PARBUNG, January 15, 2023, Virthli (ONP): Unau Suopui Cultural Festival a ni thumna le a tâwpna ni chu January 14, 2023 khan Parbung Khelmuol-ah hmang a nih. Hi huna hin Chief Guest in Pu RT Akhel, President, Aimol Tribe Union hmang a ni a, Chief Host in Pu Lalthlamuana Hmar, Chief Executive Member, Sinlung Hills Council hmang a ni a, Functional President in Dr. L. Fimate, Chairman, Core Committee a ṭhang a, Guest of Honour in Pu Laldawnlien Varte, General President, HYA GHQ a ṭhang.
Chief Guest- Pu RT Akhel, President, Aimol Tribe Union in thu a hrilna a chun hieng ang Unau Hmar haiin inkeibûmna sin in hung thaw hi a thawtu ding awm hrim in nih a. Nang ni râwl nghâkin in unau hai hi kan lo um zing a, vawisûn a taka inkobûmna ' Suopui Festival' a um thei hi ka lawm hle.
Vawisûna unau hung khâwm hai hin ei thiltum hi kan tlawp tlat a, ei unau vawisuna la hung ṭhang theinaw hai khawm vel nâwk an ṭhang ngei theina dingin hma la ve nghal kan tih tiin a hril.
Hun hmangna hi Mr. Barry Vungthangkung le Ms. Elizabeth Zothangpui han an keihruoia, Pastor Joarthang-in hun hawng ṭawngṭaina a nei zoin Suopui Festival a ni thumna program ṭan a nih. Hun hmasa tieng Pu David K. Zote, Treasurer, Core Committee in lâwmlûtna thucha a hril a, Ms. Mercy Lalumpuiin hlâ sakin Hmar Cultural Warrior han item chi dang dang an pholang a, Suopui Cultural Truope hai anthawkin Hnam Lâm hmunuom um tak tak en a ni a, Mister Mizoram a nawna Title latu- Mr. Michael Hmar le Manipur Miss KUT- Nk. Teresa Varte han an thiemthil hai an pholang a, hnam thuom hai pholangna hunser hmang a nih. Hi huna hin Hmar Inpui, Hmar Literature Society, Hmar Christian Leaders Forum le Hmar Women Association han thu hrilna an nei. Vote of thanks Dr. David Buhril, Secretary, Core Committee in a hril zoin sûn program hi Pastor Laldiklien Inbuon in ṭawngṭainain a khâr.
Zân program Parbung khelmuol-ah hmang nawk a ni a, Dr. L. Fimate, Chairman, Core Committee in Farewell Speech a pêk zoin Hla Ruoi ṭhe a ni a, Suopui Artiste hai le Sinlung Express Band han mipui fe khawm hai hla'n an inâwi.
Unau Suopui Cultural Festival, January 12-14, 2023 hun sûnga Parbung le Ruonglevaisuoa hmanga um a hin Suopui Tribe Leader Suopui haiin Pi le Pu hai lo inṭhedarna hmun Ruonglevaisuo ngei-ah Thupuong siemin lungruol takin suoi an kei seng.
