Tuiṭhaphai, May 26, 2025, Virthli (ONP): May 22, 2025 a damnawna leia Delhi hmuna fam chang Pu Lalthansang Pulamte @L. Sanga Hmar, Ex-Chairman, Spokesperson, Hmar People’s Convention-Democratic (HPC-D), Manipur Region le SoO group United People's Front-a JMG Member ruong chu May 26, 2025 khan a chêngna le an sungkuo inlalna khuo Thingchom, Tuiṭhaphai ah râlna/sûnna hunser ursûn taka hmang a ni zoin ropui taka vûiliem a nih.
Râlna/sûnna hunser hi chawhma dar 10 a ṭan niin Hmar hnam sûnga pâwl hran hran hieng Hmar Inpui-GHQ, HYA-GHQ, HSA-GHQ, HYA Tuiṭhaphai JHQ, HSA Tuiṭhaphai JHQ, HNU, HPC-D Manipur Region, HNA, Hmar Returnees, Sinlung Royal Riders le a dang dang haiin râlna hun an hmang a. HPC-D Manipur Region ai-awin an Chairman Pu Lalneikung Hmar in sûnna thucha hrilin, Pu Lalthansang in hun lo taka muol a liemsan chu hnam ta dingin chânna lien tak a ni thu, an inpâm thu le an sûn hle thu hai a hril a, a hmalâkna le sin hmabâk tam tak a mâksan hai chu bo naw ni a, a hnung an la hung bawzui le sunzawm pei ding thu hai a hril a, HPC-D hin sûnna thuziek le bêl in an râl a nih.
ZRO/ZRA le UPF ai-awin Pu Ketheos Zomi, Secretary, MEA, ZRO/ZRA in hun a hmang a, ZRO le UPF chun Pu Lalthansang chu an inroin an inpâm hle thu a hril a, UPF a khawm pa lungril tluong tak a ni a, a tamlem ditdâna thil fepui hlak mi a ni thu hai a hril bakah Hmar hnam hmangaitu indiktak a ni a, Hmar chu a hmasatak ah a sie hlak thu, Hmar hnam le tlangmi hnam hai ta dingin chânna ropui tak a nih ti hai a hril. ZRA hotuhaiin a ruong chungah puon inkhumna an nei a, an cadres 30 bâwr ha'n parte pakhat seng a ruong chungah an sie le inruolin inzana salute an pêk.
Kuki National Organisation (KNO) ai-awin Pu Hemlal @Th. German Haokip in hun hmangin, Pu Lalthansang chu an inpâm hle a, an sûnna hle thu hai hrilin, KNO/UPF ta ding khawma chânna ropui a ni thu hai a hril, KNO aiin puon inkhumna an nei a. KNO tienga kawp HNA hai hotu Pu Lalṭanpui Hmar khawmin sûnna thu hrilna le puon inkhumna a cadre hai leh an nei bawk.
Hieng hai bak a hin lâinatu mimal tamtakin râlna hun hmang an um a, chawnhnung dar 3:30 vêl khan Thingchom thlânmuol ah Rev. Immanuel Hrangchal, Circle Pastor, EFCI in vûina hunser hmangin HPC-D Manipur Region cadres-ha'n Condolence Salute pêkna an nei a, chu zoin Pu Lathansang Pulamte ruong chu ropui taka vûiliem a lo ni tah a nih.
