Rengkai/Tuiṭhaphai: April 23, 2025 (Nilaini)-a rela lo um tah angin Tipaimukh Road Transport Cooperative Society Limited (TRTCS) hnuoia Hmarram le Tuiṭhaphai inkara service motor hai chu May 15, 2025 (Ningani) a inthawk rotation a intlântir ṭan an lo ni tah.
May 15, 2025 zingkar khan main counter, Vengpui, Rengkai ah rotation a tlan hmasatak ding ṭhum vawra thlangsuokna nei a ni a, driver le motor neituhai an phur tlang hle. Hi hun a vek hin inzinmi/passenger hai kuomah ticket pek suokna nei nghal a ni bawk. Tuta inthawk chu mipuiin mani chuongna ding motor indap chawp ngai ta loin counter-ah ticket laa an inzin thei ta ding a ni leiin passenger ṭhenkhatin lawmum an ti thu an hril.
Hi le inzawma mipui lo hriet dingin hieng a hnuoia hai hi Secretary, Information & Publicity, TRTCS in a tlangzar nawn nawk:
(1). May 15, 2025 (Ningani) a inthawk inzinmi/passenger haiin maniin motor zawng buoi ngai ta naw ni a, counter ah motor ngaivenin ticket lak hlak ni tang a tih.
(2). Motor suok hun ding 7:30 AM le 4:30 PM ni ta hlak a t'a, hi huna hai indik takin main counter a inthawk motor suok hlak tang a tih.
(3). A chunga hunbi a hai khin motor an suok ta hlak ding a ni leiin passenger hai chun hi hun tlung hma ngeia counter tlung hlak ding ning a tih.
(4). Inzin nuom le motor hire nuom hai chun mobile number 9362096724 a hin ngaiven hlak ding a nih.
ALSO READ: TRTCS in kalman an sukpung, mipui lo hrethiem dingin an ngen
Mihai thaw dan ṭha laa, Hmarram service haiin umzie nei taka hma ei hang lak thei hi hnam ang khawma hmasawnna ropui tak niin ei hriet leiin, mitinin TRTCS fe dan hi zuia thlawp tlat dingin ngenna ei siem nawn nawk a nih, tiin Secretary, Information & Publicity, TRTCS thusuok chun a tarlang sa bawk.
