~ Dr. John H Pulamte
Hmar mipui le thuoituhai ditsakna le ringzona ka chang lei chu ni mei a ta; kum 1988 anthawk khan Inchuklai Nun Board Member anthawka tanin HSA-ah kan zel tan a. General Headquarters Executive Member, Information & Publicity Secretary, General Secretary, Vice President, President ka hung ni tung pei a; a tawpah Assembly Speaker ka nina chu Hmar Inpui President dinga hlangkai ka ni tak leiin 2013 khan ka lo inthla a nih. Hieng hun karlaka hin tleirawl suok chauh nia ka lan ngai lai 1991-1993 inkar sung khan Hmar Youth Association, Tuuithaphai Joint Headquarters Secretary mawphurna incheltir ka ni nghe nghe. Chu baka chun Manipur pumpuia tribal thuoituhai ditsakna le ringzona zar bawkin 2003 anthawka 2009 sung khan All Tribal Students’ Union Manipur (ATSUM) President ka chel a; tu chen hin Adviser (Tribunal Member) in an mi la sie nghe nghe. Hienga social thila ka’n hmangna zar hin electoral politics tienga inchawmlut din mi tamtakin an mi beiseia chu ka lo lunglut pek ngai nawh. Hi hma deu lai lem khan chu ei hnam thuoitu iemani zat chun fiel takmeuin an mi fiela chu fiemthu titakin ka hnawl pek tawp a nih.
Chuong chu ka lungril ngaituona a ni lai zinga tuta tuma Saikot biela dinga ka hung inchawmlut ve thuoi el kha mi tamtakin mak an tia, awm hlie hlie ti pawl khawm an um tho. Vaihnu rama hung inlang chauh anga ngai ka nina kha a’ndikna chen a um. A san chu Saikot biela Hmar tawng hmanghai ta ding chun ei khingpui dinghai nina, a ngir tum zat le zuom an um le um naw hrietchieng hmasak zet naw chun Tipaimukh biel anga kum khat kum hni hma anthawka boruok lum siem pup pup el na chi ni’n ka hriet nawh.
November 1, 2021-a Hmar Inpui Executive Meeting-in Manipur Election 2022 huna Hmarhai keibum dan ding lampui daptu ding Panel Committee an hung indin chie kha ‘Pathien Remruot’ angin ka ngai tawp a, lawmum ka ti hle a nih. Mi thenkhat chun, kha committee kha kei ka remruotna le hmalakna leia indin an sawna chu a n inaw zie hrietu chu Pathien a nih. Hmar Inpui President ka lo ni ve leiin a pawl le thuoituhai kan zaa, an thu kha ka ngaichang hle ringawt a nih. January 13, 2022-a Committee hai le inpawltlangna kan nei huna ka thil hril pawimaw hmasatak chu: “Panel Committee le a biel sunga khawtlang thuoituhaiin lungruol takin sapawt mi puong ro. Chu le inruol chun unau hnam danghaiin ei inthuruol zie an hmua ei hrat thei ding zie an hriet chun nasataka fiel hran ngai lovin an mi hung baw ngei ngei ding a nih” ti a nih. Saikot biela Hmarhai hi inthuruol lo anga hril ei ni veta chu khel muhlum a nih. Result sheet hluihai pheta en thei a nih. Minority vote ‘zaah za’ luongkhawm a um ngai nawh. 2007 kuma Hmar kandidetin Hmar vote a hmu zat percent kha ka hmu chun ka pu Khongsai le a dang danghai zarin tling ngei kan beisei thu ka hril uor hle bawk.
Tling ngei dinga hmalak chu duthusam a ni lai zingin ring naw tieng deia thu a um pal chun tiin ‘second best option’ ka pek bawk. Hieng ang hin – “Inthuruol takin fe phot ei ta, kandidet danghaiin an mi hawphur taluot leia anni tieng khawm a pahnam le a chawi pawl chen inrawla an insiemrem hlauh chun zing ela vote thlak ding a ni khawma hnam le khawtlang thuoituhai thuthlukna a ni phawt chun ka bawm khara midang bawma sunglut pup khawm ka ngam” thu a nih. Chu ding khawm chun ‘Hmar sapawt’ ka ni hmasak phawt a tul. Chuong naw chun kandidet tinhai Hmar lai an lut chun keithe ei ni tho tho ding. Chuleiin, kei chu a keikhawmtu (binding force) ka ni a ngai. Chuonga ei thaw chun a suktlingpa khan Hmarhai leia tling a ni zie inphat dan a um naw reng reng.
