Pherzawl District in bâksam tamtak a nei le, kawng tamtak ah sukhmasawn a ṭul zie hai mit ngeia hmutu a ni thu hrilin Pherzawl district sukchângtlung na dingin a thei ang anga hmâ a lâk ding thu a hril a, central sawrkarin ram hmasawnna dinga scheme/project an duong hai chu hi lai rama chêng haiin an dawng phâk le, an lo sawr phâk ve chu a duthusam le a beisei niin Union Minister hai laia hi lai ram (Phezawl district) kan hmasatak a ni thu a hril a, a nawk a khawm a la kan nawk ding thu a hril.
Hi huna hin Ngursanglur Sanate, MLA, 55-Tipaimukh A/C khawma Union Minister hi lo ṭawiawmin thuhrilna a nei ve a, Indigenous Tribes Advocay Committee (ITAC) haiin Union Minister of State Pu Ajay Tamta hi Manipur state pieng hmâa Pherzawl district sûnga pi le puhai sulhnung, Monolith hai a thlalak le thuziek inhlanna an nei a, Pherzawl district Hmarram sûnga CSO hran hran hai le Hmar Inpui GHQ ha'n Union Minister kuomah Memorandum inhlanna an nei.
