Ei hnam sûngah thil ditumlo tak le ṭibaium tawpkhâwk, ei unau Pu Zosangkhum Hmar le Upa Lalrimawi Hmar, Tattephai khuo, Jinam Valley, Dima Hasao haiin ni 19.08.2025 zân khan an lo tuoka. Hmêhlretlo silai chawihaiin zâna an ina inthawk ṭhuoihmangin hun ienamichen chu hmun hriet loah an hrêntâng a nih ti ei hriet seng. Hi thil tlung hin Hmar nau lungril a suknain a ngaituona a fângsouk. Sulkhat suok hnam khat ei ni leiin thisenin a mi ko naw thei nawh. Hiengang thil ditumlo hi nang le kei a chungah khawm hung tlung nâwng a tih ti thei a ni bawk nawh. Chuleiin, hieng ang thil tlung nâwk ta ngai lo ding le ei ditnawzie inlangtira Sorkâr thuneithuaiin a’n rang thei anga misuolhai hi mana a ram dân anga an phûtâwk hremna pe ngei dinga phûtnain, hung tlung ding ni 27.08.2025 khin dar 11 AM – 12:30 PM hun sûng Hmar Inpui, Assam Hills Region le a thawpui HSA, HYA, HWA, HPU, HLS-in “Protest Rally” lam hrawna – Haflong, Mahur, Harangajao le Jinam Valley a hai huoihawt an tih. Hi “Protest Rally” a hin “Hmar ka nih” inti taphawt (Kum 15 a’nthawka 60 chenhai) chu damnawna lei le exam nei lai an ni ngawt naw chun ṭhang ngei ngei dinga inhriettir an nih.
Protest Rally nei huna mitinin ei zâwm seng dinghai chu :
** Hnam incheina – nuhmeiin Hmar Puon bî seng ding, pasalin Hmar Puon Muffer awr seng ding.
** Protest Rally nei hun sûng Hmar khuoa dâwr, office, school le inlirthei po po khâr le sukchâwl nîng a tih.
** Inchûklaihai tukhawm Pâwl sari a’nthawka chungtieng hai chu Protest Rally-a ṭhang seng ding. Exam neihai ruok chu huomsa naw nih.
** Protest Rally-ah tukhawm zu/damdawi inrui puma ṭhang phal ninaw nih. Khêk inthlar phal ni naw ni a, Volunteer in-charge hai thu inza seng ding. Chun, inrui thei fa le dâwn, buoina siemhai chu Hmar Inpuiin an chungthu rêl a tih.
** A hun sûng a tawi leiin nihliep chawi phal ni naw nih.
** Sorkâr/Private office, Mission Office le College/School institution-a thawktu Hmar nau taphawt chu Rally-a hin an ṭhang ngei ding a nih.
Hnam hmakhuo ngaina leia “Protest Rally” hi huoihawt a ni ding a ni leiin kimtaka ṭhang dinga beisei ei nih. Hnam hmalákna hi lo thlawp seng dingin ei inngêna ngaitha le dodâltu ni lo dingin mitin ei hung inhriettir.
Hmar Hnam Dam Zîng Raw Se!
Hnama in thahnemngaipui,
Upa Darrova Darngawn (Upa Manthang Parate)
President Secretary
