New Delhi, August 25, 2025, Virthli (ONP): Hmar Students’ Delhi & NCR chun August 23, 2025 khan phuisutakin Dr. SR KVS Auditorium No. 2 Delhi Cantt-110010 hmun ah Ṭuonthar hai lâwmlûtna hunser an hmang. Hi huna hin Hmar inchûklai, Ṭuonthar mi 60 bâwr hai chu ropuitaka lâwmlût niin hlim tlang takin hunser hmang a nih.
Hi hunser a hin Khuollienin Dr. Chaltonlien Amo, General President Hmar National Union, Former Minister, Vice President MSME, PCI, i/c of North-East States chu a ṭhang a, Lt. Colonel Jonathan Lalremruot OIC, ECHS Delhi NCR (Officer i/c of Ex. Servicemen Contribution Health Scheme) chu Khuol Chawngpu in a ṭhang.
Hun khatna Tv. George Lalramsuok le Sieli Margaret Lalpiengmawi han hnetakin an keihruoia, Rev. Lalrobul, Executive Director, New Life Ministry in hun ṭawngṭaia hun hawngna a nei zoin Tv. Martin Vanlalsawma Ṭhiek in lâwmlûtna thucha hrilna a nei a, Amb. John A. Thanglura Darlongin chibai bûkna hun a hmang.
Khuol Lien- Pu Dr. Chaltonlien chun lekha închuk a pawimawzie le, nungchang mâwi a pawimawzie thu hai ursûntakin a hril a, iengtiklaikhawma Pathien ṭi tlat a ṭulzie thu hrilin vawisuna inchuklai hai hi zinga ṭhuoitu ding an ni leiin, inruithei thil hrim hrim lakah fihlîm dingin an fûi tâwl.
Khuol Chawngpû- Lt. Col. Jonathan Lalremruot chun mâni thil thawna tinreng a hai taima taka thaw hlak dingin inchûklaihai an fui a, sin insâng le inhnuoi a um naw zie hai hrilin inchuklaihai ta dingin thu ṭha tam tak a hril.
Hi huna hin kum 2025 a Ṭuonthar Lânu le Vâla ding thlangna nei a ni a, Tv. Charlie Zohminglien chu Ṭuonthar Vâl dingin thlang a ni a, Nk. Rose Lalremruot chu Ṭuonṭhar Lânu dingin thlang a nih. Ṭuonthar han inhmelhrietna hunser an hmang zoin Pastor Lalhrietsangin an ta dingin ṭawngṭaipêkna a nei.
Hi hunser a hin members fam lo chang ta hai sûnna le, an sunghai ta dinga ṭawngṭaipêkna Pastor Ngamneivung Pangamte in a nei a, Hmar Students' Delhi & NCR a inchuklaihai kuomah lawmpuina thilpêk hai inhlanna nei a ni a, inchûklai hlawtlingna chang insâng bîk hai kuomah lawmpuina thilpêk inhlanna nei niin naupang Inchuklaihai po po kuoma khawm ngaihlutna le ditsakna thilpêk inhlan an nih.
Kum tina an lo thaw hlak angin hi huna hin Bethesda Social Service Wing chun tlâwmngaia mani thisen khawm inro lova pê hai kuomah Chawimawina Thuziekmâwi an inhlânna an nei a, Hmar Social Service hai a'nthawkin thuhril tâwi ngaithlâk a ni zoin Pro Pastor Mathew Lalramlienin ṭâmhnêm inhlânna a nei.
Hunser hmang a ni sûng hin Hlasak thiem tak tak han hla in mipui an inawi a, Tv. Muan Buhril in a ṭingṭang per thiem zie a pholang a, Siel Ramnghakhla in Thumâwi thiem takin hrilna a nei bawk.
Hun hnina hi Tv. Jacob Malsawmdawnglien Khawbung le Sieli Esther Pulamte han an keihruoia, Tv. S William in lâwmthu hrilna a nei a, 'Ṭhang ruolin Lung ruolin' ti hla mipuiin sakna an nei zoin Rev. Hrangtinai in hmangaina Ruoi inhlanna a nei a, khawp le tlei taka kîltlâng niin Ṭuonthar hai lâwmlûtna hunser chu dit khawp lo takin hmang zo a lo ni tah.
