Parvachawm, March 7, 2022, Virthli (ONP): Parvachawm HYA le Youth Club hai huoihawtna hnuoiah Hmar Youth Association (HYA) Founding Day a vawi 37-na chu vawisun Parvachawm Public Ground ah khawtlâng huopin ursûn le ropui taka hmang a nih.
Hi hunah hin Chief Guest in Dr. L Fimate a țhang a, a nuhmei Pi Thangneikim khawma a uop ve, Guest of Honour in Mr. George F. Tuollai, PWD, A.E. a ṭhang.
HYA Founding Day le inzawma Parvachawm khawtlâng huopa kar hni liem taa Team 16 han football le volleyball hmanga insukhlimna an nei chu vawisun khan final match hai khêl a ni a, Parvachawm HYA Branch in cultural dance chi hran hran an pholang bâkah theihle mût, Air gun kâp in el, hna mût in el, carrom-board le insukhlimna chi dang dang nei a nih.
Hi huna hin Chief Guest Dr. L Fimate in Parvachawm khawtlâng hmang ding sound system le thilpek chi hran hran HYA kutah an hlan a, Parvachawm mipui hai an lawm hle, hi huna hin thu ṭha tak tak el a hril. Hi huna Guest of Honour dinga fiel George F. Tuolai (A.E) PWD chu a taksa ngei inlang theinaw sien khawm, a aiawtu'n sumfai ṭhahnem tawk tak Parvachawm HYA Branch an hlan.
Hi hunser a hin HYA Hmarram Jt. Headquarters hai a'nthawk thuhril ngai thlâk a ni a, Parvachawm HYA Branch ha'n mipui fe khawm hai hmu dingin hnam lâm chi 7 lai an pholang bawk.
Program hi phuisui taka hmang a ni zoin Chief guest Dr. L Fimate le a team hai chun Parvachawm an lo suok san nawk tah.
