Tuiṭhaphai, May 22, 2025, Virthli (ONP): Vawizân tieng a India President Droupadi Murmu in India rama mihouisen thlangdawkhai kuoma huoisen lâwmman 'gallantry awards' inhlânna hun Defence Investiture Ceremony – I, Rashtrapati Bhawan hmuna a neina ah Hmar pasalṭha Pu Jeffrey Hmingchullo S/o Lalkhawthang & Vanlalmuoni, Vengthlang, Rengkai, CCpur chu Shaurya Chakra inhlân a nih.
Pu Jeffrey Hmingchullo hi CRPF ah Inspector niin tukuma Shaurya Chakra, India rama huoisen lâwmman/châwimâwina insâng hai lâia a pathumna dawngtu ding mi 14 chauh an thlangdawk hai laia ṭhang ve a nih. Pu Jeffrey hi kum 2023 a Jharkhand a helpâwl Maoist hai leh nâsataka an inkâp ṭum in, rem hrie tak le huoisen taka che in Maoist 2 an kâphlum a, a che huoi leiin a ruolhai an him pha bawk leia hi châwimâwina hi inhlân a nih. Tuhin Pu Jeffrey hi 203 CoBRA Bn.a posting mêk a nih.
Pu Jeffry Hmingchullo hi Hmarnauhai lâia Shaurya Chakra, huoisen lawmman (gallantry award) dawng hmasatak a nih. Shaurya Chakra lo dawng ta hai list en chun zonhnathlâk lai khawm a pathumna a nih. Kum 1980 khan (L) Pi Lalzadinga, Buarpui, Mizoram kha a hmasatak a nia, kum 26 mi chau a ni lai ramhnuoia sakei an suolpuia, a hreipuiin a chêk hlum der a nih. A pahnina chu kum 2013 khan Sepoy Lallawmzuala, 18 Rashtriya Rifles (Artillery)-a a posting lâi Jammu & Kashmir ah Jaish-e-Mohammad hai hotulien a thatna le inzawm in lo inhlan a ni ta bawk a nih.
Hieng ang huoisen lâwmman dawng thei Hmar pasalṭha ei nei hi a hnam ang zâwng khawma lâwmpui a phu hle.
.webp)
