NGURTE, February 23, 2023, Virthli (ONP): Independent Church of India Kristien Ṭhalai Pawl Inkhawmpui Lien a vawi 39-na (February 23-26, 2023) Ngurte, Tuiṭhaphai Presbytery a innghat chu vawizân, February 23 zân ṭan a lo ni tah. ICI CKṬP General Conference a vawi 39-na hi Upa Dr. H.L. Liensang, Moderator ICI in hawngna a nei a, KṬP Hlapui ''Lal Iengkim Thawthei'' mipuiin an sak zoin Upa Ramhlunsang, Chairman, ICI CKṬP in lâwmlûtna thucha a hril. Hi huna hin Pu David Traite, Secretary, CKṬP in thupuong pawimawi hai puongna a nei a, Pastor Jospeh L. Khawbung a'nthawkin Pathien thucha ropuitak el ngaithlâk a nih. Conference ṭan zân hin ICI Central Choir le Rev. Thangngur Music Awardee han inpâkna hla an inhlân a, Rev. Thangngur Music Award 2023 inruolsiekna nei a nih.
39th General Conference hmang a ni sûng hin Conference Rorêl um a ta, Rev. Rorelfel ICI, Child Co-Ordinator, Rev. H.P. Runremthang, EAL ICI, Evan. Lalhminglien Joute, NTK/MF, Rev. Lalneikhup Hmar, Secretary Ministries ICI, Evan. Lalpiengzo, Assam M/F le Rev. Evan John, YCO ICI han Pathien thucha hrilna nei an tih.
Inkhawmpui Lien a vawi 39-na a hin Presbytery/City Church/Mission Field a Kristien Ṭhalai Pawl han Hlapâwlpui ah inruolsiekna (Buongliengkung Choral Award) nei an ta, Presbytery/City Church/Mission Field tin âiawtu dinga thlanga um, hlasakthiem tak tak han malzai (Rev. Thangngur Music Award) ah inruolsiekna nei an tih. Hieng hai baka hin Presbytery/ City Church/ Mission Field a Kristien Ṭhalai Pawl han Skits/Drama/Short play/Choreography ennuom um tak tak pholang an ta, ICI Central Choir, NPT Central le Rev. Thangngur Music Awardee han hlaah rawngbawlna nei hlak an tih.
ICI CKṬP Inkhawmpui Lien a vawi 39-na a hin YCO in CKṬP Project inhrilhrietna hun nei a ta, Hla Ruoi khawm ṭhe ning a ta, Pathien inpâka chawimawiin hun hlimum tak el hmang tum a nih. February 26, 2023 zân 39th General Conference hi ṭumṭiek a ta, Rev. Lalhmingthang, Executive Secretary ICI in Conference khârna nei a tih.
