Hmarkhawlien, May 16, 2025, Virthli(ONP): Hnam ta dinga thlunglu lo chân ta, Hmar Pasalṭha hai hrietzingna ni May 16 - Martyrs'Day, a vawi 36-na chu HSA Barak Valley Joint Headquarters ṭhuoina hnuoiah vawisûn khan Hmarkhawlien Playground-ah phuisui takin hmang zo a lo ni tah.
Martyrs' Day vawi 36-na hi hun hnia ṭhe a ni a. Pu H. Rochung Keivom, Headman, Kuokluong chu Hnam Pa a hmang niin, hnam ṭhuoitu hai le mi pawimaw iemani tâwk Special Invitees-a fiel a umha'n an uop. Vâl Upa, Hmarkhawlien haiin kuong zâwnna neiin Hmar tlangvâl haiin sûnna hunser 'Gun Salute' chu mâwi inkhâi takin an inentir bawk. Artiste haiin mipui pungkhâwm hai hlaa inâwiin hun khatna hunser hmang zo a nih.
Hnun hnina ṭan nâwk nghâl niin Lakhicherra Dilkoosh-a ZPC Member, Pi Sima Deb chu Khuollienin a ṭhanga, Upa Dr. Vanlallien Pulamte, GC College Assistant Professor chu Khuol inzâumin in a ṭhang.
Neithang Vêng Cultural Troupe haiin hnam lâm mâwi taka inentirin HWA Hmarkhawlien Unit haiin hnam puon pholângna neiin hun an hmang bawk. Hi le inruol hin pâwl 10 inchûklai hai ta dinga siem, Pu Zokapsang Lungṭau a lekhabu ziek 'Sierkawp Bu' chu Upa Dr. Vanlallien Pulamte, General Secretary, Hmar Literature Society, Assam in tlângzarna a nei.
HMARTOB 2025-in May ni 3-a inthawka a lo huoihawt tah, Hmar Martyrs' Trophy vawi 36-na Final Match chu Sinlung Club, Hmarkhawlien le Zion Street A Team haiin an khêl a. Sinlung Club, Hmarkhawlien chun an khingpui hai chu 2-1 a hnein hrâtna nopui an dawm bawk a nih.
Programme hlawtling taka Hmar Martyrs' Day vawi 36-na hmang zo a nina le Hmar Martyrs' Trophy khawm tluong taka zo thei a nina san chu programme a chanvo neitu ha'n an chanvo ngai pawimaw a, a hun taka chanvo an hluosipna le mipui ṭhahnem tâwk tak pungkhâwm hai zâr lei ani thu Organising Board chun a hril. A bîkin a'n nghatna khawtlâng, chawngpu chan changa iengkima hmalatu - Hmarkhawlien khawtlâng ṭhuoitu hai le mipui hai po po chungah Organising Board - HMARTOB chun lâwmthu a hril a hril bawk a nih.
