Tuiṭhaphai: April 16, 2025 sun khan a nuhmeiin kum 49 a tling lawmpuina le Pathien kuomah lawmthu hrilna'n mihai ta dinga malsawmna intlun rawptu Pu Lalramsiem Zote, General Secretary, Hmar Youth Association-General Headquarters ni lai chun Churachandpur District Hospital Blood Bank-ah thisen Unit 1 (khat) a pek/a thawlawm.
A mamawtu hai hmang dingin Pu Lalramsiem Zote hin tu chenah thisen vawi 34 a pek tah. A nuhmei Pi Lalhrietpui-in vawi 8 le an naupa Tv. Gershom Laltlansa-in vawi 7 an pek ve tah bawk.
April 7-8, 2022 a Hmar Youth Association (HYA) 13th Triennial Conference, READS Auditorium, Rengkai a nei ṭum khawm khan Pu Lalramsiem Zote hin HYA member, Joint Headquarter 11 le Branch 121 laia tlawmngai fal thisen pe rawn thlang suok chawimawina thuziek a lo dawng tah a nih.
Sungkuo entawn tlak tak an nih. Pathien-in an hma ṭhuoia mihai ta dinga malsawmna ni sunzawm pei dingin ditsakna insangtak ei inhlan a nih.
Pu Lalramsiem Zote hi Hmar laia YouTuber inlar laia pakhat le ElarEs Zote ti YouTube Channel neitu kha a ni a, hnam le khawtlang ta dinga mi ṭangkai niin pi-pu tlawmngaina nun sukhringtu laia mi challang ve tak a ni bawk.
Thlalak a inlang ve, chang tienga mi hi a nuhmeiin Churachandpur District Hospital Blood Bank-ah Valentine's Day-February 14, 2025 a thisen a pek lai a nih.
An innei 25th Anniversary/Silver Jubilee khawmin an venghai (Churachandpur-Sugnu Road a um Valpakot) leh a hawnpuiin thisen an pek.
Ama hi ni 90/thla 3 hnungah a remchang angin a thisen a pek pei hlak a. A nuhmei khawm ni 120 dan peiah a remchang angin a pek ve el hlak a nih.
-LRS Puruolte