Panel Committee hai le inpawl tlang tuma ka thu hril pakhat nawk chu Hmar mi pahni ei ngir chun ‘chance’ a um naw leiin hnam le khawtlang thuoituhaiin kei ni lo midang ngir lem dinga an ti a ni khawmin lawmtaka ka pawm ding thu le an mi thlangpa/nu chu ka theitawpa ka thangpui ding thu a nih.
Committee haiin Hmar khuo bubitna hai an zir zo hnunga khawtlang levela thuoituhai le inrawnkhawmna hai an nei zing leiin ‘hnam sapawt’ hmu ngei inbeiseiin nomination lekha ka peklut ve a; unau hnam danghai lai theitawp takmeu suoin ka campaign a; ring nekin an mi lo dawngsawng thaa tha a fan hrat hle. Tuta tum baka Hmar tawng hmanghai ta dinga chance tha a um nawk ta naw ding thu an mi hril uor a. Hmar ei inpum phawt phawta, ringzo um tawka an mi hmu chun an mi baw ngei ngei ding thu mi tamtakin an mi hril bawk.
Hun a hung inher peia a vawrtawp a hung hnai lai Hmar Inpui Panel Committee haiin Saikot biel sung chiea umhai kuomah mawphurna inhlansawnga Committee hran an indinpui tah a. Chu Committee tharhai le chun inpawltlanga ka ngaidan, tuchena hmalaknahai inhrilin hun hlimum tak hmanga kan ngai laiin an hnung meta an thuthlukna siem chu ka ring le beisei naw tieng dei a hung ni tah a. Mani chipuihai ringzona le ditsakna chang naw chun umzie ka nei naw ding zie hlak chu ka chiengsa a ni leiin rin tak pumin ka’n ‘withdraw’ thu ka puong bur el kha a nih. Hmar vote a’npum naw ding thu an hriet khan unau hnam danghaiin an mi tril san trak trak nghal bawk leh. Ditsakna ka chang nawna san chu tamtak um a tih. Mimal taka mi do le phithla nuom an um chu ni mei a tih. A hming zawnga zuk hmer le intum ding chu ka hriet nawh. Keia beiseina insangtak neia tha le zung, sum le pai le ngaituona senga mi lo thangpuitu le Pathien kuoma mi lo intlunpektuhai ruok chu pawi ka tipuiin ka lunginsiet tawl taluo.
Insuk pasalin fe thleng lui lang chu Hmar vote na na chu kandidet danghai nekin hmu rawn lem ngei ka tih. Sum seng metin hnam dang vote khom 2000/3000 chu hmu taluong ka tih. Anachu, tlingna phak ni si naw nia; Hmar vote keidartu le hnam zortu chena intum le hrilsiet ni ngei bawk ka tih. Election thila inhrilsietna le indemna hai lem chu um naw thei an nawh. Vana Vantirko hung in kandidet sien khawm demna ki um tho a tih. Chuleiin, ka ta ding le Hmar hnam ta dinga ‘option’ um sun chu ‘puon anga mi hnawltu’, a biela Hmar le khawtlang thuoituhai lezawma Hmar vote inpumna ding le Hmar vote leia MLA nei hramna ding theitawp suo kha a nih. Chuleiin, anni dit dan le thuthlukna anga sapawt dinga an puong kha ‘official’ taka thlawp kha ka thawthei umsun le a hma khawma ka lo intiemna hrim kha a nih.
Hmar MLA thar ei nei naw khawma Hmarhai zara MLA ei nei ngei chu ka nuoma Pathien kuoma ka ngen mawl mawl khawm a nih. A ni naw ruok chun ka hriet bik ta nawh.
Imphal; March 6, 2022
