Muolvaiphei, November 16, 2021, Virthli (ONP): Muolvaiphei khuo sâttu famtah Pu Lienkhum hrietzingna dinga Tom's Fan Club ha'n Muolvaiphei khuo huopa The 2nd (L) Lienkhum Memorial 5 Men Soccer Tournament an huoihawt chu November 15, zân dar 6:30 PM khan Muolvaiphei Playground-ah hawngna hunser hmang niin ṭan a lo ni tah. Hawngna hunser hi Nk. Christina Buongpui le Tv. Jason T Pulamte ha'n an keihruoia, Upa Lalmalsawmin ṭawngṭaia hun hawngna a nei zoin P.K. Ramchuoilo-in lawmlûtna thucha a hril.
Hi huna hin Khuollienin Pu George T. Haokip, Intending Candidate, 59 Saikot A/C a ṭhang a, Khuol Inzaum le Khuol Chawngpu'n Pu Timothy Z. Zote, Chairman, Saikot Sub- Division Demand-Cum- Development Committee le Pu Darthangkhum, Chief of Muolvaiphei hai an ṭhang. Tournament huoihawttu ha'n Khuollien hai Châwimâwina thuziek an inhlân a, Khuollien hai khawm thilpêk inhlânna an nei ve.
Hawngna hunser hmang a ni sûng hin hun kâr laka Rebecca Lungṭau in mipui fê khawm hai hla in an awi.
Pu K. Ramlawmsanga, Adviser, TFC in lâwmthu hrilna a nei zoin Khuollienin Tournament a kick off a, first match ah (L) Lalthlamuong FC ha'n Xope Point FC hai 3-1 in an hne a, 2nd match ah Pong's FC han Ngaia & Paulsang Memorial Team hai 2-1 in an hne. Hi tournament a hin Team 20 an ṭhang a, zân huna inkhêl hi nei ni hlak a tih.
