Hmar Inpui (Supreme House) Assam Hills Region hi ei inṭannaa inthawkin a kum 25na SILVER JUBILEE Pathien ṭhuoina zârin ei lo tlung dêr el ta a, kum 25 sûng khan hnamin buoina le harsatna chi hran hran ei tuok khawmin mipuihai tlawmngaina, inthuruolna le inpêkzona zâr chauin hnam a la dam thei hi lawmum ei ti takzet a, lungril taka ṭhang laa hnam danghai hnung hnawt lo dinga ṭhang la tlâng le bei fan fan chu ṭhuoituhai le sûngkuo tin mawphurna ah a’n nghat a nih.
Hmar Inpui Assam Hills Region Silver jubilee hmang dân ding kumbula inthawkin Executive Committee-in a ngaituo a, kumbul rorêl-cum-Budget session-in budget hai siemin hmang remtitlâng a nih a.
Hmar Inpui AHR Executive Committee thurêl dungzuiin Govt. of Mizoram-in Hmar ṭawng hi Mizoram sûnga dingin Major Languages dinga phalna January 2024-a ami puongpêk le Sinlung Hills Council sûnga Hmar ṭawng L.P Schools-a hai Medium of Instruction-a ami pawmpêk bâk ah kum 2003-a hnam buoina ei tuok lai le 2023-a Manipura hnam buoina ei tuok nâwkna thua hai Nu le Pa chan changa duottaka milo enkawltuhai an ni bâkah hmatieng peiah inzawmna ṭhalem ei nei pei theina beiseina leiin Mizorama ei hnam chanpui hai fiel remti ani a.
Chu dungzui chun Tarik 7th August 2025 khan Aizawl ah hang fein Tarik 10 October, 2025a Silver Jubilee hmangpui dingin Pu K. Sapdanga, Honourable Home Minister, Pu Lalnghinglova Hmar (Tetea), Minister of State for Sports & Tourism etc le Pu Lalmuanpuia Punte, Adviser to Chief Minister (political) hai an office chamber-a ngei hang inhmupuiin chibaibûkna-in Hmar Thangsuopuon hai hang insiltir an nih a, Silver Jubilee hmangpui dinga fielna khawm ei fielna anga rem an mi tipui leiin lawmum ei ti hle.
Mizorama inthawkin Pu. K Sapdanga Home Minister le Minister dang dang le mi pawimaw 20 vel hung dinga phone hmu a nia, chu bâka Hmar Inpui Gen.Hqtrs ṭhuoitu le Hmar Inpui Region hran hran Manipur, Mizoram, Maghalaya, Guwahati, Delhi le Cachar le a dang danga inthawk mi pawimaw tamtak fiel le hung dinga beisei ani bawk.
Chun, N.C. Hills le Karbi Anglong Autonomous Council hotuhai le District Comissioner, Dima Hasao , Minister le hnam hran hrana Apex body (Inpui) tin hai fiel an ni bawk ding ana, Muolhoi Public Ground-ah Hall lien tâwk tak bâwla puithutak le ropuitaka Silver Jubilee hi hmang dinga buotsai a nih.
Silver Jubilee hmangna ding hun thuah Tarik 10 October 2025 dinga inbiek felpuina nei ani hnungin Tarik 29th August 2025 khan harsatna le remchang nawna leia an thei naw ding thu le tarik 3rd October 2025-a sawn hnai le hmang lem nisien ti rawtna an hung pêk a, HSA Founding Day le a’n tuok ta leiin a ni thleng dinga inbiekpuina nei nawk a ni khawma hun remchâng dang an nei thei tanaw leiin CSOs le HSA Joint Hqtrs. le HSA Muolhoi Unit hai le vawihni zet Joint Committee nei ani hnungin 3rd October 2025 hi HSA Founding Day le intuok sienkhawm lo thei lova hmang kawp a ṭûl tâk leiin, hmangkawp dinga thu sukthlûkna le remtitlâng anih. HSA 86th Founding day Flag keipharna khawm Silver Jubilee hmangna hmuna nei n$ng a ta, a ṭûl ang dungzuiin zân programme khawm inthâwltaka HSA chan dinga sie anih.
Hi hun pawimaw tak hi Hmar Inpui Assam Hills Region sûnga CSOs, Hmar khuo G.B. popo le mipui popo hlutsak le ngaipawimawa ṭhang seng dingin ei infiel a, a thei chenah programme dang siem lo ding le hi hun pawimaw tak hi mitin lo inbuotsai dingin ei infielin ei inngên a, lo thei lo thil a ni ngawt naw chun inzin hai khawm thaw naw hrâm dingin ei inngên bawk a nih.
HMAR HNAM DAMZING RAW SEH!
(Upa Darrova Darngawn)
President
(Upa ManthangParate)
Secretary
