Parbung, May 22, 2025, Virthli (ONP): State Bank of India in Parbung khuoa Branch an hawng tum le inzawmin Pu Namkoi Kangba, Co - Ordinator, SLBC Manipur le, Pu Thuomzamung Tonglut, LDM, Churachandpur & Pherzawl hai chun May 22, 2025 khan Parbung Bank Complex enfelna neiin Dawrkâwn zâwl ah khawtlâng inkhâwm ko niin banking le inzawma van tlâng mipui hriet ṭul hai inhrilhrietna nei a nih.
Pu Nangboi Kangba in Bank Complex a kan huna thu a hril naa chun a thil hmu haiin an suklâwm thu le, beiseina a pêk thu hai a hril a, Bank complex GPS photo chu head office tieng a thawn ding thu, internet facility chu mamaw tâwk anga ṭhaa a ngâi thu le, economic status hai data pêklût a ni huna le, Bank tieng han ṭha tâwka an ngaia buoina dang a um naw chun tû kum 2025, December thla bo hma ngeia Parbung SBI Branch chu hawng hman a ni ding thu a hril.
Parbunga Bank hmun ding enfel a hung hai hi Tipaimukh MLA Team le Parbung Village Authority ha'n lo ṭâwiâwmin thlaithleng an lo awt pui. Pherzawl District sunga State Bank of India (SBI) a um theina dinga mipui le, Pu Ngursanglur Sanate, Tipaimukh MLA hmalâkna chu a hlawtling ngei an beisei thu a workers hai a'nthawkin thu ei dawng.
.webp)
