CCPUR, March 9, 2023, Virthli (ONP): Hmar Writers Club-in lekhabu a sut pahnina, 'Hnam Ro 2' tlângzarna le Hmar Writers Award 2023 inhlânna hun chu Hmar Writers Club huoihawtnain March 9, 2023 khan RWUS Training Hall-ah hlawtling taka hmang a nih. Inkhâwm hi Tv. V. K. Pangamte'n hne takin a keihruoi a. Hmar Writers Award 2023 chu Prof. Dr. Lal Dena le Pu Thangsawihmang inhlan an nih a, an pahni hi chawimawina thuziek mawi tak el inhlân an ni a, Award hin sum fâi Rs. 10, 000 ve ve a sawm.
Hi huna hin HWC President, L. Kiemlo Pulamte le Pu L. Ruoivel Pangamte haia inthawkin thu hril ngaithlâk a ni a, Award dawngtuha'n thu an hril bawk.
Award inhlânna hunser hmang a ni zo hin lekhabu 'Hnam Ro - 2' thlîr lâwkna hun chu Editor, Lallungawi-in a hmang a, Khuol Lien Pi Thangṭhatling-in a tlângzar a, thu a hrilna a chun Hmar Writers Club han hieng ang chawimawina hunser an huoihawt chu ropui le lawmum a ti thu a hril a, mihriem hin thiemthil ei nei seng a, ei thiem thil le thilpêk ei idawng hai an ang naw seng a, ei theina chit a hai hma la tlânga hnam ta dinga ei thiemthil hai hmang ṭangkai seng dingin mitin a fiel a, ziekmi ni naw sien khawm, a thei ang angin Hmar Writers Club hai hmalâkna chu a thlawp ding thu a hril.
Hun kâr laka Nk. Dinpui Joute-a inthawkin hla sak ngaithlâk a nih. Tlângzara um Hnam Ro lekhabu 2 hi a man chu copy khat cheng 250 a nih.
